ជាតិ
បទយកការណ៍ / បទសម្ភាសន៍
កសិករ ស្តើង ងិ នៅស្រុកអង្គរធំ រកបានចំណូលជាង៥លានរៀលពីដំណាំពោតរៀងរាល់រដូវ
× សៀមរាប៖ លោក ស្ដើង ងិ ជាកសិករមួយរូបរស់នៅភូមិតាប្រុក ឃុំលាងដៃ ស្រុកអង្គរធំ ខេត្តសៀមរាប។ សព្វថ្ងៃ ក្រោយពីប្រមូលកសិផលស្រូវរួច លោក ងិ ប្រើប្រាស់ដីស្រែរបស់លោកសម្រាប់ដាំពោតបន្ត។ ក្នុងមួយឆ្នាំ ដីស្រែទំហំប្រមាណកន្លះហិកតានេះអាចដាំពោតបាន២ដងក្នុងមួយឆ្នាំ ហើយពេលដាំម្ដងៗអាចឱ្យលោក ងិ រកប្រាក់បានជាមធ្យមជាង៥លានរៀល។
ព័ត៌មានលម្អិត សូមស្ដាប់សម្ភាសរវាងអ្នកនាង អ៊ីសា រ៉ហានី នៃសារព័ត៌មានថ្មីៗ ជាមួយលោក ស្ដើង ងិ កសិករដាំពោតឃុំលាងដៃ ដូចតទៅ៖
គ្រួសារលោក ងិ មិនមានពេលវេលាសម្រាកច្រើនទេ ជារួមក្រោយប្រមូលផលស្រូវហើយ គ្រួសារនេះមានរបរសំខាន់មួយទៀត គឺដាំពោត។ លោក ងិ មានដីសម្រាប់ដាំពោតទាំងពីររដូវ។ ខែវស្សាលោក ងិ មានដីទួលមួយកន្លែងទំហំប្រមាណកន្លះហិកតា ដែលអាចដាំពោតបាន៣ដង រីឯផ្ទៃដីទំហំប៉ុនគ្នានេះមួយកន្លែងទៀតដែលជាដីស្រែ ដែលអាចឱ្យលោក ងិ ដាំដុះពោតក្នុងរដូវប្រាំងបាន២លើកផងដែរ។
ក្នុងចម្ការពោតរបស់លោក ងិ គឺដាំដុះឆ្លាស់ពីមួយកំណាត់ទៅមួយកំណាត់។ កំណាត់ពោតខ្លះជិតប្រមូលផល មួយកំណាត់ខ្លះទៀតទើបចេញផ្កែ និងខ្លះទៀតទើបកម្ពស់ត្រឹមជង្គង់ក៏មាន។ ការដាំរបៀបនេះ គឺងាយស្រួលពេលកាច់ បង្ការកាច់មិនទាន់លក់ អាចចាស់ជ្រុល រីឯទីផ្សារក៏មិនសូវជាន់គ្នាជាដើម។ នេះជាការលើកឡើងរបស់លោក ងិ។
សម្រាប់ទីផ្សារវិញ ជាមធ្យមពោតមួយដែលស្ងោររួចអាចលក់បាន១ពាន់រៀល។ ក្នុងនោះពោតលោក ងិ ក៏លក់បោះដុំឱ្យម៉ូយបន្តដែរ ដែលក្នុងមួយផ្នូន(៤៤ផ្លែ) លក់បាន២៨០០០រៀល ទៅ៣ម៉ឺនរៀល។ សម្រាប់លោក ងិ របរនេះមិនសូវនឿយហត់ច្រើនទេ អាចរកចំណូលបានស្រួល មានទីផ្សារល្អ ពិសេសលោកអាចមានពេលសម្រាប់ចិញ្ចឹមគោ និងជ្រូកនៅផ្ទះបានទៀត៕
Tag:
ពោត
ឃុំលាងដៃ
កសិកម្ម
© រក្សាសិទ្ធិដោយ thmeythmey.com