ភ្នំពេញ៖ អង្គការសម្ព័ន្ធខ្មែរជំនឿន និងការពារសិទ្ធិមនុស្ស (លីកាដូ) បានស្នើឲ្យអជ្ញាធរស៊ើបអង្កេតលើករណីទារកអាយុ៥ខែម្នាក់ ដែលបានស្លាប់ កាលពីថ្ងៃទី២៦ ខែមករា ឆ្នាំ២០២០ បន្ទាប់ពីបញ្ជូនចេញពីក្នុងមណ្ឌលអប់រំកែប្រែទី២ (ព្រៃស) ទៅព្យាបាលនៅមន្ទីរពេទ្យ។ ការធ្វើកោសល្យវិច័យសាកសព រកឃើញថា ទារកនោះ ស្លាប់ដោយសារជំងឺរលាកសួត និងកង្វះអាហារូបត្ថម្ភ។ ប៉ុន្តែបើតាមលោក អំ សំអាត នាយករងកម្មវិធីឃ្លាំមើលសិទ្ធិមនុស្សនៃអង្គការលីកាដូ អះអាងថា ទារកនោះ បានបាក់ឆ្អឹងភ្លៅម្ខាង ដោយមិនដឹងមូលហេតុ និងស្នើឲ្យបង្កើតគោលការណ៍ណែនាំច្បាប់មួយពាក់ព័ន្ធ និងនីតិវិធីសម្រាប់បញ្ជូនកុមារ និងស្ត្រីមានផ្ទៃពោះទៅមន្ទីរពេទ្យ។
លោក អំ សំអាត បានប្រាប់សារព័ត៌មានថ្មីៗតាមទូរស័ព្ទ នៅថ្ងៃទី១៨ ខែកុម្ភៈ ថា កាលពីថ្ងៃទី១៨ ខែកមករា ទារកនោះ បានបាក់ភ្លៅម្ខាងនៅក្នុងមណ្ឌលអប់រំកែប្រែទី២ ទើបបញ្ជូនទៅព្យាបាលនៅមន្ទីរពេទ្យកុមារជាតិ។ ប៉ុន្តែពេទ្យនេះ បានបដិសេធមិនឲ្យស្នាក់នៅ ក្រោមហេតុផលគ្មានបន្ទប់ទំនេរ។
លោក បញ្ជាក់ថា៖«ស្រី្តជាម្ដាយមិនបាននៅក្នុងបន្ទប់នោះទេ លុះពេលឮទារកយំ ក៏ក្រឡេកឃើញស្រី្តម្នាក់ ដែលជាប់ឃុំជាមួយ បីត្រកងទារក។ ករណីបាក់ភ្លៅនេះ នៅមិនទាន់រកមូលហេតុឃើញនៅឡើយទេ»។
លោក បន្តថា លុះដល់ថ្ងៃទី២៥ ខែមករា ទារកនោះ មានស្ថានភាពពិបាកដកដង្ហើម ក៏បានបញ្ជូនទៅមន្ទីរពេទ្យខ្មែរ-សូវៀត ដើម្បីសម្អាតស្លេសនិងថតកាំរស្មីអ៊ិចសួត ហើយសម្រាកនៅមន្ទីរពេទ្យជាមួយម្ដាយមួយយប់។ ដល់ថ្ងៃទី២៦ ខែមករា ទារកនោះ ពិបាកដកដង្ហើមយ៉ាងខ្លាំង ហើយខាងមន្ទីរពេទ្យបញ្ចូនទៅសង្គ្រោះបន្ទាន់ បន្ទាប់មកទារក ក៏បានបាត់បង់ជីវិត។
លោក បន្ថែមថា ការធ្វើកោសល្យវិច័យសាកសពបានបង្ហាញថា ទារកនោះ បានស្លាប់ដោយសារជំងឺរលាកសួត និងកង្វះអាហាររូបត្ថម្ភ។ លោក ស្នើឲ្យមានការស៊ើបអង្កេតលើករណីស្លាប់របស់ទារក និងបង្កើតគោលការណ៍ណែនាំច្បាប់មួយពាក់ព័ន្ធនឹងនីតិវិធីសម្រាប់បញ្ជូនកុមារ និងស្ត្រីមានផ្ទៃពោះទៅមន្ទីរពេទ្យ។
