ក្រសួងនិងថៅកែ កំពុងរកដោះស្រាយជូនកម្មករ ដែលត្រូវព្យួរការងារ

ជាតិ

សង្គមជាតិ

ក្រសួងនិងថៅកែ កំពុងរកដោះស្រាយជូនកម្មករ ដែលត្រូវព្យួរការងារ

12, Feb 2020 , 9:39 pm

រូបភាព

កម្មកររោងចក្រ ចេញពីធ្វើការ ត្រឡប់ទៅផ្ទះ

ដោយ:

ភ្នំពេញ៖ នៅចុងខែកុម្ភៈ និងក្នុងខែមីនា ឆ្នាំ២០២០ រោងចក្រកាត់ដេរមួយចំនួននៅកម្ពុជា នឹងបិទទ្វារ និងព្យួរការងាររបស់កម្មករ-កម្មការិនី រយៈពេល១ខែ ឬដល់ទៅ២ខែ ដោយសារតែអស់វត្ថុធាតុដើម ដែលនាំចូលពីចិន។ អំឡុងពេលកម្មករត្រូវព្យួរការងារ ម្ចាស់រោងចក្រ នឹងមានកិច្ចព្រមព្រៀងជាមួយកម្មករ ក្នុងការផ្តល់ថវិកាសម្រាប់សម្រួលដល់ការសា្នក់នៅ និងការហូបចុករបស់កម្មករ។

ក្នុងកិច្ចសម្ភាសជាមួយសារព័ត៌មានថ្មីៗ តាមទូរសព្ទនៅរសៀលថ្ងៃទី១២ ខែកុម្ភៈ ឆ្នាំ២0២0 លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា វីរុស COVID-19 កំពុងរាតល្បាតនៅចិន មិនមែនតែកម្ពុជានោះទេ ដែលត្រូវផលប៉ះពាល់លើវិស័យកាត់ដេរ សូម្បីបណ្តាប្រទេសដទៃទៀត ក៏ត្រូវរងផលប៉ះពាល់លើការខ្វះវត្ថុធាតុដើមសម្រាប់ផលិតផងដែរ។

សំឡេងលោក ហេង សួរ៖

លោក បន្តថា ក្រសួងការងារ កំពុងតែរកវិធានការដោះស្រាយជាមួយនឹងវិស័យឯកជននានា និងម្ចាស់រោងចក្រនីមួយៗ ដើម្បីសម្រួលដល់កម្មករ ខណៈកម្មករ នឹងត្រូវព្យួរការងារ។ លោក បាននិយាយដូច្នេះថា៖«ក្នុងដំណើរការ កម្មករត្រូវផ្អាកការងារ ម្ចាស់រោងចក្រ គឺត្រូវហៅកម្មករមកដោះស្រាយគ្នាទៅវិញទៅមក។ ទាល់តែពួកគេព្រមព្រៀងគ្នា បានក្រសួងសម្រេចថាឲ្យព្យួរ។ បញ្ហាព្យួរការងារហ្នឹង គឺដោះស្រាយតាមច្បាប់ការងារ ដែលត្រូវមានការព្រមព្រៀងគ្នារវាងថៅកែរោងចក្រ និងកម្មករ ក្នុងអំឡុងពេលផ្អាកបណ្តោះអាសន្នហ្នឹង»។

អ្នកនាំពាក្យ អធិប្បាយទៀតថា ក្រសួងការងារកំពុងតែដោះស្រាយពីបញ្ហាដែលម្ចាស់រោងចក្រនីមួយៗ នឹងត្រូវជួបប្រទះក្នុងអំឡុងពេលដែលអស់វត្ថុធាតុដើមសម្រាប់ផលិត និងច្នៃជាទំនិញផ្សេងៗ។ លោក មានប្រសាសន៍ថា៖«ការប៉ះពាល់លើវិស័យឯកជនយ៉ាងម៉េច យើងនឹងជួបជាមួយវិស័យឯកជន ហើយយើងនឹងដោះស្រាយថា ពួកគាត់នឹងមានសំណូមពរអ្វីខ្លះ អ៊ីចឹងយើងកំពុងតែធ្វើការជាមួយគ្នា»។

លោក ប៉ាវ ស៊ីណា ប្រធានសហជីពមួយរូប បានលើកឡើងដូចលោក ហេង សួរ ដែរ ថាការព្យួរការងារនេះមិនមែនជារឿងដែលគ្មានដំណោះស្រាយដល់កម្មករនោះទេ។ លោក បញ្ជាក់ថា ក្រសួងការងារ គ្មានច្បាប់ចែងថាកំណត់ឲ្យម្ចាស់រោងចក្រផ្តល់ថវិកាប៉ុន្មាន សម្រាប់កម្មករក្នុងអំឡុងពេលព្យួរការងារនោះទេ គឺអាស្រ័យលើការសម្រេចចិត្តរបស់ភាគីរោងចក្រ។

