ជាតិ
ទូតអាមេរិកលើកឡើងពីកិច្ចសហការដ៏រលូនក្នុងបេសកកម្មជួយដល់អ្នកជិះ Westerdam
× ឯកអគ្គរដ្ឋទូតសហរដ្ឋអាមេរិក លោក W.Patrick Murphy តាមរយៈ Twitter របស់ខ្លួន បានលើកឡើងពីការសហការដ៏រលូនរវាងស្ថានទូតជាមួយរដ្ឋាភិបាលកម្ពុជាក្នុងការជួយដល់អ្នកដំណើរលើនាវា Westerdam ឲ្យពួកគេទៅកាន់ប្រទេសកំណើតវិញជាបន្តបន្ទាប់។
លោក W. Patrick Murphy ក៏បានទៅកាន់ទីតាំងទីសំចតនាវា Westerdam នៅផែព្រះសីហនុដោយផ្ទាល់ផងដែរកាលពីថ្ងៃទី១៥ ខែកុម្ភៈ ពោលគឺមួយថ្ងៃបន្ទាប់ពីសម្តេចនាយករដ្ឋមន្ត្រី ហ៊ុន សែន បានទៅស្វាគមន៍អ្នកដំណើរ និងបុគ្គលិកនាវាជាង២០០០នាក់ ដែលមានទីសំចត ក្រោយតែលតោលលើសមុទ្រអស់រយៈពេល២សប្តាហ៍។
នាជំនួបជាមួយសម្តេច ហ៊ុន សែន នៅល្ងាចថ្ងៃអង្គារ ទី១៨ ខែកុម្ភៈ នេះ លោក Murphy បានអះអាងពីបន្តកិច្ចសហការសម្របសម្រួលក្នុងការជួយដល់អ្នកដំណើរ Westerdam ឲ្យដល់ប្រទេសរបស់ខ្លួនវិញ ដែលក្នុងនោះមានពលរដ្ឋអាមេរិកជាង៦០០នាក់ផងដែរ។
«កិច្ចសហប្រតិបត្តិការយូរអង្វែងលើវិស័យសុខភាពសាធារណៈពិតជាមានសារសំខាន់ណាស់ ខណៈដែលយើងកំពុងប្រឈមបញ្ហា COVID-19 ជាសកល»។ នេះជាការបញ្ជាក់របស់លោក Murphy ក្រោយលើកឡើងថា សុវត្ថិភាព និងសន្តិសុខជនជាតិអាមេរិកនៅកម្ពុជា គឺជាការងារអាទិភាពរបស់ស្ថានទូត។
ជាមួយគ្នានេះ ភាគីទាំងពីរក៏បានពិភាក្សាគ្នាពីកិច្ចប្រជុំពិសេសខាងពេលខាងមុខរវាងអាស៊ាន និងអាមេរិក នៅរដ្ឋ Nevada ផងដែរ ដែលនេះជាជំហានលើកកម្ពស់កិច្ចសហប្រតិបត្តិការបន្ថែមរវាងប្រទេស និងប្រជាជនទាំងពីរ៕
Tag:
WHO
កូរ៉ូណាវីរុស
COVID-19
© រក្សាសិទ្ធិដោយ thmeythmey.com