សម្ដេច ហ៊ុន សែន បាននិយាយថា ការផ្ដល់ទីតាំងឱ្យនាវាអាមេរិកចតនេះ គឺដើម្បីជួយសង្រ្គោះមនុស្សនៅជាប់លើនាវាដោយមិនខ្វល់ពីជាតិសាសន៍ ទោះបីជាតិសាសន៍ណាក៏ដោយ។ បើតាមនាយករដ្ឋមន្រ្តីកម្ពុជា ទង្វើរបែបនេះបង្ហាញពីការងារមនុស្សធម៌ដ៏ប្រពៃ និងសណ្តានចិត្តរបស់កម្ពុជា សម្រាប់មនុស្សលើពិភពលោក ក្នុងការយកអាសារសម្រាប់ជាតិសាសន៍ដទៃ។
តាមរយៈកិច្ចសម្ភាសជាមួយអង្គភាពព័តមាន Fresh News សម្ដេចនាយករដ្ឋមន្រ្តី ហ៊ុន សែន បានបញ្ជាក់ថា ៖«ហេតុអ្វីត្រូវសម្រេចអនុញ្ញាតឲ្យនាវានេះចូលចត តើត្រូវឲ្យពួកគេទៅណា បើគេបានបិទអស់ហើយ, ដូចដែលខ្ញុំបាននិយាយហើយថា ជំងឺពិតប្រាកដគឺភាពភ័យខ្លាច មិនមែនជាជំងឺកូរ៉ូណានោះទេ។ ការអនុញ្ញតឲ្យចូលនេះបង្ហាញពីការលុបបំបាត់នូវជំងឺភ័យខ្លាច ដែលកំពុងកើតមាននៅលើពិភពលោកយើងនេះ ហើយកម្ពុជាគ្មានឡើយការរើសអើងពូជសាសន៍ ត្រូវតែចូលរួមសង្រ្គោះក្នុងកិច្ចការមនុស្សធម៌ ខណៈពួកគេកំពុងជួបគ្រោះអាសន្ន»។
ការសម្រេចរបស់រដ្ឋាភិបាលកម្ពុជា ដែលអនុញាតឱ្យនាវាដឹកអ្នកដំណើរមួយរបស់សហរដ្ឋអាមេរិកឈ្មោះ Westerdam ចូលចតនៅកំពង់ផែកម្ពុជានេះ ធ្វើឡើងបន្ទាប់ពីប្រទេសចំនួន៥បានបដិសេធការសុំចូលចតរបស់ក្រុមហ៊ុនទេសចរណ៍។ ប្រទេសទាំង៥ដែលបានបដិសេធនោះ រួមមាន ថៃ ជប៉ុន កោះតៃវ៉ាន់ កោះ ហ្គាំ និងហ្វីលីពីន។ ការបដិសេធដោយសារពួកគេភ័យខ្លាចថា មានអ្នកដំណើរនៅលើនាវានោះ អាចមានកូរ៉ូណាវីរុសប្រភេទថ្មី (COVID-19) ។នាវាដឹកអ្នកដំណើរនេះ បានអះអាងថា គ្មានអ្នកដំំណើរឈឺលើនាវានោះទេ ។នេះបើតាមសេចក្តីប្រកាសព័ត៌មានរបស់ក្រុមហ៊ុន Holland America Line ដែលជាម្ចាស់នាវា នៅថ្ងៃពុធ ១២ ខែកុម្ភៈ៕