រថយន្ត
អន្តរជាតិ
ចរាចរណ៍យានយន្តនៅក្រុងប៉ារីស ថយចុះ៨,១ភាគរយ ប៉ុន្តែការកកស្ទះនៅតែជាបញ្ហា
×![]()
ដោយ: ធីតា
នារយៈពេលបីឆ្នាំចុងក្រោយនេះ ចរាចរណ៍យានយន្តនៅតាមដងផ្លូវក្នុងក្រុងប៉ារីស បានបន្តថយចុះដ៏គួរឲ្យកត់សម្គាល់។ នេះបើយោងតាមការផ្សាយរបស់ Les Echos ដោយផ្អែកលើទិន្នន័យរបស់អង្គភាពផ្លូវថ្នល់ និងដឹកជញ្ជូនក្រុងប៉ារីស។
ទិន្នន័យបានបង្ហាញថា ចរាចរណ៍យានយន្តនៅប៉ារីស បានថយចុះ ៤,៨ភាគរយនៅឆ្នាំ២០១៧ ថយ ៥ភាគរយនៅឆ្នាំ២០១៨ ហើយបន្តថយ ៨,១ភាគរយទៀតនៅឆ្នាំ២០១៩។ តួលេខនេះ ផ្តល់នូវភាពរីករាយសម្រាប់លោកស្រី Anne Hidalgo ដែលជាអភិបាលក្រុងប៉ារីស ដោយលោកស្រី បានអនុវត្តការផ្តល់អាទិភាពការធ្វើចរាចរណ៍ទៅតាមប្រភេទយានយន្ត។
តាម Les Echos ដដែល ក្រោមអណត្តិរបស់លោក Anne Hidalgo ចរាចរណ៍យានយន្ត បានថយចុះក្នុងរង្វង់១៩ភាគរយ ដែលជានិន្នាការថ្មីមួយនារយៈពេលជិត៣០ឆ្នាំចុងក្រោយ។ បើគិតចាប់តាំងពីឆ្នាំ១៩៩២មក ចរាចរណ៍នៅក្រុងបារីស ក៏បានថយចុះ ៥២ភាគរយផងដែរ។
អត្រាថយចុះនេះ បណ្តាលមកពីការអនុវត្តគោលការណ៍ចំណតចាប់តាំងពីថ្ងៃទី១ ខែមករា ឆ្នាំ២០១៨ ការបិទចរាចរណ៍នៅតាមដងទន្លេ (ឆ្នាំ២០១៦) ក៏ដូចជាការបង្កើតផ្លូវអាទិភាពផ្សេងៗសម្រាប់អ្នកជិះកង់ និងថ្មើរជើង ជាដើម។
ទោះបីជាយ៉ាងណាក៏ដោយ កម្រិតនៃការកកស្ទះចរាចរណ៍ក៏មិនទាន់មានភាពវិជ្ជមានផងដែរ ដោយការកកស្ទះកើន ៣៩ភាគរយ ពោលគឺកើន៣ពិន្ទុបើប្រៀបធៀបនឹងឆ្នាំ២០១៨។ នៅបារាំង ប៉ារីស មានការកកស្ទះចរាចរណ៍ជាងក្រុង Marseille, Bordeaux, Grenoble និង Nice។
របាយការណ៍ក៏បង្ហាញផងដែរថា ការកកស្ទះនៅឲ្យអ្នកបើកបរ ខាតម៉ោងការងារសរុបចំនួន១៦៣ម៉ោងនៅឆ្នាំ២០១៩ ដែលលើសពីឆ្នាំ២០១៨៕
© រក្សាសិទ្ធិដោយ thmeythmey.com
