ជាតិ
ដោយខ្លាចជំងឺផ្តាសាយបក្សីរាលដាលមកកម្ពុជា ក្រសួងកសិកម្ម រឹតបន្តឹងការនាំចូលបក្សីពីវៀតណាម កសិដ្ឋានចិញ្ចឹមមាន់ (រូបពីក្រសួងកសិកម្ម រុក្ខាប្រមាញ់ និងនេសាទ)
× ភ្នំពេញ៖ ក្រសួងកសិកម្ម រុក្ខាប្រមាញ់ និង នេសាទ ណែនាំឲ្យមន្រី្តរឹតបន្តឹងការនាំចូលបក្សី (ដូចជាមាន់ជាដើម ពីវៀតណាម ដើម្បីទប់ស្កាត់ជំងឺផ្កាសាយបក្សី ដែលកំពុងរាលដាលនៅខេត្តត្រាវិញភាគខាងត្បូង ប្រទេសវៀតណាម។ នេះបើតាមសារាចរណែនាំរបស់ក្រសួងកសិកម្ម នៅថ្ងៃទី១៨ ខែកុម្ភៈ ឆ្នាំ២០២០។
ក្រសួងកសិកម្ម បានបញ្ជាក់ថា នៅប្រទេសវៀតណាម មានការផ្ទុះជំងឺផ្ដាសាយបក្ស A/H5N1 ហើយបានកម្ទេចមាន់ជាង៥ម៉ឺនក្បាល។ ដូច្នេះ ដើម្បីបង្ការនិងទប់ស្កាត់ ក្រសួងដាក់វិធានការឲ្យមន្រី្ត រឹតបន្តឹងការនាំចូលបក្សី និងផលិតផលពីបក្សីខុសច្បាប់ ដែលឆ្លង់កាត់ព្រំដែន ត្រូវមានលិខិតអនុញ្ញាត វិញ្ញាបនបត្រអនាម័យសត្វ និងផលិតផលសត្វ។ លើសពីនេះ ត្រូវអនុវត្តវិធានការអនាម័យ លាងសម្អាត និងបាញ់ថ្នាំសម្លាប់មេរោគ។ ជាមួយគ្នាដែរ ក្រសួងបានអំពាវនាវឲ្យមន្រី្តកសិកម្មរាជធានី-ខេត្តទាំងអស់ បង្កើនការអប់រំ និងផ្សព្វផ្សាយលើផ្នែកអនាម័យទៅដល់កសិករ ម្ចាស់កសិដ្ឋាន អ្នកពិឃាតបក្សី និង អាជីវករ ជាដើម។
ទន្ទឹមនឹងនេះ មន្ត្រីកសិកម្ម ត្រូវសហការជាមួយមន្ត្រីវៀតណាម ក្នុងការផ្លាស់ប្តូរព័ត៌មានពាក់ព័ន្ធនឹងជំងឺផ្តាសាយបក្សី ចរាចរបក្សី និងផលិតផលពីបក្សី ដើម្បីទប់ស្កាត់ជំងឺផ្តាសាយបក្សី ឱ្យបានទាន់ពេលវេលា។ ប្រសិនបើ ករណីពលរដ្ឋ មានការសង្ស័យ អំពីជំងឺផ្តាសាយបក្សី អាចទំនាក់ទំនងសួរព័ត៌មានទៅមន្រី្តជំនាញ តាមលេខទូរស័ព្ទ ០១២ ២១៤ ៩៧០៕
© រក្សាសិទ្ធិដោយ thmeythmey.com