Manchester United ឡើងទៅកៀកនឹងការប្រជែងយកកៅអី Champions League ជាថ្មីបន្ទាប់ពីយកឈ្នះ Chelsea យ៉ាងចម្រូងចម្រាសដោយលទ្ធផល ២-០ ក្នុងជំនួប Premier League នៅរាត្រីថ្ងៃទី១៧ ខែកុម្ភៈ។ ក្រុមដែលដឹកនាំដោយអ្នកចាត់ការ Frank Lampard ហាក់ស្ថិតក្នុងភាពអយុត្តិធម៌តាមរយៈការសម្រេចរបស់វីដេអូជំនួយការអាជ្ញាកណ្តាល (VAR) ក្នុងជំនួបនេះ។
ជ័យជម្នះនេះបាននាំក្រុមបិសាចក្រហមឡើងទៅឈរចំណាត់ថ្នាក់ទី៧បណ្តោះអាសន្ន ដោយតាមពីក្រោយក្រុមតោខៀវដែលនៅលេខរៀងទី៤ ចំនួន៣ពិន្ទុ។ ពីរគ្រាប់របស់ក្រុមភ្ញៀវ Man Utd សម្រេចបានដោយខ្សែប្រយុទ្ធ Anthony Martial និងខ្សែការពារ Harry Maguire នៅទីលាន Stamford Bridge។
Martial ធ្វើបានគ្រាប់ទី១នៅចុងតង់ទីមួយ តាមរយៈការបញ្ជូនរបស់ខ្សែការពារ Aaron Wan-Bissaka ពីស្លាបខាងស្តាំ ខណៈប្រធានក្រុម Maguire រកគ្រាប់ទី២ដោយការតែតបញ្ចូលទីពីការទាត់បាល់ពីជ្រុងរបស់សមាជិកថ្មី Bruno Fernandes នៅនាទី៦៦។
យ៉ាងណាក៏ដោយ ក្នុងជំនួបនេះម្ចាស់ផ្ទះ Chelsea ហាក់សម្តែងការមិនពេញចិត្តពីការសម្រេចរបស់ VAR ឡើយ។ Maguire បានយកជើងទៅរុញខ្សែប្រយុទ្ធ Michy Batshuayi តែបែរជារួចផុតពីការពិន័យ បើទោះទទួលការពិនិត្យពី VAR ក៏ដោយ។
ឱកាសរកគ្រាប់បាល់របស់ខ្សែការពារ Kurt Zouma ដែលបានទាត់បញ្ចូលទីក្រុម Man Utd ទៅហើយ បែជាអាជ្ញាកណ្តាលមិនឲ្យ ក្រោយពិនិត្យជាថ្មីដោយវីដេអូជំនួយការអាជ្ញាកណ្តាលឃើញថា Cesar Azpilicueta បានរុញ Brandon Williams។
ក្រុមរបស់លោក Lampard ដែលមានឱកាសរកគ្រាប់ជាច្រើនទៀត សុទ្ធតែទទួលត្រឹមការខកចិត្តប៉ុណ្ណោះ ក្រោយការពិនិត្យឡើងវិញរបស់ VAR។
បរាជ័យនេះបានឲ្យ Chelsea នៅរក្សាចំណាត់ថ្នាក់ទី៤ ក្នុងតារាងលីគកំពូលអង់គ្លេស ដោយរកបាន៤១ពិន្ទុ តែលើស Tottenham Hotspur ដែលឈរលេខ៥ តែ១ពិន្ទុប៉ុណ្ណោះ។ Sheffield United ក៏បង្ហាញភាពខ្លាំងក្នុងការប្រជែងយកកៅអីតំបន់អឺរ៉ុបដែរ ដោយរកបាន៣៩ពិន្ទុពីការប្រកួត២៦លើក ឈរលេខរៀងទី៦ ខណៈ Man Utd នៅលេខ៧ មាន៣៨ពិន្ទុ។
West Ham United, Watford និង Norwich City ស្ថិតនៅតំបន់ត្រូវកាត់ចោល។
មួយវិញទៀត ប្រសិនបើ Manchester City ពិតជាមិនអាចលេង Champions League ចាប់ពីរដូវកាលក្រោយហើយពួកគេបញ្ចប់ទៅក្នុងចំណាត់ថ្នាក់ Top4 នោះក្រុមលេខ៥នឹងអាចជំនួសកៅអីរបស់ក្រុមរហស្សនាមមេឃខៀវនេះវិញ៕