អន្តរជាតិ
នាយករដ្ឋមន្ត្រីឡាវលោក ថុងលួន ស៊ីសូលីត (រូបភាព: Xinhua)
×![]()
ដោយ: ថ្មីៗ
តុលាការឡាវ បានសម្រេចកាត់ទោសអតីតមន្ត្រីជាន់ខ្ពស់រដ្ឋាភិបាលទទួលបន្ទុកការងារភស្តុភារ និងបក្សពួកមួយចំនួនឲ្យជាប់ពន្ធនាគារជាច្រើនឆ្នាំ។ សេចក្តីសម្រេចរបស់តុលាការ ធ្វើឡើងបន្ទាប់ពីរកឃើញថា មន្ត្រីជាន់ខ្ពស់ទាំងនេះ បានកេងប្រវ័ញ្ចទ្រព្យសម្បត្តិរដ្ឋ និងប្រព្រឹត្តអំពើពុករលួយធ្ងន់ធ្ងរ ក្នុងមុខតំណែង។
អតីតអគ្គនាយកទទួលបន្ទុកផ្នែកភស្តុភាររបស់រដ្ឋាភិបាលឡាវ លោក Khampheng ត្រូវបានតុលាការឡាវ កាត់ឲ្យជាប់ពន្ធនាគារមួយជីវិតពីបទពុករលួយ ដែលបានប្រព្រឹត្តតាំងពីលោក ឡើងកាន់តំណែងនេះមកម្ល៉េះ។ ទ្រព្យសម្បត្តិ របស់លោក ដែលបានមកពីការប្រព្រឹត្តអំពើពុករលួយនេះ នឹងត្រូវរឹបអូសមកជាទ្រព្យសម្បត្តិរដ្ឋ។ នេះបើយោងតាមការចុះផ្សាយរបស់សារព័ត៌មាន Laotians Times នៅថ្ងៃ២០ កុម្ភៈ។
តាមប្រភពព័ត៌មានដដែល បក្សពួករបស់លោក ដែលជាអ្នកសមគំនិតបីនាក់ផ្សេងទៀត ក៏ត្រូវបានតុលាការកាត់ទោសឲ្យជាប់ពន្ធនាគាររយៈពេល ១៨ ឆ្នាំ និងតម្រូវឲ្យសងនូវទ្រព្យសម្បត្តិដែលបានមកពីអំពើពុករលួយឲ្យរដ្ឋមកវិញទាំងអស់ផងដែរ។ យ៉ាងណា ដោយសារតែជនជាប់ចោទទាំងបី បានអនុវត្តតាមសេចក្តីសម្រេច តុលាការ បានសម្រេចសម្រាលទោសពួកគេមកត្រឹម ៩ឆ្នាំវិញ។
តាមរបាយការណ៍របស់តុលាការ អតីតមន្ត្រីជាន់ខ្ពស់របស់រដ្ឋាភិបាលឡាវរូបនេះ បានចាប់ផ្តើមប្រព្រឹត្តអំពើពុករលួយនៅពេលលោក ឡើងកាន់តំណែងនេះក្នុងឆ្នាំ២០០៨។ អំពើពុករលួយរបស់លោក ត្រូវបានស្តែងចេញឡើងតាមរូបភាពដូចជា ការទទួលសំណូកពីកិច្ចសន្យាពីក្រុមហ៊ុនសាងសង់, ការលួចលុយពីលើការកំណត់តម្លៃទំនិញ និងពន្ធបន្ថែម, ក៏ដូចជាការប្រើប្រាស់ឥណទានរបស់អង្គភាពសម្រាប់ការចំណាយឯកជនក្រៅប្រទេសជាដើម។
គួរបន្តិចថា តាមរបាយការណ៍សន្ទស្សន៍អំពើពុករលួយរបស់អង្គការតម្លាភាពអន្តរជាតិឆ្នាំ២០១៩ ឡាវ ស្ថិតនៅក្នុងចំណាត់ថ្នាក់ទី ១៣០ ខណៈឆ្នាំ២០១៧ នៅលេខ ១៣៥ និង ២០១៨ ១៣២។ ស្ថានភាពអំពើពុករលួយនៅក្នុងប្រទេសដែលមានការអភិវឌ្ឍតិចតួចរបស់ពិភពលោកមួយនេះ ត្រូវបានមើលឃើញថា មានភាពថមថយខ្លះ បន្ទាប់ពីលោក ថុងលួន ស៊ីសូលីត ឡើងកាន់តំណែង។ លោកនាយករដ្ឋមន្ត្រី ថុងលួន បានប្តេជ្ញាកាត់បន្ថយអំពើពុករលួយនៅក្នុងអង្គភាពរដ្ឋាភិបាល តាមរយៈការពង្រឹងការគ្រប់គ្រងមន្ត្រីរដ្ឋការ ក៏ដូចជាតម្លាភាពក្នុងការប្រើប្រាស់ថវិការដ្ឋជាដើម៕
Tag:
ឡាវ
អាស៊ាន
ពុករលួយ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
