ជាតិ
សម្ដេច ស ខេង៖ បញ្ជាស្រាវជ្រាវឲ្យដល់កម្រិត លើការស្លាប់របស់ទារិកា ដែលរស់នៅជាមួយម្ដាយជាប់ឃុំ
សម្ដេច ស ខេង (រូបពីទំព័រហ្វេសប៊ុករបស់សម្ដេច ស ខេង)
×![]()
ដោយ: ឡាយ សុភាវតី
ភ្នំពេញ៖ សម្ដេច ស ខេង ឧបនាយករដ្ឋមន្ត្រី រដ្ឋមន្រី្តក្រសួងមហាផ្ទៃ បានស្នើឲ្យមានការស្រាវជ្រាវឲ្យដល់កម្រិតលើការស្លាប់របស់ទារិកាម្នាក់អាយុ៥ខែ ដែលរស់នៅជាមួយម្ដាយ ស្លាប់នៅមន្ទីរពេទ្យមិត្តភាពខ្មែរ-សូវៀតកាលពីថ្ងៃទី២៦ កមរា ឆ្នាំ២០២០។ 
អង្គសន្និបាតបូកសរុបលទ្ធផលការងារប្រចាំឆ្នាំ នៅទីស្ដីការក្រសួងមហាផ្ទៃ សម្ដេច ស ខេង បានសង្កត់ធ្ងន់ថា សមត្ថកិច្ចត្រូវតែស្រាវជ្រាវរកឲ្យកាឃើញថា ការស្លាប់របស់ទារិកានៅមន្ទីរពេទ្យមិត្តភាពខ្មែរ-សូវៀត គឺពិតជាស្លាប់ដោយសារខ្វះអាហារូបត្ថម្ភឬមកពីអ្វីផ្សេងទៀត។ ការធ្វើបែបនេះ គឺដើម្បីបំភ្លឺសាធារណមតិ។
«ខ្ញុំបានបញ្ជាទៅអគ្គនាយកដ្ឋានហើយ ស្រាវជ្រាវឲ្យដល់កម្រិត ថាតើស្លាប់ដោយសារអី ស្លាប់ដោយសារខ្វះអាហារូបត្ថម្ភ ឬដោយសារអ្វីមួយទៀត យើងត្រូវធ្វើឲ្យដល់កម្រិត ដើម្បីបំភ្លឺសាធារណមតិ» នេះជាការលើកឡើងរបស់សម្ដេច ស ខេង។
អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) បានរកឃើញភាពមិនប្រក្រតីពីការស្លាប់របស់ទារកអាយុ៥ខែ ដែលរស់នៅជាម្ដាយជាំប់ឃុំនៅមណ្ឌលអប់រំកែប្រែទី២ (ព្រៃស) ដោយមានបាក់ឆ្អឹងភ្លៅ ខ្វះព័ត៌មានពីនីតិវិធីច្បាប់ចំពោះអ្នកជាប់ឃុំ និងការបញ្ជូនកុមារនិងស្រី្តទៅមន្ទីរពេទ្យ។ នេះបើតាមរបាយការណ៍របស់លីកាដូ ដែលបានផ្សាយលើគេហទំព័រនៅថ្ងៃទី១៨ កុម្ភៈ ឆ្នាំ២០២០។
ពាកព័ន្ធនឹងបញ្ហានេះ កាលពីថ្ងៃទី១៩ កុម្ភៈ ឆ្នាំ២០២០ គណៈកម្មាធិការសិទ្ធិមនុស្សកម្ពុជា បានចាត់មន្ត្រីខ្លួន ឲ្យចុះទៅស៊ើបអង្កេតនៅមជ្ឈមណ្ឌលកែប្រែទី២(ព្រៃស) ក្រោយមានករណីស្លាប់ទារិកាអាយុ៥ខែ។ លទ្ធផលបានបង្ហាញថា ទារិកានោះពិតជាស្លាប់ដោយសាររលាកសួតធ្ងន់ធ្ងរ ប៉ុន្តែជាមួយគ្នានេះ គណៈកម្មាធិការសិទ្ធិមនុស្ស បានសម្រេចផ្តល់មេធាវីជូនដល់ស្ត្រីជាប់ឃុំដែលជាម្តាយរបស់ទារិកា រួមទាំងការស្នើសុំឲ្យនៅក្រៅឃុំជាបណ្តោះអាសន្ន៕
Tag:
ទារក
© រក្សាសិទ្ធិដោយ thmeythmey.com