លោក បរិយាយថា៖«ពេលកម្មករព្យួរការងារ កម្មករមិនទាន់ទទួលបានថវិកាពេញលេញនោះទេ តែក្នុងន័យច្បាប់ ពួកគេអាចនឹងទទួលបានថវិកាខ្លះសម្រាប់ការស្នាក់នៅ និងការហូបចុក។ ដូច្នេះវាអាស្រ័យលើលទ្ធភាពការចរចាគ្នារវាងក្រុមហ៊ុន ឬភាគីកម្មករ ក្នុងអំឡុងពេលព្យួរការងារ ថាតើត្រូវឲ្យគាត់ប៉ុន្មានក្នុងមួយខែ ឲ្យ៥០ដុល្លារ ឬក៏៥០ភាគរយនៃប្រាក់ខែរបស់គាត់»។

ប្រធានសហជីព ដែលតែងឈរខាងកម្មកររូបនេះ យល់ឃើញថា ការព្យួរការងារនេះ ជាក្តីកង្វល់របស់កម្ពុជា ដែលធ្វើឲ្យកម្មករត្រូវប្រឈមនឹងអត់មានការងារធ្វើមួយរយៈ ដែលខាតបង់ប្រាក់ចំណូលក្នុងការផ្គត់ផ្គង់គ្រួសារ។ លោក និយាយថា៖«ការព្យួរការងារដែលបានប្រកាសជាសាធារណៈនេះនឹងប៉ះពាល់ដល់ចំណូលកម្មករ ដែលកម្មករភាគច្រើនគឺសុទ្ធតែមានបំណុលជំពាក់ខាងមីក្រូហរិញ្ញវត្ថុផ្សេងៗ»។

សម្រាប់លោក វិធីដែលអាចដោះស្រាយបន្ទុករបស់កម្មករក្នុងអំឡុងពេលគ្មានការងារធ្វើ គឺរាជរដ្ឋាភិបាលក៏ត្រូវមានចំណែកក្នុងការដោះស្រាយជីវភាពរបស់កម្មករផងដែរ។ លោកបញ្ជាក់ដូច្នេះថា៖«កន្លងមករាជរដ្ឋាភិបាលធ្លាប់ត្រៀមថវិកាមួយចំនួនសម្រាប់ទុកបម្រុងពេលមានផលប៉ះពាល់ដែលកើតឡើង។ អ៊ីចឹងអំឡុងពេលដែលកម្មករគ្មានការងារធ្វើនោះ រាជរដ្ឋាភិបាលក៏ត្រូវពិចារណាគិតដល់ការលំបាករបស់កម្មករដែរ។ ខ្ញុំរំពឹងទុកថា រាជរដ្ឋាភិបាលនឹងមានជម្រើសដ៏ល្អសម្រាប់សម្រាលបន្ទុកកម្មករ»។

សោម អូន ប្រធានសហជីព ដែលគាំទ្ររដ្ឋាភិបាល បានឆ្លើយតបជុំវិញការលើកឡើងរបស់មហាជនដែលសំណូមពរឲ្យរាជរដ្ឋាភិបាលមានចំណាត់ការដោះស្រាយលើបញ្ហាដែលកម្មករជួបប្រទះ។ លោក លើកឡើងថា៖«កន្លងមកក៏មានរោងចក្រខ្លះក៏ធ្លាប់បានព្យួរការងារក្រោមហេតុផលផ្សេងៗផងដែរ ដោយមានម្ចាស់រោងចក្រជាអ្នកទទួលរ៉ាប់រងលើចំណូលរបស់កម្មករ។ ជាធម្មតាការព្យួរការងារនេះ មិនចាំបាច់ឲ្យរាជរដ្ឋាភិបាលជាអ្នកដោះស្រាយទេ ព្រោះផលប្រយោជន៍គឺត្រូវជជែកជាមួយក្រុមហ៊ុន ថាតើត្រូវសម្រាកបានប៉ុន្មានក្នុងមួយខែ»។

លោក អាត់ ធន់ ប្រធានសហជីព ដែលតែងឈរខាងកម្មករដែរនោះ ប្រាប់សារព័ត៌មានថ្មីៗថា មានរោងចក្រជាង១០ នឹងត្រូវបិទទ្វារបណ្តោះអាសន្ន ហើយមានកម្មករជិត១ម៉ឺននាក់ នឹងត្រូវព្យួរការងារ។

សូមបញ្ជាក់ថា នៅកម្ពុជាមានរោងចក្រជាង១ពាន់៕