អន្តរជាតិ
ចិន ប្រើឱសថបុរាណដើម្បីព្យាបាលជំងឺ COVID-19 រូបភាព Xinhua
× នៅថ្ងៃទី១៥ ខែកុម្ភៈនេះ ចិននិយាយថា ខ្លួនបានប្រើប្រាស់ឱសថបុរាណចិនលើអ្នកជំងឺផ្លូវដង្ហើមដែលបង្កដោយកូរ៉ូណាវីរុសប្រភេទថ្មី។ មន្ត្រីជាន់ខ្ពស់សុខាភិបាលចិន លោក Wang Hesheng និយាយថា ការប្រើប្រាស់ថ្នាំបុរាណ ត្រូវអនុវត្តលើអ្នកជំងឺច្រើនជាងពាក់កណ្ដាលដើម្បីកាត់បន្ថយអត្រាមរណភាពឲ្យបានទាបបំផុត។ ឱសថបុរាណចិន ក៏ត្រូវប្រើលាយជាមួយថ្នាំពេទ្យសម័យបច្ចុប្បន្នដើម្បីទប់ស្កាត់ការរាលដាលវីរុសផងដែរ។
ទោះពឹងផ្អែកលើថ្នាំពេទ្យសម័យទំនើបដើម្បីព្យាបាល COVID-19 ក្ដី ចិនក៏មិនភ្លេចប្រើឱសថបុរាណរបស់ខ្លួនដែរ។ លោក Wang Hesheng អនុប្រធានគណៈកម្មការសុខាភិបាលជាតិចិន និយាយក្នុងសន្និសីទសារព័ត៌មានថ្ងៃទី១៥ ខែកុម្ភៈថា ឱសថបុរាណ ត្រូវបានប្រើប្រាស់លើអ្នកដែលត្រូវបញ្ជាក់ថា ឆ្លងកូរ៉ូណាវីរុសប្រភេទថ្មីក្នុងខេត្តហ៊ូប៉ី ដែលទីក្រុងវូហាននៃខេត្តនេះ ជាទីតាំងផ្ទុះករណីកូរ៉ូណាវីរុសនេះដំបូងគេបំផុត។
លោក Wang ដែលទើបតែងតាំងឲ្យទទួលបន្ទុកកិច្ចការសុខាភិបាលប្រចាំខេត្តហ៊ូប៉ីនាពេលថ្មីៗនេះ បន្ថែមថា តាំងពីផ្ទុះករណីឆ្លងកូរ៉ូណាវីរុសមក រដ្ឋាភិបាល បានផ្ដោតសំខាន់លើការប្រើប្រាស់ថ្នាំបុរាណរបស់ចិន និងថ្នាំរបស់លោកខាងលិច។ លោកបន្តថា ចិនបានប្រមូលអ្នកស្រាវជ្រាវ និងថ្នាំពូកែៗទាំងប្រភេទថ្នាំបុរាណ និងថ្នាំបស្ចិមប្រទេសដើម្បីយកទៅព្យាបាលអ្នកជំងឺ ព្រោះការបញ្ចូលគ្នារវាងថ្នាំទាំងពីរ ដើរតួនាសំខាន់ក្នុងការប្រយុទ្ធប្រឆាំងវីរុស។
បើតាមទីភ្នាក់ងារព័ត៌មានរដ្ឋចិន Xinhua សាកលវិទ្យាល័យ និងមន្ទីរពេទ្យផ្នែកឱសថបុរាណ បានបញ្ជូនបុគ្គលិករបស់ខ្លួនប្រមាណ២,២២០នាក់ទៅកាន់ខេត្តហ៊ូប៉ីដើម្បីទប់ទល់ករណីរាលដាលកូរ៉ូណាវីរុស។ មិនមែនតែប្រើក្នុងការព្យាបាលឡើយ លោក Wang បញ្ជាក់ដែរថា ឱសថបុរាណ ក៏ត្រូវបានប្រើប្រាស់លើការទប់ស្កាត់ និងគ្រប់គ្រងវីរុសប្រភេទថ្មីនៅកម្រិតសហគមន៍ផងដែរ។
«តាមរយៈការបញ្ចូលគ្នារវាងធនធានឱសថបុរាណចិន និងថ្នាំបស្ចិមប្រទេស ចិនព្យាយាមបង្កើនអត្រាព្យាបាលអ្នកជំងឺ និងកាត់បន្ថយអត្រាមរណភាពឲ្យបានច្រើនបំផុតតាមតែអាចធ្វើបាន សំដៅការពារសុវត្ថិភាព និងសុខភាពប្រជាជន។» នេះជាការបន្ថែមលោក Wang ។
សូមបញ្ជាក់ថា បើគិតត្រឹមថ្ងៃទី១៥ ខែកុម្ភៈ ចំនួនអ្នកស្លាប់ដោយសារ COVID-19 មានចំនួន១៥២៣នាក់នៅទូទាំងពិភពលោក ខណៈអ្នកឆ្លងកើនឡើងដល់ប្រមាណ៦៧ ០០០នាក់ នៅប្រទេសចំនួន២៦ ដោយភាគច្រើនបំផុតនៅចិន ជាពិសេសនៅក្រុងវូហានដែលជាកន្លែងផ្ទុះជំងឺ។ អ្នកជំងឺជាង១ម៉ឺននាក់ ត្រូវបានរាយការណ៍ថា ស្ថិតក្នុងស្ថានភាពគ្រោះថ្នាក់។ ចំនួនអ្នកឆ្លងថ្មីៗ បានបន្តថយចុះ ស្របពេលមនុស្សប្រមាណ៧៧០០នាក់ បានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ៕
© រក្សាសិទ្ធិដោយ thmeythmey.com