លោក នុត សវនា អគ្គនាយករងនិងជាអ្នកនាំពាក្យនៃអគ្គនាយកដ្ឋានពន្ធនាគារ បានបញ្ជាក់ប្រាប់សារព័ត៌មានថ្មីៗថា សមត្ថកិច្ច កំពុងស្រាវជ្រាវ តែភ្លាមៗនេះ មិនទាន់អាចដឹងថា ការស្លាប់របស់ទារកនេះ មកពីការធ្វេសប្រហែសខាងមណ្ឌលអប់រំកែប្រែ ឬមកពីខាងមន្ទីរពេទ្យនោះទេ។ ប៉ុន្តែកន្លងមកខាងមន្ទីរ បានបដិសេធមិនព្រមទទួលទារកនេះឲ្យសម្រាកព្យាបាលឡើយ។
លោក មានប្រសាសន៍ថា៖«យើងកំពុងតែស្រាវជ្រាវលើករណីហ្នឹង ថាតើជាកំហុសរបស់មន្ត្រីយើង ឬក៏ជាកំហុសខាងមន្ទីរពេទ្យដែលមិនបានយកចិត្តទុកដាក់។ ជាក់ស្ដែងមន្ត្រីយើងបានបញ្ជូនកុមារទៅព្យាបាលហើយ នៅពេលគាត់មានអាការមិនស្រួលហ្នឹង ប៉ុន្តែក្នុងរបាយការណ៍មិនសូវយកចិត្តទុកដាក់ ហើយគាត់បដិសេធមិនទទួល»។
លោក អំ សំអាត និយាយថា ខាងអង្គការលីកាដូ ស្នើឲ្យអាជ្ញាធរ ផ្ដល់ឬបង្កើតគោលការណ៍ណែនាំច្បាប់មួយពាក់ព័ន្ធនឹងសិទ្ធិទទួលបានព័ត៌មានគ្រប់គ្រាន់ខាងផ្លូវច្បាប់និងការស្នើសុំនៅក្រៅឃុំ សិទ្ធិទទួលបានមេធាវី និង សិទ្ធិថែរក្សាទារក ដល់អ្នកជាប់ឃុំ។ ជាពិសេស គឺសិក្សាពីករណីស្លាប់ទារកអាយុ៥ខែនេះ ដើម្បីទប់ស្កាត់កុំឲ្យកើតមានបន្តទៀត។ លើសពីនេះ តុលាការ គួរតែពិចារណាមុនពេលសម្រេចឃុំខ្លួននរណាម្នាក់ លើបទល្មើសដែលគួរតែឃុំខ្លួនបណ្ដោះអាសន្ន ដោយផ្ដោតលើជនងាយរងគ្រោះ ដូចជាស្រី្តមានផ្ទៃពោះ ស្រី្តមានទារក និង អនីតិជន ជាដើម។
សូមបញ្ជាក់ថា បច្ចុប្បន្នមានកុមារជាង១០០នាក់ និងស្រី្តមានផ្ទៃពោះជាង៤០នាក់ កំពុងជាប់ឃុំក្នុងពន្ធនាគារចំនួន១៨។ មណ្ឌលអប់រំកែប្រែទី២ ជាពន្ធនាគារតែមួយគត់នៅកម្ពុជាដែលសាងសង់ឡើងសម្រាប់ដាក់អ្នកទោសជាស្ត្រីនិងកុមារ និងអាចផ្ទុកអ្នកជាប់ឃុំត្រឹមតែ៣៥០នាក់ប៉ុណ្ណោះ។ ប៉ុន្តែបច្ចុប្បន្ន មានអ្នកជាប់ឃុំក្នុងពន្ធនាគារនេះ រហូតដល់១៨៥០នាក់។ នេះបើតាមរបាយការណ៍ពីអង្គការលីកាដូ៕