កីឡាជាតិ
ជាតិ
វិសាខាគាំទ្រចំណាត់ការរបស់បឹងកេត និងស្នើសហព័ន្ធធ្វើតេស្តទឹកនោមកីឡាកររកសារធាតុញៀន
×![]()
ក្លិបកីឡាបាល់ទាត់វិសាខា គាំទ្រយ៉ាងពេញទំហឹងចំពោះចំណាត់ការរបស់ក្លិបបឹងកេតដែលបានបញ្ចប់កិច្ចសន្យាកីឡាករ ម៉ាត់ យ៉ាមីន ដែលបានប្រព្រឹត្តប្រាសចាកក្រមសីលធម៌កីឡាករអាជីព។ ជាមួយគ្នានេះ ក្លិបជើងឯករងពានរង្វាន់លីគកំពូលឆ្នាំ២០១៩មួយនេះ ស្នើឲ្យសហព័ន្ធកីឡាបាល់ទាត់កម្ពុជា ធ្វើតេស្តទឹកនោមកីឡាករទាំងអស់ ដែលលេងក្នុងក្របខណ្ឌមិត្តហ្វូនខេមបូឌានលីគ។ 
ក្លិបបាល់ទាត់បឹងកេតនៅថ្ងៃទី៩ ខែកុម្ភៈ ឆ្នាំ២០២០នេះ បានសរសេរសារលើហ្វេសប៊ុកផ្លូវការរបស់ខ្លួន ដោយសម្រេចបញ្ចប់កិច្ចសន្យាជាមួយកីឡាករ ម៉ាត់ យ៉ាមីន ក្រោមហេតុផលបានប្រព្រឹត្តប្រាសចាកពីក្រមសីលធម៌កីឡាករអាជីព។ តែយ៉ាងណាក្លិបនេះមិនបានបញ្ជាក់ពីមូលហេតុលម្អិតរបស់កីឡាករ ម៉ាត់ យ៉ាមីន ដែលបានប្រព្រឹត្តខុសនោះទេ។
ភ្លាមៗនោះក្លិបបាល់ទាត់វិសាខាបានប្រកាសគាំទ្រយ៉ាងពេញទំហឹងចំពោះចំណាត់របស់ក្លិបបាល់ទាត់បឹងកេត។ «ក្លិបកីឡាបាល់ទាត់ វិសាខា ក្នុងនាមគ្រួសារបាល់ទាត់ជាតិកម្ពុជា សូមប្រកាសគាំទ្រពេញទំហឹង នូវចំណាត់ការរបស់ក្លិបបាល់ទាត់បឹងកេតអែហ្វស៊ី ចំពោះកីឡាករប្រើប្រាស់គ្រឿងញៀនខុសច្បាប់»។ នេះជាការបង្ហាញជំហររបស់ក្លិបវិសាខា ដែលបានសរសេរនៅលើហ្វេសប៊ុកផ្លូវការរបស់ខ្លួន។
បន្ថែមលើនេះ ក្លិបវិសាខា ស្នើសហព័ន្ធកីឡាបាល់ទាត់កម្ពុជា ក៏ដូចជាគណៈកម្មការប្រកួតបាល់ទាត់ជាតិកម្ពុជា ឲ្យមានការធ្វើតេស្តទឹកនោមរកសារធាតុញៀនដល់កីឡាករទាំងអស់ដែលលេងនៅក្នុងក្របខណ្ឌមិត្តហ្វូនខេមបូឌានលីគ។ វិសាខាអះអាងថា ការស្នើបែបនេះរបស់ខ្លួន គឺបញ្ជាក់ពីភាពស្អាតស្អំ និងរួមចំណែកអភិវឌ្ឍន៍វិស័យកីឡាបាល់ទាត់នៅកម្ពុជា។
«សូមសហព័ន្ធកីឡាបាល់ទាត់កម្ពុជា និងគណៈកម្មការប្រកួតបាល់ទាត់ជាតិកម្ពុជា រៀបចំការធ្វើតេស្ដទឹកនោមកីឡាករទាំងអស់ ក្នុងន័យធ្វើឲ្យមានភាពស្អាតស្អំក្នុងវិស័យកីឡាបាល់ទាត់ជាតិ និងជំរុញការអភិវឌ្ឍន៍វិស័យកីឡានេះ ឆ្ពោះទៅរកវឌ្ឍនភាពរីកចម្រើនបន្ថែមទៀត»។ នេះជាការស្នើយ៉ាងទទូចរបស់ក្លិបបាល់ទាត់វិសាខា។
«វាជាការសម្រេចចិត្តយ៉ាងលំបាក តែយើងត្រូវតែធ្វើ ដើម្បីជាគំរូ កុំឲ្យកើតមានលើកីឡាករផ្សេងៗទៀត»។ នេះជាការលើកឡើងរបស់ក្លិបបឹងកេត៕
Tag:
បាល់ទាត់
ម៉ាត់ យ៉ាមីន
© រក្សាសិទ្ធិដោយ thmeythmey.com
