កីឡាអន្តរជាតិ
អន្តរជាតិ
COVID-19 អុកឡុកអ៊ីតាលីខ្លាំង ធ្វើឲ្យជំនួប Inter-Ludogorets នៅ UEL ត្រូវលេងបិទទ្វារ
× ការប្រកួតពានរង្វាន់ UEFA Europa League វគ្គ៣២ក្រុមចុងក្រោយរវាង Inter Milan និង Ludogorets Razgrad ត្រូវលេងដោយគ្មានអ្នកគាំទ្រ ព្រោះភ័យខ្លាចមានការរីករាលដាលនៃជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ។ នៅអ៊ីតាលី ជំងឺនេះបង្កឲ្យមានអ្នកស្លាប់ និងករណីឆ្លងកើនឡើងច្រើន។
ការសម្រេចធ្វើបែបនេះ កើតឡើងក្នុងកិច្ចពិភាក្សាមួយដែលធ្វើឡើងរវាងក្លិបកីឡាបាល់ទាត់ មន្ត្រីរដ្ឋាភិបាលអ៊ីតាលី និងមន្ត្រីរបស់សហព័ន្ធកីឡាបាល់បាល់ទាត់អ៊ឺរ៉ុប (UEFA)។ Inter នឹងប្រើប្រាស់កីឡដ្ឋាន San Siro ដោយបិទទ្វារ ដើម្បីស្វាគមន៍ក្រុមពីប៊ុលហ្គារី Ludogorets សម្រាប់ជំនួបជើងទី២ នៅរាត្រីថ្ងៃទី២៧ ខែកុម្ភៈ។ កាលពីជើងទី១ នៅទឹកដី Giuseppe Meazza ក្រុមដែលមានលោក Antonio Conte ជាអ្នកចាត់ការនោះ បានយកឈ្នះក្នុងលទ្ធផល ២-០ រួចមកហើយ។
ចំនួនអ្នកឆ្លង២៣១នាក់ បានធ្វើឲ្យអ៊ីតាលីក្លាយជាប្រទេសដែលរាលដាលខ្លាំងជាងគេនៅអឺរ៉ុបលើករណីជំងឺ COVID-19 នេះ ខណៈអ្នកស្លាប់មានចំនួន៧នាក់។ សាលារៀន និងមហាវិទ្យាល័យជាច្រើនក្នុងក្រុង Milan ត្រូវប្រកាសឲ្យបិទទ្វារនៅថ្ងៃទី២៤ កុម្ភៈ បើទោះជាប្រព័ន្ធដឹកជញ្ជូនក្នុងស្រុកនៅដំណើរការធម្មតាក៏ដោយ។
ស្របពេលគ្នានេះ មានការផ្សាយថា ក្រុមអ្នកគាំទ្រ Ludogorets ជាង ៦០០នាក់ បានធ្វើដំណើរពីប៊ុលហ្គារី ទៅកាន់ក្រុង Milan ដើម្បីទស្សនាការប្រកួតជើងទី២ វគ្គ៣២ក្រុមចុងក្រោយ នៃក្របខណ្ឌទី២អឺរ៉ុបនេះ។ បើទោះយ៉ាងនេះក្តី ជំនួបនេះនឹងមិនអនុញ្ញាតឲ្យមានអ្នកគាំទ្រឡើយ ដោយត្រូវបិទទ្វារប្រកួតតែម្តង ដើម្បីទប់ស្កាត់ការឆ្លង COVID-19 ដែលជាជំងឺដ៏កាចសាហាវនាពេលបច្ចុប្បន្ននេះ។
Inter Milan ក៏បានពន្យារពេលការប្រកួត១លើករួចមកហើយក្នុងក្របខណ្ឌ Serie A ក្នុងចំណោមការផ្អាកទាំង៤គូ កាលពីចុងសប្តាហ៍កន្លងទៅ៕
Tag:
UEFA Europa League
COVID-19
Inter Milan
© រក្សាសិទ្ធិដោយ thmeythmey.com