អន្តរជាតិ
Westerdam៖ ថៃសុំបញ្ជីឈ្មោះអ្នកដំណើរដែលចង់ឆ្លងកាត់ទឹកដីខ្លួនពេលចេញពីកម្ពុជា លោកមេបញ្ជាការនៃប៉ូលិសអន្តោប្រវេសន៍កងពលទី៣ Archayon Kraithong (AFP&The Nation)
× ប៉ូលិសអន្តោប្រវេសន៍ថៃ កំពុងតាមដាន និងសម្របសម្រួលយ៉ាងជិតស្និទ្ធជាមួយរដ្ឋាភិបាលកម្ពុជា ពាក់ព័ន្ធរឿងនាវាទេសចរណ៍ «Westerdam» ដែលនៅក្បែរកំពង់ផែក្រុងព្រះសីហនុ ប្រទេស កម្ពុជា កាលពីថ្ងៃ ១៣ ខែកុម្ភៈ ។ លោកមេបញ្ជាការនៃប៉ូលិសអន្តោប្រវេសន៍កងពលទី៣ Archayon Kraithong លើកឡើងបែបនេះ ដោយដោយស្រង់ចុះផ្សាយដោយសារព័ត៌មានថៃ The Nation ។
«គិតត្រឹមម៉ោង១០ព្រឹកនេះ នាវាទេសចរណ៍នេះ ស្ថិតលើផ្ទៃទឹកនៅឡើយ ខណៈបុគ្គលិកវេជ្ជសាស្ត្រ បានចូលទៅក្នុងនាវានេះ ដើម្បីត្រួតពិនិត្យព្រមទាំងថតមើលអ្នកដំណើរ និងអ្នកបម្រើលើយន្តហោះ ប្រសិនបើវាមានអ្នកឆ្លងឬយ៉ាងណានោះ»។ លោក Archayon លើកឡើងបែបនេះ ដោយបន្ថែមថា កាលណាដំណើរការថតមើលនេះ គឺបញ្ចប់នោះ អ្នកដំណើរនិងអ្នកបម្រើលើនាវា Westerdam នេះ នឹងត្រូវដំណើរការពីសំណាក់អាជ្ញាធរកម្ពុជា ដោយអនុលោមតាមបទបញ្ញាត្តិអន្តោប្រវេសន៍។
តាមសារព័ត៌មានថៃ The Nation លោក Archayon បញ្ជាក់បន្ថែមទៀតថា អ្នកដំណើរនិងអ្នកបម្រើដែលបានឆ្លងកាត់ការថតមើល និងដំណើរការអន្តោប្រវេសន៍ គួរអាចអនុញ្ញាតឲ្យធ្វើដំណើរទៅកាន់បណ្តាប្រទេសដទៃទៀត រួមមានប្រទេសថៃផងដែរ ក្នុងគោលដៅជិះយន្តហោះទៅមាតុភូមិពួកគេវិញ។
«យើង បានស្នើសុំទៅកាន់រដ្ឋាភិបាលកម្ពុជាដើម្បីបញ្ជូនបញ្ជីឈ្មោះអ្នកដំណើរទាំងឡាយណា ដែលចង់ចូលមកកាន់ប្រទេសថៃ ក៏ដូចជាលទ្ធផលត្រួតពិនិត្យសុខភាពពួកគេផងដែរ»។ លោក Archayon បញ្ជាក់បែបនេះ។
ម្យ៉ាងវិញទៀត លោក អះអាងថា រដ្ឋាភិបាលថៃ ក៏បានដាក់ពង្រាយបុគ្គលិកវេជ្ជសាស្ត្រពីក្រសួងសុខភាពសាធារណៈថៃ នៅគ្រប់កន្លែងត្រួតពិនិត្យព្រំដែនជាប់កម្ពុជាទាំងអស់ដើម្បីថតមើលអ្នកដំណើរមកពីនាវាទេសចរណ៍ Westerdam ម្តងទៀត មុនពេលពួកគេ ចូលមកប្រទេសថៃ។
សូមបញ្ជាក់ថា ប្រទេសថៃ បានបដិសេធចូលចតពីសំណាក់នាវាទេសចរណ៍ Westerdam ដោយបារម្ភពីជំងឺផ្លូវដង្ហើមបង្កឡើងដោយកូរ៉ូណាវីរុសប្រភេទថ្មី (COVID-19) ។ មនុស្សនៅលើនាវានោះ មានជាង២២០០នាក់ ក្នុងនោះអ្នកដំណើរ១៤៥៥នាក់ មានជាង៤០សញ្ជាតិ និងបុគ្គលិកបម្រើការងារតាមផ្នែកលើនាវា ៨០២នាក់។ អ្នកទេសចរដែលច្រើនជាងគេមាន អាមេរិកមាន៦៥១នាក់ កាណាដា ២៧១នាក់ អង់គ្លេស ១២៧នាក់ ហូឡង់៩១នាក់ អូស្ត្រាលី៧៩នាក់ អាល្លឺម៉ង់៥៧នាក់...។ រដ្ឋាភិបាលកម្ពុជា បានសម្រេចឱ្យនាវាទេសចរណ៍នេះចូលចតនៅកំពង់ផែស្វយ័តខេត្តព្រះសីហនុ នៅថ្ងៃទី១៣ កុម្ភៈនេះ ក្រោយពីប្រទេស និងកោះចំនួន៥ បានបដិសេធលើការស្នើសុំចតរបស់ក្រុមហ៊ុន Holland America Line៕
Tag:
ថៃ
កម្ពុជា
កូរ៉ូណាវីរុស
COVID19
© រក្សាសិទ្ធិដោយ thmeythmey.com