វិទ្យាសាស្រ្ត និង បច្ចេកវិទ្យា
អន្តរជាតិ
លោក Larry Tesler អ្នកបង្កើត Cut, Copy &Paste លើកុំព្យូទ័រស្លាប់នៅអាយុ ៧៤ឆ្នាំ
× លោក Larry Tesler អ្នកវិទ្យាសាស្ត្រកុំព្យូទ័រដែលបង្កើត «Cut, Copy & Paste» បានទទួលមរណភាព កាលពីថ្ងៃទី១៧ ខែកុម្ភៈនៅវ័យ៧៤ឆ្នាំ ។ បើតាមការចុះផ្សាយសារព័ត៌មាន BBC នៅថ្ងៃ២០ ខែកុម្ភៈ មូលហេតុនៃការស្លាប់របស់លោក ពុំត្រូវបានបញ្ជាក់ឡើយ។
លោក Larry Tesler បានផ្ដើមធ្វើការក្នុងតំបន់ Silicon Valley នៅអំឡុងដើមឆ្នាំ១៩៦០។ លោក គឺជាវិទ្យាសាស្ត្រកុំព្យូទ័រដ៏ល្បីល្បាញមួយដែលធ្លាប់ប្រឡូកការងារនៅក្រុមហ៊ុនធំៗជាច្រើននៅអាមេរិកដូចជា Xerox PARC, Apple, Amazon, និងYahoo! ជាដើម។ លោក ជាអ្នកក្រុងញូវយ៉ក សហរដ្ឋអាមេរិក ដែលកើតនៅឆ្នាំ១៩៤៥ ហើយបានសិក្សាមុខជំនាញវិទ្យាសាស្ត្រកុំព្យូទ័រនៅសាកលវិទ្យាល័យ Standford ក្នុងរដ្ឋកាលីហ្វ័រនីញ៉ា។
ក្រុមហ៊ុន Xerox PARC ដែលជាទីលោក Larry ចំណាយពេលមួយផ្នែកនៃជីវិតការងារលោក បានចូលរួមរំលែកទុក្ខចំពោះការបាត់បង់រូបលោក។ តាមរយៈបណ្ដាញសង្គម Twitter ក្រុមហ៊ុន សរសេរបែបនេះថា៖«អ្នកបង្កើតក្ដារបញ្ជា cut/copy &paste, find & replace និងច្រើនទៀត គឺជាអតីតអ្នកស្រាវជ្រាវរបស់ក្រុមហ៊ុន Xerox គឺលោក Larry Tesler»។ ក្រុមហ៊ុននេះ អះអាងទៀតថា៖«ការងារប្រចាំថ្ងៃរបស់អ្នក គឺជាមានភាពងាយស្រួល អរគុណដល់គំនិតច្នៃប្រឌិតរបស់លោក»៕
© រក្សាសិទ្ធិដោយ thmeythmey.com