កីឡាជាតិ
ជាតិ
កីឡាករ កែវ សុខផេង (ឆ្វេង) និងកីឡាករ ចាន់ វឌ្ឍនាកា, រូបភាពពីវិសាខា និងបឹងកេត
×![]()
ក្រុមវិសាខា ត្រូវធ្វើដំណើរទៅកាន់កីឡដ្ឋានខេមបូឌាអ៊ែរវ៉េ ដើម្បីតទល់ជាមួយបឹងកេត សម្រាប់ជំនួបលើកទី២នៃពានរង្វាន់ក្របខណ្ឌមិត្តហ្វូនខេមបូឌានលីគនៅរសៀលថ្ងៃទី២២ ខែកុម្ភៈ ឆ្នាំ២០២០។ ជាមួយគ្នានេះ ខ្សែប្រយុទ្ធ កែវ សុខផេង ហាក់មានជំនឿចិត្តខ្ពស់ក្នុងការដណ្តើមជ័យជម្នះពីការប្រកួតដ៏តានតឹង និងជក់ចិត្តប្រចាំសប្តាហ៍មួយនេះ។ ក្រៅពីជំនួបនេះ ក៏មានការប្រកួតពីរគូទៀតផងដែរ។
ខ្សែប្រយុទ្ធឆ្នើមវិសាខា កែវ សុខផេង បានបង្ហាញពីការត្រៀមខ្លួនរួចរាល់ក្នុងការតទល់ជាមួយជើងខ្លាំងបឹងកេតរបស់ខ្សែប្រយុទ្ធឆ្នើម ចាន់ វឌ្ឍនាកា នៅរសៀលថ្ងៃសៅរ៍នេះ។ សុខផេង រំពឹងថាក្រុមខ្លួននឹងទទួលបានពិន្ទុតិច ឬច្រើនត្រឡប់ទៅផ្ទះវិញ។ ជាមួយការប្តេជ្ញានឹងប្រឹងប្រែងឲ្យអស់ពីសមត្ថភាព រូបគេជឿថា ការជួបគ្នារវាងក្រុមទាំងពីរ នឹងក្លាយជាជំនួបដ៏តានតឹង និងទាក់ទាញបំផុត។
«ពួកយើងនឹងខំពង្រឹងឲ្យល្អបំផុតដើម្បីប្រជែងយក៣ពិន្ទុពីបឹងកេតក្នុងការរក្សាតំណែងកាន់តែល្អក្នុងតារាងចំណាត់ថ្នាក់ និយាយរួមជួបបឹងកេតយ៉ាងហោចយើងត្រូវការឈ្នះ ឬស្មើ មិនអាចចាញ់ឡើយ»។ នេះជាការបញ្ជាក់របស់កីឡាករ កែវ សុខផេង ដែលត្រូវបានក្លិបវិសាខាស្រង់យកទៅបង្ហោះទៅលើហ្វេសប៊ុក។
ក្រោយយកឈ្នះអគ្គស្នងការដ្ឋាននគរបាលជាតិ ២-១ ក្នុងជំនួបបើកឆាក ក្រុមវិសាខាត្រូវធ្វើដំណើរទៅជួបបឹងកេត សម្រាប់ជំនួបសប្តាហ៍ទី២នៃពានរង្វាន់មិត្តហ្វូនខេមបូឌានលីគនៅកីឡដ្ឋានខេមបូឌាអ៊ែរវ៉េ វេលាម៉ោង៣:៣០នាទីរសៀលថ្ងៃទី២២ កុម្ភៈ នេះ។ នាជំនួបបើកឆាកបឹងកេតបានចែកគ្នាម្នាក់១ពិន្ទុជាមួយអង្គរថាយហ្គឺរ ក្រោយរក្សាលទ្ធផលស្មើ ១-១។ ជំនួបរវាងក្រុមទាំងពីរដែលធ្វើឡើងនៅកីឡដ្ឋាន S.R.U បានទាក់ទាញអ្នកគាំទ្រទស្សនាផ្ទាល់ច្រើនជាងគេប្រចាំសប្តាហ៍ទី១។
ក្រៅពីការប្រកួតដ៏ជក់ចិត្តខាងលើ ក៏មានការប្រកួតពីរគូទៀតផងដែរ ក្នុងនោះណាហ្គាវើល ត្រូវប្រកួតបើកឆាកជាមួយអគ្គស្នងការដ្ឋាននគរបាលជាតិនៅកីឡដ្ឋានអគ្គិសនីកម្ពុជា ខណៈក្រុមគីរីវង់សុខសែនជ័យបើកទ្វារកីឡដ្ឋានខ្លួនស្វាគមន៍ជើងខ្លាំងព្រះខ័នរាជស្វាយរៀង។ ការប្រកួតទាំងពីរធ្វើឡើងវេលាម៉ោង៣:៣០នាទីរសៀលដូចគ្នា៕
Tag:
Cambodian League 2020
កែវ សុខផេង
© រក្សាសិទ្ធិដោយ thmeythmey.com
