COVID-19
កីឡាអន្តរជាតិ
អន្តរជាតិ
យុវជនក្រូអាស៊ីម្នាក់ឆ្លង COVID-19 ក្រោយទៅមើល Champions League នៅអ៊ីតាលី
× COVID-19 បានឆ្លងលើបុរសជនជាតិក្រូអាស៊ីម្នាក់ ក្រោយរូបគេទៅមើលការប្រកួត UEFA Champions League ក្នុងទីក្រុង Milan ប្រទេសអ៊ីតាលី កាលពីសប្តាហ៍មុន។
បើតាមការផ្សាយរបស់សារព័ត៌មានក្រូអាស៊ី Večernji យុវជនរូបនោះ បានកត់សម្គាល់រោគសញ្ញារបស់ខ្លួន និងបានទៅជួបវេជ្ជបណ្ឌិតនៅថ្ងៃទី២៣ ខែកុម្ភៈ ក្រោយរូបគេត្រឡប់ពីមើលការប្រកួតក្របខណ្ឌអឺរ៉ុបមួយគូ ដែលគេជឿជាក់ថាជាជំនួបរវាង Atlanta ជាមួយ Valencia ជើងទី១ វគ្គ១៦ក្រុម នៅថ្ងៃទី២០ កុម្ភៈនោះ។
បច្ចុប្បន្ន រូបគេកំពុងសម្រាកព្យាបាលនៅគ្លីនិកជំងឺឆ្លងមួយកន្លែងក្នុងក្រុង Zagreb ប្រទេសក្រូអាស៊ី ក្រោយរកឃើញថាមានជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) នេះ។ តាមពិតទៅក្មេងប្រុសរូបនេះ ជាប្អូនប្រុសរបស់បុរសម្នាក់ដែលរកឃើញថាឆ្លងជំងឺកូរ៉ូណាវីរុសនេះមុនគេក្នុងទឹកដីក្រូអាស៊ី។
បងប្រុសរបស់ក្មេងប្រុសខាងលើ ក៏បានទៅមើលការប្រកួត Champions League នេះដែរ ហើយថែមទាំងយកមិត្តស្រីរបស់ខ្លួនទៅជាមួយផង។ បច្ចុប្បន្ន ពួកគេទាំងបីនាក់កំពុងសម្រាកព្យាបាលនៅគ្លីនិកជំងឺឆ្លងក្នុងក្រុង Zagreb និងទទួលការធ្វើតេស្តរកមេរោគជាថ្មីទៀត ដ្បិតនារីដែលជាមិត្តស្រីនោះ រកមិនឃើញថាឆ្លង COVID-19 ឡើយ។
ប្រទេសនៅអឺរ៉ុបដែលមានករណីឆ្លង COVID-19 មានដូចជា អ៊ីតាលី បារាំង អង់គ្លេស អាល្លឺម៉ង់ ស៊ុយអែត រុស្ស៊ី អេស្ប៉ាញ ហ្វាំងឡង់ ក្រូអាស៊ី និងបែលហ្ស៊ិក។ ក្រៅពីនោះ មាននៅ សហរដ្ឋអាមេរិក កាណាដា អូស្ត្រាលី និងអេហ្ស៊ីប៕
Tag:
COVID-19
UEFA Champions League
© រក្សាសិទ្ធិដោយ thmeythmey.com