កីឡាជាតិ
ជាតិ
អត្តពលិកជាង២០០នាក់ ចូលរួមជិះកង់ពង្រឹងសាមគ្គីភាព ក្នុងព្រឹត្តិការណ៍ថ្មើរជើងប្រវត្តិសាស្ត្រ រូបភាពទាំងអស់ពីហ្វេសប៊ុក Cambodia SEA Games 2023
× ឧត្តរមានជ័យ៖ អត្តពលិកជាថ្នាក់ដឹកនាំ ប្រជាពលរដ្ឋ សិស្សានុសិស្សមកពីកម្ពុជា និងថៃជាង២០០នាក់ បានចូលរួមប្រណាំងកង់ ក្នុងព្រឹត្តិការណ៍ថ្មើរជើងប្រវត្តិសាស្ត្រ នៅស្រុកអន្លង់វែង ខេត្តឧត្តរមានជ័យ នៅព្រឹកថ្ងៃទី៩ ខែកុម្ភៈ ឆ្នាំ២០២០នេះ។ ការប្រណាំងកង់នេះ ធ្វើឡើងដើម្បីបង្កើន និងរឹតចំណងសាមគ្គីភាព មិត្តភាព រវាងប្រជាជនកម្ពុជា-ថៃ ឲ្យកាន់តែល្អប្រសើរ ក៏ដូចជាផ្សព្វផ្សាយពីតំបន់ទេសចរណ៍ និងទាក់ទាញភ្ញៀវទេសចរ ឲ្យមកកម្សាន្តនៅស្រុកអន្លង់វែងផងដែរ។
នៅម៉ោងប្រមាណ៧ព្រឹកអ្នកជិះកង់ជាតិ និងអន្តរជាតិជាង២០០នាក់ បានមកជួបជុំគ្នានៅមាត់បឹងតាម៉ុកភាគខាងកើត (នៅមុខផ្ទះលោក គន់ គីម) ដើម្បីត្រៀមខ្លួនប្រកួតប្រជែងការប្រណាំងកង់ ក្នុងព្រឹត្តិការណ៍ថ្មើរជើងប្រវត្តិសាស្ត្រ ថ្ងៃចុងក្រោយ នៅស្រុកអន្លង់វែង ខេត្តឧត្តរមានជ័យ។ អត្តពលិកដែលជាថ្នាក់ដឹកនាំ ប្រជាពលរដ្ឋ និងសិស្សានុសិស្ស រស់នៅក្នុងស្រុកអន្លង់វែង និងមកពីប្រទសថៃ ត្រូវប្រកួតប្រជែងគ្នា លើចម្ងាយផ្លូវ១០គីឡូម៉ែត្រ។
ការប្រណាំងកង់នេះ មិនមានការចាត់ចំណាត់ថ្នាក់នោះទេ។ បើតាមលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC ដែលជាកីឡាករមួយរូបផងនោះ ការប្រណាំងកង់នេះ គឺដើម្បីបង្កើន និងរឹតចំណងសាមគ្គីភាព មិត្តភាព រវាងប្រជាពលរដ្ឋ រស់នៅក្នុងស្រុកអន្លង់វែង និងប្រជាពលរដ្ឋថៃ ដែលមានព្រំប្រទល់ជាប់ខេត្តមានជ័យ ឲ្យកាន់តែល្អប្រសើរ។
បន្ថែមលើនេះ គឺដើម្បីផ្សព្វផ្សាយពីតំបន់ទេសចរណ៍ និងទាក់ទាញភ្ញៀវទេសចរ ឲ្យមកកម្សាន្តនៅតំបន់ទេសចរណ៍ប្រវត្តិសាស្ត្រ ក្នុងស្រុកអន្លង់វែង ដែលជាទីតាំងចុងក្រោយនៃរបបខ្មែរក្រហម។ ការអបអរខួប៤១ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងខួប២២ឆ្នាំ នៃការទទួលបានសន្តិភាពពេញលេញ ក៏ជាគោលបំណងនៃព្រឹត្តិការណ៍នេះផងដែរ។
ក្រៅពីសកម្មភាពកីឡា ព្រឹត្តិការណ៍«ថ្មើរជើងប្រវត្តិសាស្ត្រ»ដែលធ្វើឡើងរយៈពេល៣ថ្ងៃចាប់ពីថ្ងៃទី៧-៩ កុម្ភៈ ឆ្នាំ២០២០ ក៏មានការប្រគំតន្ត្រី និងតាំងស្តង់ពិព័រណ៍ផលិតផលអន្តរជាតិផងដែរ៕
Tag:
ប្រណាំងកង់
ថ្មើរជើងប្រវត្តិសាស្ត្រ
វ៉ាត់ ចំរើន
© រក្សាសិទ្ធិដោយ thmeythmey.com