ជាតិ
ជប៉ុន ចង់វិនិយោគលើផ្នែកសំរាមនៅកម្ពុជា
× ភ្នំពេញ៖ ជប៉ុន ចង់វិនិយោគលើផ្នែកសំរាមនៅកម្ពុជា ក្រោយរដ្ឋាភិបាលសម្រេចដកសិទ្ធិគ្រប់គ្រងពីក្រុមហ៊ុន ស៊ីន ទ្រី។ លោក មីកាមី ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា ប្រាប់នាយករដ្ឋមន្ត្រី ហ៊ុន សែន បែបនេះ នៅក្នុងជំនួបពិភាក្សាការងារ នាវិមានសន្តិភាព នៅព្រឹកថ្ងៃទី១២ កុម្ភៈ។
លោក មីកាមី ម៉ាសាហ៊ីរ៉ូ បាននិយាយថា បញ្ហាសំរាម គឺជាកត្តាចំបាច់ដែលជប៉ុន យកចិត្តទុកដាក់ដោះស្រាយ និងចង់វិនិយោគ។ បើតាមលោក មីកាមី ក្រុមហ៊ុនជប៉ុនចំនួន៣ នឹងចូលរួមចំណែកដេញថ្លៃក្នុងការប្រមូលសំរាមនៅកម្ពុជា នាពេលខាងមុខ។
ឯកអគ្គរាជទូតជប៉ុនប្រចាំកម្ពុជា បានិយាយដូច្នេះថា៖«បន្ទាប់ពីបានជួយរាជធានីភ្នំពេញលើវិស័យទឹកស្អាត លើវិស័យចម្រោះទឹក ហើយនៅពេលនេះក៏បានយកចិត្តទុកដាក់ទៅលើបញ្ហាសំរាមតែម្ដង ដែលសំរាមនេះ គឺជាកត្តាចាំបាច់ ហើយជប៉ុនក៏មានក្រុមហ៊ុនចំនួន៣ ដែលមានចំណាប់អារម្មណ៍មកវិនិយោគនៅកម្ពុជា»។
កាលពីខែតុលា ឆ្នាំ២០១៩ រដ្ឋាភិបាល បានសម្រេចដកសិទ្ធិក្រុមហ៊ុនស៊ិនទ្រី ទៅគ្រប់គ្រងបណ្តោះអាសន្ន ក្រោមហេតុផលថា ក្រុមហ៊ុនស៊ិនទ្រីតែមួយពិតជាមិនអាចដោះស្រាយបញ្ហាសំរាមនៅរាជធានីភ្នំពេញបានឡើយ។ ប្រមុខរដ្ឋាភិបាល នឹងមានការបែងចែកតំបន់ប្រមូលសំរាមដោយអនុញ្ញាតឱ្យក្រុមហ៊ុនច្រើនប្រជែងដេញថ្លៃផងដែរ។
ថ្លែងប្រាប់លោក មីកាមី ម៉ាសាហ៊ីរ៉ូ សម្ដេច ហ៊ុន សែន បានបញ្ជាក់ថា នៅពេលនេះរដ្ឋបាលរាជធានីភ្នំពេញ និងក្រសួងសេដ្ឋកិច្ច កំពុងដាក់ការប្រមូលសំរាមនេះស្ថិតនៅក្នុងអន្តរកាល ។ នាយករដ្ឋមន្ត្រីកម្ពុជា បាននិយាយថា ៖«ក្រុមហ៊ុនចាស់ពុំអាចទទួលការងារនេះបានទៀតទេ ដោយសារទីក្រុងភ្នំពេញមានការរីកធំ ពីប្រមាណ៣០០គីឡូម៉ែត្រការ៉េ ទៅ ៦០០គីឡូម៉ែត្រការ៉េ ហើយនៅពេលដ៏ខ្លីខាងមុខនេះ ស្ថាប័នទាំងពីរគឺ សាលារាជធានីភ្នំពេញ និងក្រសួងសេដ្ឋកិច្ចនិងហិរញ្ញវត្ថុ នឹងដាក់ឲ្យដេញថ្លៃ។ ដូច្នេះក្រុមហ៊ុនជប៉ុន ដែលមានចំណាប់អារម្មណ៍ គប្បីចូលដេញថ្លៃ ដើម្បីជួយដល់ការប្រមូលសំរាមនេះ»។
ក្នុងមួយឆ្នាំកម្ពុជាមានសំរាមប្រមាណ៤លានតោន ដោយក្នុងនោះបរិមាណប្រមាណ៥៦ភាគរយ ត្រូវបានដឹកទៅចាក់នៅទីលានសំរាម។ បើតាមការបញ្ជាក់ពីលោក នេត្រ ភក្ដ្រា ក្នុងចំណោមកាកសំណល់ប្រមាណ៤លានតោន មាន២០ភាគរយជាសំរាមប្លាសិ្ទក ,២០ភាគរយទៀត ត្រូវបានគេយកទៅកែច្នៃប្រើប្រាស់វិញបាន និងជិត៣០ភាគរយ ត្រូវបានប្រជាពលរដ្ឋយកទៅបោះចោលនៅតាមទីសាធារណៈ។
តំបន់ប្រជុំជនសំខាន់ៗចំនួន៣ ដែលបានផលិតសំណល់ច្រើនប្រចាំថ្ងៃ រួមមាន រាជធានីភ្នំពេញមានសំរាមប្រមាណ៣ពាន់តោន ខេត្តព្រះសីហនុមានប្រមាណ៧០០តោន និងខេត្តសៀមរាបមានសំរាមប្រមាណ ៣៨០តោន។ជាមធ្យមកម្ពុជាមានសំរាមប្រមាណ១ម៉ឺនតោនក្នុងមួយថ្ងៃ ។ នេះបើតាមលោក នេត្រ ភក្ត្រា អ្នកនាំពាក្យក្រសួងបរិស្ថាន៕
Tag:
ហ៊ុន សែន
សំរាម
ជប៉ុន
© រក្សាសិទ្ធិដោយ thmeythmey.com