ក្រសួងអប់រំ ប្រាប់មន្ត្រី ឲ្យចូលរួមលុបបំបាត់សកម្មភាពរត់ការសុំឡើងឋានៈនិងប្រាក់ខែ

ជាតិ

សង្គមជាតិ

ក្រសួងអប់រំ ប្រាប់មន្ត្រី ឲ្យចូលរួមលុបបំបាត់សកម្មភាពរត់ការសុំឡើងឋានៈនិងប្រាក់ខែ

25, Feb 2020 , 7:39 pm

រូបភាព

លោក ហង់ ជួន ណារ៉ុន រដ្ឋមន្រ្តីក្រសួងអប់រំ (រូបពីក្រសួងអប់រំ)

ដោយ: ថ្មីៗ

ក្រសួងអប់រំ យុវជន និង កីឡា អះអាងថា ថ្មីៗនេះ មានព័ត៌មានមិនប្រក្រតីពាក់ព័ន្ធនឹងការរត់ការ ដើម្បីឲ្យមានការដំឡើងតួនាទី ឋានន្តរស័ក្តិ និង កាំប្រាក់ ជាដើម។ ក្រសួងអប់រំ ចាត់ទុកអំពើនេះ ថាធ្វើឲ្យប៉ះពាល់ដល់សេចក្តីថ្លៃថ្នូរនិងក្រមសីលធម៌វិជ្ជាជីវៈបុគ្គលិកអប់រំ ព្រមទាំងកិត្តិយសស្ថាប័នយ៉ាងធ្ងន់ធ្ងរ។

តាមរយៈសេចក្តីប្រកាសព័ត៌មាន ដែលចេញនៅថ្ងៃទី២៥ ខែកុម្ភៈ ឆ្នាំ២០២០ ក្រសួងអប់រំ បានអំពាវនាវឲ្យបុគ្គលិកអប់រំគ្រប់លំដាប់ថ្នាក់ ជួយផ្សព្វផ្សាយឲ្យបានទូលំទូលាយ ដើម្បីចូលរួមលុបបំបាត់ភាពមិនប្រក្រតីទាំងនោះ។ លើសពីនេះ ក្រសួងអប់រំ បានជំរុញអង្គភាពនានា ឲ្យបំពេញការងារក្នុងទិសដៅកំណែទម្រង់ការគ្រប់គ្រងបុគ្គលិក និង ពង្រឹងគុណភាពអប់រំប្រកបដោយប្រសិទ្ធភាព។

ក្រសួងអប់រំ រម្លឹកថា ការដំឡើងឋានៈតួនាទី សម្រាប់មន្ត្រីគ្រប់គ្រងគ្រប់លំដាប់ថ្នាក់ គឺអនុវត្តតាមលិខិតបទដ្ឋានដែលនៅមានជាធរមាន តាមរយៈគណៈកម្មការវាយតម្លៃការងារបុគ្គលិក ដោយផ្អែកលើមុខតំណេងតាមប្រភេទក្របខ័ណ្ឌ និងលក្ខណៈវិនិច្ឆ័យ ដែលបានកំណត់ក្នុងច្បាប់។ ក្រសួងអប់រំ បន្តថា ការផ្លាស់ប្តូរក្របខ័ណ្ឌរបស់មន្ត្រីរាជការស៊ីវិល អាចធ្វើទៅបានតែតាមរយៈការប្រឡងជ្រើសរើសរបស់ក្រសួង-ស្ថាប័ននីមួយៗ ដែលត្រូវបានកំណត់ដោយរដ្ឋាភិបាលប៉ុណ្ណោះ។

ក្រសួងអប់រំ បន្ថែមថា ការផ្លាស់ប្តូរស័ក្តិនិងថ្នាក់របស់មន្ត្រីរាជការស៊ីវិល ត្រូវធ្វើឡើងតាមវេនជ្រើសរើសនិងអតីតភាព។ រយៈពេលកំណត់អប្បបរមា សម្រាប់ការដំឡើងថ្នាក់ គឺ២ឆ្នាំ និងត្រូវមានការស្នើសុំត្រឹមត្រូវតាមច្បាប់ស្តីពីឋានានុក្រមដែលសាមីជននៅក្រោមបង្គាប់។

ក្រសួងអប់រំ បញ្ជាក់ថា៖«ការផ្តល់សេវាលើការងារទាំនេះ មិនមានកំណត់ការបង់ថ្លៃសេវា សម្រាប់ដំណើរការជូនសាមីជនទេ»៕