អន្តរជាតិ
COVID-19៖ វៀតណាមបិទច្រកចេញចូលមួយនៅឃុំមួយដែលមានមនុស្ស១ម៉ឺននាក់ ប៉ូលិសវៀតណាមពាក់ម៉ាស់ការពារ ឈរនៅកន្លែងត្រួតពិនិត្យក្នុងឃុំ Son Loi ខេត្ត Vin Phuc ប្រទេសវៀតណាម កាលពីថ្ងៃ ១៣ កុម្ភៈ ឆ្នាំ២០២០ (AFP)
× ឃុំមួយក្នុងប្រទេសវៀតណាមដែលមានមនុស្សរស់នៅ១ម៉ឺននាក់ ត្រូវបានដាក់ឲ្យនៅដាច់ដោយឡែក (វិធានចត្តាឡីស័ក) នៅថ្ងៃព្រហស្បតិ៍ ទី១៣ ខែកុម្ភៈ ក្រោយបានរកឃើញករណីឆ្លងកូរ៉ូណាវីរុសប្រភេទថ្មី (COVID-19) ៦នាក់នៅទីនោះ។ អាជ្ញាធរសុខាភិបាលវៀតណាម បញ្ជាក់បែបនេះ។
សម្រាប់ការបិទច្រកចេញចូលឃុំ Son loi នៃខេត្ត Vinh Phuc ដែលមានចម្ងាយ ៤០ គីឡូម៉ែត្រពីរដ្ឋធានីហាណូយ គឺជាដាក់ឲ្យនៅដាច់ដោយឡែកទ្រង់ទ្រាយធំលើកដំបូង នៅក្រៅប្រទេសចិន ចាប់តាំងពីជំងឺផ្លូវដង្ហើមបង្កដោយកូរ៉ូណាវីរុសប្រភេទថ្មី (COVID-19) បានផ្ទុះរីករាលដាលពីក្រុងវូហាន ភាគកណ្ដាលនៃប្រទេសចិន កាលពីចុងឆ្នាំ២០១៩។
«គិតត្រឹមថ្ងៃ ១៣ ខែកុម្ភៈ ឆ្នាំ២០២០ យើង នឹងអនុវត្តជាបន្ទាន់កិច្ចការដាក់ឲ្យនៅឯកោ និងដាច់ដោយឡែកនៃតំបន់ផ្ទុះការរាលដាលក្នុងឃុំ Son Loi»។ នេះបើតាមសេចក្តីថ្លែងការណ៍របស់ក្រសួងសុខាភិបាលវៀតណាម ដោយដកស្រង់ចុះផ្សាយដោយទីភ្នាក់ងារ AFP ។ ក្រសួងសង្កត់ធ្ងន់ថា ការដាក់ឲ្យនៅដាច់ដោយឡែក គឺមានរយៈពេល ២០ ថ្ងៃ។
ឃុំ Son Loi គឺជាតំបន់សម្បូរទៅដោយពលរដ្ឋវៀតណាមធ្វើចម្ការ។ កន្លងទៅ ក្រសួងសុខាភិបាលវៀតណាម បានអះអាងថា មនុស្ស៥នាក់ក្នុងឃុំដែលនៅក្បែររដ្ឋធានីវៀតណាមមួយនេះ បានឆ្លងកូរ៉ូណាវីរុសប្រភេទថ្មី (COVID-19) ហើយនៅថ្ងៃព្រហស្បតិ៍នេះ បានរកឃើញករណីទី ៦ហើយ។ ទន្ទឹមនេះ អាជ្ញាធរតំបន់ បានបង្កើតកន្លែងត្រួតពិនិត្យនៅជុំវិញឃុំនេះ។ នេះបើតាមអ្នករាយការណ៍ព័ត៌មាន AFP ហើយមើលឃើញថា មន្ត្រីសុខាភិបាលដែលពាក់សម្លៀកបំពាក់ការពារ បានបាញ់ Spray សម្លាប់មេរោគលើយានយន្តនៅពេលឆ្លងកាត់កន្លែងត្រួតពិនិត្យ។
សូមបញ្ជាក់ថា គិតមកត្រឹមពេលនេះ មនុស្សជាង ១៣៥០នាក់ហើយ បានស្លាប់ក្នុងប្រទេសចិន ដោយសារជំងឺផ្លូវដង្ហើមបង្កឡើងដោយកូរ៉ូណាវីរុសប្រភេទថ្មី (COVID-19) ហើយជិត៦ម៉ឺននាក់បានឆ្លងវីរុសនេះ៕
Tag:
វៀតណាម
កូរ៉ូណាវីរុស
COVID19
© រក្សាសិទ្ធិដោយ thmeythmey.com