ប្រធានសមាគមយុវជនខ្មែរ៖ យុវជនកម្ពុជាមានសក្ដានុពល ប៉ុន្តែនៅខ្វះការគាំទ្រជាក់លាក់ពីរដ្ឋាភិបាល

ជាតិ

ប្រធានសមាគមយុវជនខ្មែរ៖ យុវជនកម្ពុជាមានសក្ដានុពល ប៉ុន្តែនៅខ្វះការគាំទ្រជាក់លាក់ពីរដ្ឋាភិបាល

12, Feb 2020 , 7:59 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ យុវជនកម្ពុជាមានសក្ដានុពល ប៉ុន្តែនៅខ្វះការគាំទ្រជាក់លាក់ពីរដ្ឋាភិបាល។ នោះក៏ព្រោះតែសកម្មភាពរបស់យុវជនមួយចំនួន ត្រូវបានរារាំងពីសំណាក់អាជ្ញាធរ ដែលនាំឱ្យប៉ះពាល់ទៅដល់ស្មារតី និងការចូលរួមរបស់ពួកគេ។ នេះជាការយល់ឃើញរបស់កញ្ញា ប្រាក់ មុន្នីរ័ត្ន ប្រធានសមាគមយុវជនខ្មែរ ។

កញ្ញា មុន្នីរ័ត្ន បានកត់សម្គាល់ថា យុវជនកម្ពុជាបច្ចុប្បន្ន មានសមត្ថភាពខ្ពស់ ក្នុងការប្រកួតប្រជែងជាមួយប្រទេសក្នុងតំបន់ និងពិភពលោក តាមការបង្កើតគំនិតច្នៃប្រឌិតថ្មី ដូចជាការផលិតមនុស្សយន្ត ឧបករណ៍ប្រើប្រាស់ និងសម្ភារបែបបច្ចេកវិទ្យាផ្សេងទៀតជាដើម។ ជាពិសេសការប្រឡងប្រជែងផ្នែកសមត្ថភាពប្រាជ្ញា និងស្មារតីនៅលើឆាកអន្តរជាតិនោះ ក៏ទទួលបានលទ្ធផលជាបន្តបន្ទាប់។

ជាបន្តសូមលោក អ្នកនាង ស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ និងកញ្ញា ប្រាក់ មុន្នីរ័ត្ន ប្រធានសមាគមយុវជនខ្មែរ ដូចតទៅ៖

កញ្ញា រ័ត្ន ដែលទើបឡើងកាន់តំណែងប្រធានសមាគមយុវជនខ្មែរ កាលពីពេលថ្មីៗនេះ បាននិយាយដូច្នេះថា៖«យុវជនរបស់យើងមានសក្តានុពលមែនទែន។ ប៉ុន្តែទោះបីជាយ៉ាងណា ដើម្បីឱ្យសក្ដានុពលនេះ មានប្រសិទ្ធភាព មាននិរន្តភាពនោះ ទាំងរដ្ឋាភិបាល ទាំងអង្គការសង្គមស៊ីវិល ទាំងវិស័យឯកជន និងអ្នកពាក់ព័ន្ធនានា ត្រូវតែបង្កលក្ខណៈ ឬក៏បង្កឱកាសគាំទ្រយុវជនដោយពិតប្រាកដ និងជាក់លាក់ ដើម្បីឱ្យយុវជនមានកម្លាំងចិត្ត និងកម្លាំងកាយ ក៏ដូចជាការចូលរួមបញ្ចេញសមត្ថភាព និងសក្ដានុពលបានពេញលេញ»។

បច្ចុប្បន្នរដ្ឋាភិបាលកម្ពុជា ក៏បានលើកទឹកចិត្តឱ្យយុវជនចូលរួមសកម្មភាពសង្គម និងនយោបាយផងដែរ ប៉ុន្តែការជំរុញនេះ ហាក់មិនទាន់មានប្រសិទ្ធភាពនៅឡើយទេ។ នោះក៏ព្រោះតែការចូលរួមរបស់យុវជនខ្លះ ត្រូវបានរារាំង និងហាមឃាត់ពីសំណាក់អាជ្ញាធរ ដែលធ្វើឱ្យប៉ះពាល់ផ្នែកស្មារតីរបស់ពួកគេ តួយ៉ាងដូចជាការជួបជុំបញ្ចេញមតិយោបល់ជាដើម។ នេះជាការបញ្ជាក់របស់កញ្ញា ប្រាក់ មុន្នីរ័ត្ន ដែលស្នើឱ្យរដ្ឋាភិបាលគាំទ្រយុវជនដោយភាពជាក់លាក់៕