ជាតិ
«ឃ្មុំចង្អេរ» ឬ «ឃ្មុំយក្ស» មានប្រវែងជិត២ម៉ែត្រ និងមានទឹកឃ្មុំពី៨ ទៅ ១០លីត្រ
× សៀមរាប៖ ឃ្មុំចង្អេរ ឬ ឃ្មុំយក្ស គឺជាប្រភេទឃ្មុំធំជាងគេលំដាប់ទីពីរ ក្នុងពិភពលោក ដែលមានប្រវែងរហូតដល់ ២ម៉ែត្រ។ លោក ពាង ឆុញ អ្នកប្រកបមុខរបររកឃ្មុំក្នុងព្រៃអស់រយៈពេលជាង៤០ឆ្នាំមកហើយ នៅក្នុងខេត្តសៀមរាប បានអះអាងថា ឃ្មុំប្រភេទនេះ មានក្បាលទឹកប្រវែង០,៨ម៉ែត្រ ដែលអាចផ្តល់បរិមាណទឹកឃ្មុំសុទ្ធចន្លោះពី៨លីត្រកន្លះ ទៅ១០លីត្រ ក្នុងការយកទឹកឃ្មុំមួយម្តងៗ។
អ្នកជំនាញយកឃ្មុំព្រៃ ក្នុងភូមិត្បែងខាងត្បូង ឃ្មុំត្បែង ស្រុកបន្ទាយស្រី ខេត្តសៀមរាប រូបនេះ បានប្រាប់សារព័ត៌មានThmeyThmey25 យ៉ាងខ្លីថា ឃ្មុំប្រភេទនេះ មានរយៈពេល២៦ថ្ងៃ ដោយរាប់ចាប់ពីថ្ងៃបង្កើតសំបុកទើបអាចប្រមូលទឹកបានច្រើនដូច្នេះ។ លោក ពាង ឆុញ បានអះអាងថា៖«ឃ្មុំប្រភេទនេះមួយសំបុក យើងអាចយកក្បាលទឹកឃ្មុំបានតែពីរដងប៉ុណ្ណោះ។ បន្ទាប់ពីយើងបានយកក្បាលទឹលកឬទឹកឃ្មុំបានពីរដងរួចហើយ ឃ្មុំទាំងនោះ នឹងហើរចេញពីសំបុកចាស់ ដោយទៅបង្កើតសំបុកថ្មីទៀត»។
បើតាមការសិក្សាស្រាវជ្រាវ របស់លោក អេរិក ហ្គឺរីន(លោក Eric Guerin) អ្នកជីវវិទូជនជាតិបារាំង និងជាអ្នកជំនាញអភិរក្សនិងចិញ្ចឹមសត្វឃ្មុំនិរន្តរភាព ឃ្មុំចង្អេរនេះ គឺរស់នៅតែក្នុងព្រៃធំៗប៉ុណ្ណោះ ហើយមានសមត្ថភាពហោះហើររកចំណីបាន២០០គីឡូម៉ែត្រជុំវិញសំបុកឃ្មុំ។ ការស្រាវជ្រាវដដែលបានបញ្ជាក់ថាជនៅក្នុងសំបុកឃ្មុំចង្អេរនីមួយៗ គឺមានសត្វឃ្មុំរហូតដល់៥០ម៉ឺនក្បាល៕
ឃ្មុំចង្អេរ នៅក្នុងព្រៃជប់មួយកន្លែង ក្នុងភូមិត្បែង ឃ្មុំត្បែង ស្រុកបន្ទាយស្រី ខេត្តសៀមរាប។
លោក ពាង ឆុង អ្នកយកឃ្មុំព្រៃអស់ជាំង៤០ឆ្នាំ ក្នុងស្រុកបន្ទាយស្រី ខេត្តសៀមរាប។
© រក្សាសិទ្ធិដោយ thmeythmey.com