អន្តរជាតិ
អ្នកជំនួញឥណ្ឌា៖ ពលរដ្ឋឥណ្ឌាចូលចិត្តជិះរថយន្តធំៗ ពេលធ្វើដំណើរតែម្នាក់ឯង
×![]()
ដោយ: ធីតា
ពលរដ្ឋឥណ្ឌាដែលមានទម្ងន់តែ៦៥ ទៅ៧០គីឡូក្រាម បានប្រើប្រាស់រថយន្តទម្ងន់ដល់ទៅ១៥០០គីឡូក្រាមក្នុងការធ្វើដំណើរតែម្នាក់ឯង។ នេះជាការកត់សម្គាល់របស់លោក Pawan Goenka នាយកគ្រប់គ្រងក្រុមហ៊ុនយានយន្ដ Mahindra & Mahindra ដែលដកស្រង់សម្តីដោយសារព័ត៌មាន The Times of India។
«មិនត្រឹមតែបង្កើនការកកស្ទះចរាចរណ៍ប៉ុណ្ណោះទេ ប៉ុន្តែថែមទាំងរួមចំណែកបង្កើនកម្រិតបំពុលកាន់តែខ្លាំងផងដែរ»។ លោក Goenka បានថ្លែងយ៉ាងដូច្នេះ នាព្រឹត្តិការណ៍មួយ កាលពីពេលថ្មីៗកន្លងមកនេះ។
អ្នកជំនួញខាងឧស្សាហកម្មយានយន្តដ៏ធំនៅឥណ្ឌារូបនេះ បានឡើងថា តម្រូវការរថយន្តឯកជនសម្រាប់ការធ្វើដំណើរតែម្នាក់ឯង គឺជាតម្រូវការចាំបាច់មួយ ប៉ុន្តែករណីមនុស្សតែម្នាក់ ជិះរថយន្តដែលមានទំហំធំ មិនមែនជារឿងទូទៅនោះឡើយ។
លោក Goenka បានអះអាងថា ឧស្សហកម្មយានយន្តពិតជារួមចំណែកបង្កើនការបំបំពុល ប៉ុន្តែក្រុមហ៊ុន Mahindra របស់លោកតាំងចិត្តរួមចំណែកកាត់បន្ថយ តាមរយៈការផលិតរថយន្តទំហំតូច ដោយឆ្លើយតបតាមបទដ្ឋានអន្តរជាតិ ជាពិសេសប្រភេទរថយន្តអគ្គិសនី។
លោកបានបន្ថែមថា ឧស្សាហកម្មយានយន្តនៅឥណ្ឌា ដើរក្រោយចិនរហូតដល់៥ឆ្នាំ ជាពិសេសលើប្រភេទរថយន្ត EV ប៉ុន្តែឥណ្ឌានៅតែមានឱកាសនាំមុខគេលើពិភពលោកតាមរយៈការអភិវឌ្ឍការស្រាវជ្រាវ និងការបំពាក់បច្ចេកវិទ្យាថ្មីៗ ពោលលើរថយន្តអគ្គិសនី ដែលកាលពីឆ្នាំ២០១៩ មានការលក់ចេញតែ១៤០០គ្រឿងប៉ុណ្ណោះនៅក្នុងប្រទេស៕
© រក្សាសិទ្ធិដោយ thmeythmey.com
