ជាតិ
សង្គមជាតិ
អាយុគ្រាន់តែជាតួលេខ! វ័យ៨៥ឆ្នាំ លោកតា ហុងសៀ ឡើងដល់កំពូលភ្នំឱរ៉ាល់តាមការប៉ងប្រាថ្នា
×![]()
ភ្នំពេញ៖ វ័យ៨៥ឆ្នាំទៅហើយ ប៉ុន្តែលោកតា លីម ហុងសៀ មិនដែលបោះបង់ក្តីសុបិនរបស់ខ្លួននោះឡើយ។ ចន្លោះពីថ្ងៃទី១៤ ដល់ថ្ងៃទី១៦ កន្លងមក បុរសចំណាស់ពីខេត្តកំពង់ធំរូបនេះ បានរួមដំណើរជាមួយក្រុមយុវជនជាច្រើននាក់ ឡើងទៅដល់កំពូលភ្នំឱរ៉ាល់ក្នុងភូមិសាស្ត្រខេត្តកំពង់ស្ពឺ ដែលមានកំពស់១៨១៣ម៉ែត្រ ដែលខ្ពស់ជាងគេនៅកម្ពុជា។
សូមអញ្ជើញទស្សនាបទសម្ភាសរវាងកញ្ញា សៅ សុខអេង អ្នកសារព័ត៌មានថ្មីៗ និងលោកតា លីម ហុងសៀ ដែលបានឡើងទៅដល់ភ្នំឱរ៉ាល់ដែលជាភ្នំខ្ពស់ជាងគេនៅកម្ពុជាដូចតទៅ៖
បើទោះបីជានឿយហត់បន្តិចក្តី និងប្រឈមគ្រោះថ្នាក់ក្តី ក៏លោកតានៅតែមានឆន្ទៈខ្ពស់ក្នុងការឡើងមើលទិដ្ឋភាពនៅលើកំពូលភ្នំ ដោយមិនខ្លាចពិបាកការហូបចុក ជួបសត្វសាហាវ និងអាកាសធាតុត្រជាក់នៅទីនោះឡើយ។
លោកតា លីម ហុងសៀ មានប្រសាសន៍ដូច្នេះថា៖ «ខ្ញុំត្រូវតែតាំងចិត្ត កណ្តាប់ដៃត្រូវតែទៅឲ្យតែដល់ ទោះបីជាជួបឧបសគ្គយ៉ាងណាក៏ដោយ។ គ្រាន់តែនឿយហត់ ដកដង្ហើម សម្រួលឲ្យវាធូរ ហូបទឹកបន្តិចបន្តួច ហើយទឹកយើងកុំហូបឲ្យឆ្អែតពេក ពេលដែលយើងហត់ ពេលដែលយើងស្រេកទឹក យើងគ្រាន់តែក្រេបទឹកបន្តិចហើយ បើយើងហូបច្រើនក៏អត់ល្អដែរ»។
មុននឹងលោកតា ហុងសៀ សម្រេចចិត្តឡើងលើភ្នំឱរ៉ាល់នេះ លោកតាក៏ធ្លាប់បានឡើងលើភ្នំដទៃទៀតដែលស្ថិតនៅក្នុងប្រទេសកម្ពុជាដែរ។ ក្នុងចំណោមភ្នំដែលលោកតាបានឡើងនោះ គឺភ្នំឱរ៉ាល់នេះហើយ ដែលធ្វើឲ្យលោកតាមានអារម្មណ៍ស្រស់ស្រាយ ដោយគ្មានការរំខាន និងជួបឧបសគ្គណាមួយធំដុំដែលរារាំងដល់ការធ្វើដំណើររបស់លោកតាឡើយ។
លោកតានិយាយបែបនេះថា៖«ខ្ញុំឆ្ងល់ដែរ ពេលឡើងទៅដល់ភ្នំ ម៉េចក៏មិនជួបសត្វជើងបួន បើឡើងទៅភ្នំផ្សេង គឺខា្លចជួបសត្វដំរី ជួបខ្លា។ តាំងពីឡើងទៅគ្មានបានជួប សម្រេកអីអត់មានម៉ង គឺស្ងាត់ជ្រាប។ ឡើងទៅដល់លើនោះអត់មានក្តីបារម្ភអ្វីទៀតទេ គឺសប្បាយតែម្តង នឿយហត់ទាំងប៉ុន្មាន ឈឺជើង ឈើដៃ ចុកភ្លៅអីគ្មានទៀតទេ»។
លោកតា លីម ហុងសៀ ដែលមានស្រុកកំណើតនៅខេត្តកំពង់ធំ បានជំរុញឲ្យកូនចៅដែលជាយុវជន ដែលមានកម្លាំងមាំមួន ឡើងទៅលើកំពូលភ្នំដែលខ្ពស់ជាងគេនៅក្នុងប្រទេសកម្ពុជា ដើម្បីទស្សនាធនធានធម្មជាតិដែលមាននៅក្នុងប្រទេសកម្ពុជាឲ្យកាន់តែច្រើនបន្ថែមទៀត៕
Tag:
លោកតា លីម ហុងសៀ
© រក្សាសិទ្ធិដោយ thmeythmey.com
