ពីនេះ ពីនោះ
សរសេរ«កេរខ្មាស» បែបនេះទើបត្រូវ ចំណែក«កេរ្តិ៍ឈ្មោះ»សរសេរបែបនេះទើបត្រូវ
×![]()
ដោយ: ថ្មីៗ
មិនមែនសរសេរ«កេរ្តិ៍ខ្មាស» ដូចនេះទេ គឺត្រូវសរសេរជា«កេរខ្មាស»អ៊ីចេះវិញទើបត្រឹមត្រូវជាង។ ចំណែកពាក្យ«កេរ្តិ៍ឈ្មោះ»សរសេរបែបនេះគឺត្រឹមត្រូវហើយ។ នេះបើយោងតាមសម្តេចព្រះសង្ឃរាជ ជួន ណាត ដែលបានបកស្រាយនៅក្នុងវចនានុក្រមខ្មែរ។ 
វចនានុក្រមខ្មែរសម្តេចព្រះសង្ឃរាជ បានពន្យល់ពាក្យ «កេរ»និង«កេរ្តិ៍» គឺមានន័យខុសគ្នាស្រឡះ។ «កេរ» សំដៅដោយដំណែល ឬជាមរតករបស់ដូនតា ឬមាតាបិតាដែលបានបន្សល់ទុកឲ្យ។ ឧទាហរណ៍ជាក់ស្តែង៖ ស្រែនេះជាកេររបស់ជីដូនខ្ញុំ,ប្រាសាទនគរវត្ត ជាកេររបស់ព្រះមហាក្សត្រ ជាបុព្វបុរសរបស់ខ្មែរ។
គេច្រើនប្រើពាក្យ«កេរ»ជាមួយនឹងពាក្យដទៃ បង្កើតបានជាពាក្យ កេរកាល គឺមានន័យថា ឈ្មោះសាស្ត្រាច្បាប់ចាស់មួយ មានពាក្យប្រដៅជាដំបូន្មានផ្សេងៗ។ សាស្ត្រាកេរកាល។
ចំណែក «កេរ្តិ៍» សំដៅលើ សេចក្តីសរសើរ,ការល្បីលេចឮ,ខ្ចរខ្ចាយ។ ពាក្យនេះច្រើនតែប្រើជា កេរ្តិ៍ឈ្មោះ។
គួរចងចាំថា កាលណាគេសំដៅលើ ទ្រព្យសម្បត្តិមរតកដែលជារបស់ដូនតាជំនាន់មុនបន្សល់ទុកឲ្យនោះ គឺគេត្រូវនឹកឃើញដល់ពាក្យ«កេរ»។ កាលណាគេសំដៅលើបុគ្គលណាម្នាក់មានភាពល្បីល្បាញ នោះគេត្រូវនឹកឃើញដល់ពាក្យ«កេរ្តិ៍»នេះ៕
Tag:
ពន្យល់ពាក្យ
© រក្សាសិទ្ធិដោយ thmeythmey.com
