ជាតិ
សង្គមជាតិ
ប្រធានរដ្ឋឡាវ មកទស្សនកិច្ចផ្លូវរដ្ឋនៅកម្ពុជា ពីថ្ងៃទី៩ និងទី១០ កុម្ភៈ លោក ប៊ុនញ៉ាំង វរជីត(Bounnhang Vorachith)ប្រធានរដ្ឋឡាវ បានអញ្ជើញដល់ព្រលានយន្តហោះអន្តរជាតិភ្នំពេញ នៅព្រឹកថ្ងៃទី៩ កុម្ភៈ ឆ្នាំ២០២០នេះ។ រូបភាព៖AKP
× ភ្នំពេញ៖ ប្រធានរដ្ឋឡាវ លោក ប៊ុនញ៉ាំង វរជីត នឹងមកបំពេញទស្សនកិច្ចផ្លូវរដ្ឋនៅកម្ពុជា នៅថ្ងៃទី៩ និងទី១០កុម្ភៈនេះ។ តាមសេចក្តីជូនព័ត៌មានរបស់ក្រសួងការបរទេសកម្ពុជា ក្នុងអំឡុងទស្សនកិច្ចនេះ លោក ប៊ុនញ៉ាំង វរជីត នឹងចូលគាល់ព្រះមហាក្សត្រ ព្រមទាំងមានជំនួបដោយឡែកជាមួយ សម្តេច សាយ ឈុំ, សម្តេច ហេង សំរិន និងសម្តេច ហ៊ុន សែនផងដែរ ហើយក៏អញ្ជើញដាក់កម្រងផ្កានៅវិមានឯករាជ្យ និងគោរពព្រះវិញ្ញាណក្ខន្ធ ព្រះបរមរតនកោដ្ឋដែរ។
លោក ប៊ុនញ៉ាំង វរជីត អគ្គលេខាធិការនៃគណៈកម្មការមជ្ឈឹមបក្សប្រជាជនបដិវត្តន៍ឡាវ និងជាប្រធានរដ្ឋឡាវ នឹងអញ្ជើញមកបំពេញទស្សនកិច្ចផ្លូវរដ្ឋនៅកម្ពុជា រយៈពេល២ថ្ងៃ គឺនៅថ្ងៃទី៩ និងទី១០កុម្ភៈនេះ។ នេះបើតាមសេចក្តីជូនព័ត៌មានរបស់ក្រសួងការបរទេសកម្ពុជា នៅថ្ងៃទី៦ កុម្ភៈនេះ។
សេចក្តីជូនព័ត៌មានដដែល បញ្ជាក់ថាក្នុងអំឡុងពេលទស្សនកិច្ចនេះ លោក ប៊ុនញ៉ាំង វរជីត នឹងចូលគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា នៅក្នុងព្រះបរមរាជវាំង។ លោក ប៊ុនញ៉ាំង វរជីត ក៏នឹងមានជំនួបដោយឡែកផងដែរ ជាមួយសម្តេច សាយ ឈុំ ប្រធានព្រឹទ្ធសភា, សម្តេច ហេង សំរិន ប្រធានរដ្ឋសភា និង សម្តេច ហ៊ុន សែន នាយករដ្ឋមន្ត្រីកម្ពុជា។ ហើយនៅក្នុងអំឡុងពេលស្នាក់នៅ២ថ្ងៃនេះ លោកប្រធានរដ្ឋឡាវ នឹងអញ្ជើញដាក់កម្រងផ្កានៅវិមានឯករាជ្យ និងគោរពព្រះវិញ្ញាណក្ខន្ធ នៅមណ្ឌបព្រះករុណា ព្រះបាទនរោត្តម សីហនុ ព្រះបរមរតនកោដ្ឋផងដែរ។
បើតាមសេចក្តីជូនព័ត៌មានរបស់ក្រសួងការបរទេសកម្ពុជា ដំណើរទស្សនកិច្ចផ្លូវរដ្ឋ របស់ លោក ប៊ុនញ៉ាំង វរជីតនេះ គឺជាព្រឹត្តិការដ៏មានអត្ថន័យបន្ថែមទៀត ដើម្បីពង្រឹងភាពជាដៃគូយុទ្ទសាស្ត្រគ្រប់ជ្រុងជ្រោយ និងយូរអង្វែង ក៏ដូចជា រឹតចំណងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យ រវាងប្រទេស និងប្រជាជននៃប្រទេសទាំងពីរ៕
© រក្សាសិទ្ធិដោយ thmeythmey.com