អភិបាលស្រុកបន្ទាយស្រី សប្បាយចិត្តពេលឃើញពលរដ្ឋ ចេះជួយកសិករ ក្នុងគ្រាមានអាសន្ន

ជាតិ

បទយកការណ៍ / បទសម្ភាសន៍

អភិបាលស្រុកបន្ទាយស្រី សប្បាយចិត្តពេលឃើញពលរដ្ឋ ចេះជួយកសិករ ក្នុងគ្រាមានអាសន្ន

19, Feb 2020 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ក្នុងរយៈពេល២ថ្ងៃប៉ុណ្ណោះ តាសក់ផ្អែមសហគមន៍ស្រុកបន្ទាយស្រីប្រមាណ៣០តោន លក់ចេញអស់គ្មានសល់ បន្ទាប់ពីអភិបាលស្រុកបន្ទាយស្រី កៀងគរឱ្យប្រជាពលរដ្ឋជួយទិញគ្នា។ ផលតាសក់ផ្អែមអ្នកបន្ទាយស្រីនៅរដូវនេះ គ្មានការបញ្ជាទិញដូចមុនៗទេ ដោយអតិថិជនធំៗផ្អាកការទិញ ព្រោះលក់មិនដាច់។ ការធ្លាក់ចុះនៃចំនួនទេសចរខេត្តសៀមរាប ជាមូលហេតុធំដែលធ្វើឱ្យអ្នកដាំខ្នាតធំៗនៃដំណាំតាសក់ផ្អែម គ្មានទីផ្សារ។ អភិបាលស្រុកបន្ទាយស្រី លោក ឃឹម ហ្វីណង់ ដែលអន្ដរាគមន៍ដោះស្រាយបញ្ហាបណ្ដោះអាសន្ននេះ បានបង្ហាញអារម្មណ៍រីករាយ មិននឹកស្មានថាលោកអាចជួយកសិករយ៉ាងលឿនបែបនេះ។ ជាងនេះទៅទៀត លោក ហ្វីណង់ សប្បាយចិត្តជាខ្លាំងពេលឃើញពលរដ្ឋខ្មែរចេះឈឺឆ្អាលជួយកសិករ ក្នុងគ្រាដែលកំពុងមានអាសន្នកើតឡើង។

ព័ត៌មានលម្អិត សូមស្ដាប់បទសម្ភាសរវាងអ្នកនាង អ៊ីសា រ៉ហានី ជាមួយលោក ឃឹម ហ្វីណង់ នៅក្នុងផ្សារហេរីថេក ជាទីដែលអភិបាលស្រុករូបនេះរៀបចំសម្រាប់ដាក់លក់តាសក់ផ្អែម ជួយកសិករស្រុកបន្ទាយស្រី៖

ការបញ្ជាទិញដំណាំតាសក់ផ្អែមរបស់សហគមន៍បន្ទាយស្រី ពី២តោន មកនៅត្រឹម២០០គីឡូក្នុងមួយថ្ងៃ នៅពេលគ្មានតម្រូវការទីផ្សារ។ ភាពស្ងប់ស្ងាត់នៃចំនួនទេសចរក្នុងខេត្ត មិនមែនប៉ះពាល់ត្រឹមសណ្ឋាគារ និងភោជនីយដ្ឋានធំៗនោះទេ ក្នុងនោះកសិករអ្នកដាំតាសក់ផ្អែមសម្រាប់ផ្គត់ផ្គង់ផ្សារទំនើប និងអាជីវកម្មធំៗ ក៏រងផលប៉ះពាល់មិនតិចដែរ។

អភិបាលស្រុកបន្ទាយស្រី លោក ឃឹម ហ្វីណង់ ប្រាប់ពីមូលហេតុដែលលោកជួយរកទីផ្សារ ក៏ដូចជាជ្រោមជ្រែងការលក់តាសក់ផ្អែមកសិករ ព្រោះថាការប្រមូផលតាសក់របស់កសិករមានការស្ទះក្នុងរដូវកាលនេះ បន្ទាប់ពីគ្មានការបញ្ជាទិញ។ លោក ហ្វីណង់ បានបញ្ចេញដំណោះស្រាយបណ្ដោះអាសន្ន ទប់ទល់នឹងបញ្ហាបណ្ដោះអាសន្ន ព្រោះបារម្ភថា កសិករអាចបាក់ទឹកចិត្តលែងដាំ និងអាចជំពាក់បំណុលធនាគារផង៕