អន្តរជាតិ
ខេត្តចិនចំនួន៦ ទម្លាក់កម្រិតឆ្លើយតបនឹង COVID-19 រូបភាព Xinhua
× ខេត្តរបស់ចិនចំនួន៦ មានកានស៊ូ លាវនីង យូណាន គ័ងតុង គួយចូវ និងសានស៊ី (Shanxi) បានទម្លាក់ជាបន្តបន្ទាប់កម្រិតឆ្លើយតបនឹងជំងឺផ្លូវដង្ហើមប្រភេទបង្កដោយកូរ៉ូណាវីរុសប្រភេទថ្មី (COVID-19) ។ ការទម្លាក់កម្រិតឆ្លើយតបបែបនេះ ទំនងជាសញ្ញាបង្ហាញថា ការរាលដាលវីរុសនៅខេត្ត និងតំបន់ក្រៅពីខេត្តហ៊ូប៉ី ស្ថិតក្រោមការគ្រប់គ្រងរបស់អាជ្ញាធរ។ យ៉ាងណាមិញ សភាពការណ៍វីរុសប្រភេទថ្មីនេះនៅចិន នៅតែស្ថិតក្នុងកម្រិតខ្ពស់ដដែល។
ក្រោយការផ្ទុះឡើងកូរ៉ូណាវីរុសដែលបង្កទៅជាជំងឺរលាកផ្លូវដង្ហើមធ្ងន់ធ្ងរ ខេត្តនានារបស់ចិន បានដំឡើងកម្រិតឆ្លើយតបរបស់ខ្លួនទៅកាន់កម្រិតទីមួយ ដែលជាកម្រិតឆ្លើយតបខ្ពស់បំផុត។ នៅចិន កម្រិតឆ្លើយតប មានចំនួន៤កម្រិត ហើយដែលកម្រិតនីមួយៗ កំណត់ពីវិធានការនានាដើម្បីឆ្លើយតបនឹងវិបត្តិចំពោះមុខ។ កាលពីខែមុន ខេត្ត និងទីក្រុងធំទាំង៣១ បានដំឡើងកម្រិតឆ្លើយតបទីមួយ គ្រាដែលកូរ៉ូណាវីរុសកំពុងរាលដាលខ្លាំង។
កានស៊ូ ជាខេត្តចិនដំបូងគេដែលទម្លាក់កម្រិតឆ្លើយតបរបស់ខ្លួន ពីកម្រិតទីមួយមកកម្រិតទៅបីកាលពីចុងសប្ដាហ៍មុន។ ខេត្តលាវនីង ក៏បានប្រកាសពីការទម្លាក់កម្រិតអាសន្នរបស់ខ្លួនមកកម្រិតទីបីដូចគ្នានៅថ្ងៃទី២២ ខែកុម្ភៈ។ បន្ទាប់មកពី យូណាន និងគួយចូវ ក៏ទម្លាក់មកកម្រិតបីចាប់ពីថ្ងៃទី២៤ ខែកុម្ភៈតទៅ។ សានស៊ី បានទម្លាក់កម្រិតឆ្លើយតបរបស់ខ្លួនមកថ្នាក់ទី២ ដូចគ្នានឹងខេត្តគ័ងតុងដែរ។ នេះបើតាមការផ្សាយរបស់កាសែតហុងកុង South China Morning Post ។
គ័ងតុង ជាខេត្តមួយដែលរងការវាយប្រហារធ្ងន់ធ្ងរដោយសារ COVID-19 បន្ទាប់ពីហ៊ូប៉ី ដែលជាទីតាំងផ្ទុះវីរុសដំបូងគេ។ ក្នុងខេត្តភាគខាងត្បូងនេះ ករណីឆ្លងវីរុសប្រភេទថ្មី មានចំនួន១៣៤៥ និងករណីស្លាប់៨ ។ គិតត្រឹមថ្ងៃទី២៤ ខែកុម្ភៈ ចំនួនអ្នកស្លាប់នៅចិនដោយសារ COVID-19 មានចំនួន ២៥៩៥ នាក់ដែលភាគច្រើននៅទីក្រុងវូហាន ខេត្តហ៊ូប៉ី ខណៈដែលអ្នកមានជំងឺនេះឡើងដល់ជាង ៧៧០០០ ទៅហើយដែរ។
ប្រធានាធិបតីចិន ស៊ី ជិនភីង បានហៅជំងឺមួយនេះ ជាវិបត្តិសុខាភិបាលដ៏ធំមិនធ្លាប់មានក្នុងប្រវត្តិសាស្ត្រសាធារណរដ្ឋប្រជាមានិតចិន និងជាការសាកល្បងដ៏ធំមួយសម្រាប់ចិនទៀតផង។ នានជំនួបមួយដែលចូលរួមដោយមន្ត្រីជាន់ខ្ពស់រដ្ឋាភិបាលនៅថ្ងៃទី២៣ ខែកុម្ភៈ លោក ស៊ី បានអំពាវនាវឲ្យមានការចូលរួម និងប្រឹងប្រែងកាន់តែខ្លាំងថែមទៀតក្នុងការទប់ស្កាត់ និងគ្រប់គ្រងកូរ៉ូណាវីរុសនេះ ហើយយកឈ្នះសមរភូមិមួយនេះឲ្យបាន។
វិធានការរបស់ចិន បានទទួលការសរសើរខ្លាំងពីអង្គការសុខភាពពិភពលោក ព្រោះទទួលបានផលវិជ្ជមានច្រើន។ ប៉ុន្តែចិនក៏រងការរិះគន់មិនតិចដែរ ព្រោះមិនបានឆ្លើយតបឲ្យបានទាន់ពេលវេលា ទោះជាមានការព្រមានពីការផ្ទុះវីរុសនេះដោយគ្រូពេទ្យម្នាក់ក្ដី។ ការមិនអើពើលើការព្រមាននេះ ធ្វើឲ្យកូរ៉ូណាវីរុស រាលដាលកាន់តែឆាប់រហ័សនាពេលកន្លងមក ហើយក៏ឆ្លងដល់ប្រទេសជិត៣០ហើយនៅជុំវិញពិភពលោក៕
© រក្សាសិទ្ធិដោយ thmeythmey.com