អន្តរជាតិ
រដ្ឋមន្រ្តីការបរទេសចិន វ៉ាង យី (រាប់ពីស្ដាំទី៣) និងរដ្ឋមន្រ្តីការបរទេសមកពីតំបន់អាស៊ាននាជំនួបកន្លងមក។ រូបភាព AFP
×![]()
ដោយ: តន ចាន់រិទ្ធារ៉ា
ប្រមុខការទូតអាស៊ាន និងចិន នឹងជួបជុំគ្នានៅទីក្រុងវៀងចន្ទន៍នៅសប្ដាហ៍ក្រោយដើម្បីជជែកពីការរាលដាល COVID-19 ក្នុងតំបន់។ បច្ចុប្បន្ន ប្រទេសតំបន់អាស៊ីអាគ្នេយ៍ចំនួន៦ មានករណីឆ្លងកូរ៉ូណាវីរុស ខណៈហ្វីលីពីនជាប្រទេសតែមួយគត់ក្នុងតំបន់ដែលករណីស្លាប់ដោយសារវីរុសនេះ ស្របពេលដែលចំនួនអ្នកស្លាប់នៅចិនបន្តកើនឡើងរាល់ថ្ងៃ បើទោះជារដ្ឋាភិបាលទីក្រុងប៉េកាំងចាត់វិធានការបន្ទាន់ជាបន្តបន្ទាប់ក្ដី។
កិច្ចប្រជុំពិសេសរដ្ឋមន្ត្រីការបរទេសអាស៊ាន-ចិន នឹងឡើងនៅរដ្ឋធានីវៀងចន្ទន៍ ស្របគ្នានឹងជំនួបរដ្ឋមន្ត្រីការបរទេសមេគង្គ-ឡានឆាង ដែលធ្វើឡើងពីថ្ងៃទី១៩ដល់ទី២០ ខែកុម្ភៈ។ កិច្ចប្រជុំពិសេសនេះ នឹងផ្ដោតលើបញ្ហាជំងឺ COVID-19 ដែលក្លាយជាបញ្ហាប្រឈមផ្នែកសុខាភិបាលក្នុងតំបន់ ក៏ដូចជាពិភពលោកទាំងមូលផងដែរ។
ប្រមុខការទូតអាស៊ាន និងចិន នឹងជជែក និងផ្លាស់ប្ដូរយោបល់ដើម្បីរកមធ្យោបាយ និងរបៀបថ្មីៗដែលមានប្រសិទ្ធភាពដើម្បីប្រយុទ្ធកូរ៉ូណាវីរុស។ បើតាមការប្រកាសព័ត៌មានរបស់ក្រសួងការបរទេសកម្ពុជានៅថ្ងៃទី១៥ ខែកុម្ភៈ។
គិតត្រឹមថ្ងៃទី១៥ ខែកុម្ភៈ អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មីឡើងដល់១៥២៣នាក់ហើយ។ តួលេខអ្នកជំងឺកើនឡើងដល់ប្រមាណ៦៧ ០០០នាក់ នៅប្រទេសចំនួន២៦ ដោយភាគច្រើនបំផុតនៅចិន ជាពិសេសនៅក្រុងវូហានដែលជាកន្លែងផ្ទុះជំងឺ។ អ្នកជំងឺជាង១០០០០នាក់ ត្រូវបានរាយការណ៍ថា ស្ថិតក្នុងស្ថានភាពគ្រោះថ្នាក់ រីឯប្រមាណ៧៧០០នាក់ បានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។
នៅតំបន់អាស៊ាន កម្ពុជា វៀតណាម សិង្ហបុរី ម៉ាឡេស៊ី ហ្វីលីពីន និងថៃ ជាប្រទេសដែលមានករណីឆ្លង COVID-19 នេះ។ សិង្ហបុរី ជាប្រទេសមានករណីឆ្លងច្រើនជាងគេ ខណៈករណីឆ្លងនៅកម្ពុជាដែលមានមួយនោះ បានសះស្បើយទៅហើយ។ ឥណ្ឌូណេស៊ី ព្រុយណេ ឡាវ និងមីយ៉ាន់ម៉ា ជារដ្ឋសមាជិកដែលមិនទាន់ការរាយការណ៍ពីករណីឆ្លងសូម្បីតែមួយ។
ប្រទេសដទៃទៀតដែលមានករណី COVID-19 នេះដែរមាន ជប៉ុន (បញ្ចូលទាំងអ្នកជំងឺនៅលើនាវាទេសចរណ៍ Diamond Princess) កូរ៉េខាងត្បូង អូស្ត្រាលី បារាំង សហរដ្ឋអាមេរិក អាល្លឺម៉ង់ អេមីរ៉ាតអារ៉ាប់រួម កាណាដា អ៊ីតាលី រុស្ស៊ី ចក្រភពអង់គ្លេស ហ្វាំងឡង់ ឥណ្ឌា ណេប៉ាល់ ស្រីលង្កា ស៊ុយអែត អេស្ប៉ាញ បែលហ្ស៊ិក និងអេហ្ស៊ីបដែលទើបរកឃើញថ្មីៗ៕
Tag:
ចិន
អាស៊ាន
COVID19
© រក្សាសិទ្ធិដោយ thmeythmey.com
