អន្តរជាតិ
នយោបាយអន្តរជាតិ
កូរ៉ូណាវីរុស៖ ព្រោះគ្មានលទ្ធភាព ទីម័រខាងកើតស្នើឲ្យឥណ្ឌូណេស៊ីជួយគាំពារពលរដ្ឋខ្លួនដែលមកពីចិនជំនួសខ្លួន
រដ្ឋមន្ត្រីផែនការ និងវិនិយោគទីម័រខាងកើត លោក Xanana Gusmao និយាយទៅកាន់អ្នកសារព័ត៌មាន (
×![]()
រដ្ឋាភិបាលទីម័រខាងកើត បានស្នើត្រង់ៗទៅរដ្ឋាភិបាលឥណ្ឌូណេស៊ីឲ្យជួយទទួលយកពលរដ្ឋរបស់ខ្លួនពីចិន និងគាំពារពួកគេឲ្យបានសមរម្យ ខណៈកូរ៉ូណាវីរុស កំពុងតែរាតត្បាតខ្លាំងទាំងក្នុងប្រទេសចិន និងប្រទេសក្នុងតំបន់។ ការណ៍ដែលរដ្ឋាភិបាលទីម័រខាងកើត ស្នើបែបនេះ ដោយសារតែប្រទេសក្មេងខ្ចីជាងគេក្នុងតំបន់មួយនេះ ពុំមានលទ្ធភាពគ្រប់គ្រាន់សម្រាប់ទប់ស្កាត់នឹងកូរ៉ូណាវីរុសឡើយ។
រដ្ឋមន្ត្រីផែនការ និងវិនិយោគទីម័រខាងកើត លោក Xanana Gusmao បានឲ្យដឹងថា រដ្ឋាភិបាលលោក បានស្នើជំនួយពីឥណ្ឌូណេស៊ីដើម្បីជួយគាំពារ និងផ្តល់ទីលំនៅស្នាក់នៅបណ្តោះអាសន្ននៅកោះបាលីដល់ពលរដ្ឋរបស់ខ្លួន១៧នាក់ ដែលនឹងត្រូវបញ្ជូនមកចិននាពេលខាងមុខ។ នេះបើយោងតាមការចុះផ្សាយរបស់សារព័ត៌មាន ឥណ្ឌូណេស៊ី Jakarta Post នៅថ្ងៃ៥ កុម្ភៈកន្លងទៅ។
តាមប្រភពព័ត៌មានដដែល លោករដ្ឋមន្ត្រី និងជាបិតាឯករាជ្យទីម័រខាងកើតរូបនេះ បានលើកឡើងត្រង់ៗយ៉ាងដូច្នេះថា៖ យើងគ្មានសម្ភារគ្រប់គ្រាន់នោះទេ។ យើងគ្មានអ្វីទាំងអស់ ដែលនេះហើយធ្វើឲ្យយើងត្រូវតែស្នើជំនួយពីប្រទេសដទៃ។ លោក ជឿជាក់ថា ឥណ្ឌូណេស៊ី មានគ្រឿងបរិក្ខារសមស្របដើម្បីទប់ស្កាត់ជាមួយនឹងកូរ៉ូណាវីរុស។
អ្វីដែលគួរឲ្យកត់សម្គាល់នោះ ឥណ្ឌូណេស៊ី ជាពិសេសរដ្ឋបាលកោះបាលី បានដឹងមុនរួចស្រេចពីផែនការស្នើរបស់ទីម័រខាងកើតដើម្បីសុំការអនុញ្ញាតផ្តល់ទីលំនៅសម្រាប់ពលរដ្ឋខ្លួនមកពីចិន ហើយកោះបាលីក៏បានបដិសេធ ទុកជាមុនរួចផងដែរ។ តែយ៉ាងណាក៏ដោយ តាមការអះអាងរបស់លោកអភិបាលខេត្ត Nusa Tenggara របស់ឥណ្ឌូណេស៊ី រូបលោក នឹងទទួលយកពលរដ្ឋទាំងនោះ ប្រសិនបើមានការបញ្ជា និងឯកភាពពីលោកប្រធានាធីបតី Joko Widodo។
ជុំវិញបញ្ហានេះ មិនទាន់មានការអះអាងចុងក្រោយនៅឡើយនោះទេ ថាតើពលរដ្ឋទីម័រខាងកើត អាចទទួលបានការយល់ព្រមក្នុងការស្នាក់អាស្រ័យបណ្តោះអាសន្ននៅឥណ្ឌូណេស៊ីឬយ៉ាងណា ខណៈដែលប្រទេសរបស់ខ្លួន ពុំមានលទ្ធភាពគ្រប់គ្រាន់ដើម្បីទទួលពួកគេពីចិន ក៏ដូចជាពិនិត្យ និងគាំពារពួកគេពីលទ្ធភាពនៃការឆ្លងវីរុសកូរ៉ូណានោះ។
សូមជម្រាបថា ទីម័រខាងកើត គឺជារដ្ឋក្មេងខ្ចីបំផុត និងក្រីក្របំផុតនៅតំបន់អាស៊ីអាគ្នេយ៍ផងដែរ។ រដ្ឋនេះ នៅមានភាពខ្សត់ខ្សោយច្រើនរាប់បញ្ចូលទាំងវិស័យសេដ្ឋកិច្ច សន្តិសុខ និងសេវាសង្គមជាដើម៕
Tag:
ទីម័រខាងកើត
ចិន
ឥណ្ឌូណេស៊ី
កូរ៉ូណា
© រក្សាសិទ្ធិដោយ thmeythmey.com
