ទូតចិននៅកូរ៉េខាងត្បូង សុំការយោគយល់ប្រជាជនកូរ៉េសម្រាប់ចំណាត់ការចត្តាឡីស័ក

COVID-19

អន្តរជាតិ

ទូតចិននៅកូរ៉េខាងត្បូង សុំការយោគយល់ប្រជាជនកូរ៉េសម្រាប់ចំណាត់ការចត្តាឡីស័ក

26, Feb 2020 , 9:39 pm

រូបភាព

អគ្គរដ្ឋទូតចិនប្រចាំកូរ៉េខាងត្បូង លោក Xing Haiming (Yonhap)

ដោយ:

អគ្គរដ្ឋទូតចិនប្រចាំកូរ៉េខាងត្បូង លោក Xing Haiming បានលើកឡើងនៅថ្ងៃពុធ ២៦ ខែកុម្ភៈថា វិធានការចត្តាឡីស័កដោយបង្ខំដែលដាក់ចេញពីសំណាក់អាជ្ញាធរខេត្តចិនមួយចំនួន មិនមែនមានចេតនាតែសម្រាប់ប្រជាជនកូរ៉េខាងត្បូងឡើយ។ លោក សង្កត់ធ្ងន់ថា លោកសុំសេចក្តីអនុគ្រោះពីប្រជាជនកូរ៉េ។

«ចំណាត់ការរបស់រដ្ឋាភិបាលខេត្តរបស់ចិន ពុំមែនមានចេតនាតែលើប្រជាជនកូរ៉េឡើយ។ វាក៏មានជនជាតិចិនជាច្រើនផងដែរ (ក្នុងចំណោមអ្នកដែលត្រូវចត្តាឡីស័ក)»។ លោក Xing Haiming ប្រាប់អ្នកសារព័ត៌មានបែបនេះ មុនជួបអនុរដ្ឋមន្ត្រីការបរទេសកូរ៉េខាងត្បូង Kim Gunn នៅក្រសួងការបរទេស។ តាមការចុះផ្សាយរបស់ទីភ្នាក់ងារព័ត៌មាន Yonhap លោកអះអាងថា៖«ខ្ញុំសុំការយោគយល់របស់ប្រជាជនកូរ៉េ»។

ចំណាត់ការនេះ បង្កជាកំហឹងដល់ប្រជាជនកូរ៉េខាងត្បូងខណៈអាជ្ញាធរចិនបានដាក់ចេញ ទោះបីកន្លងទៅ រដ្ឋាភិបាលក្រុងសេអ៊ូល បានបដិសេធសំណើសាធារណៈឲ្យហាមអ្នកទេសចរចិនទាំងស្រុងចូលប្រទេស។ ខណៈការហាមប្រាមឆ្លងចូលប្រទេសរបស់អាជ្ញាធរកូរ៉េខាងត្បូងដាក់តែទៅលើខេត្ត ហូប៉ី ដែលជាចំណុចផ្ដើមនៃការផ្ទុះរាលដាល COVID-19 អាជ្ញាធរក្រុង Weihai នៃខេត្ត Shandong ភាគខាងកើតប្រទេសចិន និងតំបន់ផ្សេងទៀត បានអនុវត្តចំណាត់ការដោយគ្មានការប្រកាសជាមុនលើភ្ញៀវទេសចរមកពីប្រទេសកូរ៉េខាងត្បូង។

សាកសួរថាតើអាជ្ញាធរខេត្តទាំងនោះអាចដកហូតចំណាត់ការចត្ដាឡីស័កនេះវិញ លោកអគ្គរដ្ឋទូតចិន Xing អះអាងថា រដ្ឋាភិបាលលោក នឹងប្រឹងប្រែងដោះស្រាយបញ្ហានេះដោយប្រើវិធីសាស្ត្រសមរម្យមួយ។

សូមបញ្ជាក់ថា កាលពីអង្គារ ទី២៥ ខែកុម្ភៈ អាជ្ញាធរក្រុង Weihai បានដាក់អ្នកដំណើរ ១៦៣ នាក់ ដែលមានជនជាតិកូរ៉េខាងត្បូង ១៩ នាក់មកពីជើងហោះហើរមួយនៅព្រលានយន្តហោះអន្តរជាតិ Incheon ឲ្យនៅដាច់ដោយឡែក។ នេះជាគឺជាចំណាត់ការដំបូងបង្អស់ដែលចិនដាក់ចេញប្រឆាំងនឹងភ្ញៀវទេសចរមកពីកូរ៉េ។

ចំណែកអាជ្ញាធរក្រុង Nanjing នៃខេត្ត Jiangsu ក៏បានធ្វើចត្តាឡីស័កលើអ្នកដំណើរ៧០នាក់ក្នុងចំណោមអ្នកដំណើរ១៦៩ លើជើងហោះហើរមួយមកពីក្រុង Incheon ក្រោយពីអ្នកដំណើរចិន ៣នាក់មានរោគសញ្ញាក្តៅខ្លួន។ ក្នុងចំណោមនោះគឺមានជនជាតិកូរ៉េខាងត្បូង ៤០នាក់៕