អន្តរជាតិ
លោក ស៊ី ជិនភីង៖ COVID-19 ជាបញ្ហាប្រឈមផ្នែកសុខភាពធំបំផុតរបស់ចិន រូបភាព Xinhua
× ប្រធានាធិបតីចិន ស៊ី ជិនភីង នៅថ្ងៃទី២៣ ខែកុម្ភៈ បានហៅជំងឺផ្លូវដង្ហើមបង្កដោយកូរ៉ូណាវីរុសប្រភេទថ្មី (COVID-19) ជាវិបត្តិសុខាភិបាលធំបំផុតតាំងពីការបង្កើតសាធារណរដ្ឋប្រជាមានិតចិនមក។ លោក ស៊ី បានទទួលស្គាល់ពីបញ្ហាក្នុងការឆ្លើយតបរបស់អាជ្ញាធរទៅនឹងការរាលដាលវីរុសប្រភេទថ្មី ដែលសម្លាប់មនុស្សរាប់ពាន់នាក់ និងបានរាលដាលដល់ប្រទេសជាច្រើន។ ប៉ុន្តែមេដឹកនាំចិនក៏អះអាងថា ការគ្រប់គ្រង និងការទប់ស្កាត់វីរុស ក៏ទទួលបានផលផងដែរ។
«នេះគឺជាវិបត្តិ និងជាការសាកល្បងដ៏ធំមួយសម្រាប់យើង។» ប្រធានាធិបតីចិន ស៊ី ជិនភីង និយាយបែបនេះដោយសំដៅដល់ការផ្ទុះឡើងជំងឺរលាកសួតដែលបង្កដោយកូរ៉ូណាវីរុសប្រភេទថ្មី (COVID-19)។ សម្រាប់លោក ស៊ី COVID-19 ជាបញ្ហាផ្នែកសុខាភិបាលដ៏ធំបំផុតដែលចិនបានជួបប្រទះតាំងពីការបង្កើតសាធារណរដ្ឋប្រជាមានិតចិននៅ ខែតុលា ឆ្នាំ១៩៤៩ មក តែក៏ជារឿងដែលបក្សកុម្មុយនីស្តចិនមិនអាចមិកឈ្នះបានដែរ។
នាជំនួបថ្ងៃទី២៣ ខែកុម្ភៈ ជាមួយមន្ត្រីជាន់ខ្ពស់រដ្ឋាភិបាលដើម្បីជជែកពីការគ្រប់គ្រង និងទប់ស្កាត់ COVID-19 លោក ស៊ី ដែលជាអគ្គលេខាធិការគណមជ្ឈិមបក្សកុម្មុយនីស្តចិនផងនោះ បានសង្កត់ធ្ងន់ពីការប្រឹងប្រែងខ្លាំងក្លាដើម្បីទប់ស្កាត់ការរាលដាលវីរុសប្រភេទថ្មី ដែលជាវិបត្តិដ៏ធំរបស់ប្រទេសក្នុងរយៈពេល៧ទសវត្សរ៍មកនេះ។ លោកលើកឡើងថា ចិនបានជួបបញ្ហាច្រើនហើយ តែមិនបានទន់ខ្សោយឡើយ តែរឹតតែខ្លាំងក្លាថែមទៀត។
«ការផ្ទុះឡើង COVID-19 គឺជាបញ្ហាសុខាភិបាលដ៏អាសន្នបំផុតដែលបានរាលដាលរហ័ស បង្កជាការឆ្លងដ៏ច្រើន និងពិបាកគ្រប់គ្រងបំផុតចាប់តាំងពីការកកើតសាធារណរដ្ឋប្រជាមានិតចិនមក។» នេះជាការបញ្ជាក់របស់លោក ស៊ី ដែលបន្តថា ទោះវីរុសនេះជាវិបត្តិ និងជាការសាកល្បងដ៏ធំសម្រាប់ចិនក្ដី ចិនក៏បានចាត់វិធានការរហ័ស និងពេញបន្ទុក ហើយនិន្នាការវិជ្ជមាននៃវិធានការទាំងនោះ កំពុងពង្រីកខ្លួនផងដែរ។ នេះបើតាមការផ្សាយរបស់ទីភ្នាក់ព័ត៌មានរដ្ឋចិន Xinhua ។
មកទល់ពេលនេះ ស្ថានភាពកូរ៉ូណាវីរុសនៅចិន នៅតែស្មុគស្មាញដដែល ស្របពេលចំនួនអ្នកស្លាប់បន្តកើនឡើង និងការរកឃើញករណីឆ្លងថ្មីៗថែមទៀត។ ប៉ុន្តែរឿងដែលគួរអបអរនោះ ចំនួនអ្នកដែលចាកចេញពីមន្ទីរពេទ្យក៏កើនឡើងផងដែរ។
នៅក្រៅពីចិន COVID-19 កំពុងអុកឡុកខ្លាំងនៅកូរ៉េខាងត្បូង ដែលជាប្រទេសទីពីរបន្ទាប់ពីចិនមានករណីឆ្លងច្រើនជាងគេ។ នៅព្រឹកថ្ងៃទី២៤ ខែកុម្ភៈ អាជ្ញាធរកូរ៉េខាងត្បូងបានប្រកាសពីករណីសរុបចំនួន៧៦៣នាក់ និងករណីស្លាប់ទី៧។ នៅអ៊ីតាលីឯណោះវិញ ករណីឆ្លងបានឡើងដល់១៥២ គិតត្រឹមថ្ងៃទី២៣ ខែកុម្ភៈ ហើយករណីស្លាប់មាន៣នាក់ដែរ។ ចំណែកអ៊ីរ៉ង់ មានករណីឆ្លងចំនួន៤៣ ហើយប្រទេសនានាជាប់អ៊ីរ៉ង់ ក៏ប្រកាសបិទព្រំដែនដើម្បីទប់ស្កាត់ការរាលដាល៕
Tag:
ចិន
COVID-19
ស៊ី ជិនភីង
© រក្សាសិទ្ធិដោយ thmeythmey.com