អន្តរជាតិ
រូបភាព Bowling Green Daily News
×![]()
ដោយ: តន ចាន់រិទ្ធារ៉ា
វិបត្តិនយោបាយនៅម៉ាឡេស៊ី នៅតែរកច្រកចេញមិនទាន់ឃើញ ខណៈអ្នកនយោបាយធំៗពីរ គឺលោក មហាធៀ មហាម៉ាត់ ដែលលាលែង និងលោក អាន់វ៉ា អ៊ីប្រាហ៊ីម សុទ្ធតែបង្ហាញចេតនាចង់ដឹកនាំប្រទេស។ ការប្រទាញប្រទង់រវាងអ្នកនយោបាយទាំងពីរ កាន់តែធ្វើឲ្យស្ថានការណ៍នៅរដ្ឋអាស៊ីអាគ្នេយ៍មួយនេះតានតឹងមួយកម្រិតទៀត។ ស្របគ្នានេះ មហាក្សត្រម៉ាឡេស៊ី បានបញ្ចប់ជំនួបជាមួយសមាជិកសភាទាំងអស់ដើម្បីសួរពីជំហរលើបេក្ខភាពនាយករដ្ឋមន្ត្រីថ្មី ក៏ដូចជាជម្រើសចុងក្រោយ គឺការបោះឆ្នោតទូទៅ។
នរណាជានាយករដ្ឋមន្ត្រីថ្មីរបស់ម៉ាឡេស៊ី? នេះជាសំណួរនៅចំកណ្ដាលភាពមិនច្បាស់លាស់នៃស្ថានការណ៍នយោបារបស់នៅម៉ាឡេស៊ី ក្រោយការលាលែងពីតំណែងដ៏គួរឲ្យភ្ញាក់ផ្អើលរបស់លោក មហាធៀ មហាម៉ាត់ នៅដើមសប្ដាហ៍នេះ។ ដើម្បីរកនាយករដ្ឋមន្ត្រីថ្មី មហាក្សត្រម៉ាឡេស៊ី បានធ្វើរឿងមិនធ្លាប់កើតឡើងទាល់តែសោះក្នុងឆាកនយោបាយប្រទេស គឺសម្ភាសសមាជិកទាំងអស់ម្ដងម្នាក់ៗដើម្បីសួរពួកគេពីជម្រើសមេដឹកនាំប្រទេសថ្មី។
បច្ចុប្បន្ន អ្នកនយោបាយដែលជាបេក្ខភាពនាយករដ្ឋមន្ត្រីនេះមានពីររូបសំខាន់ គឺលោក មហាធៀ ដែលលាលែង និងកំពុងកាន់តំណែងនាយករដ្ឋមន្ត្រីបណ្ដោះអាសន្ន និងលោក អាន់វ៉ា អ៊ីប្រាហ៊ីម មេដឹកនាំសម្ពន្ធភាព Pakatan Harapan ។ ទាំងលោក មហាធៀ ទាំងលោក អាន់វ៉ា សុទ្ធតែបង្ហាញបំណងដឹកនាំម៉ាឡេស៊ីដូចគ្នា។
ក្នុងសុន្ទរកថាតាមទូរទស្សន៍នៅថ្ងៃទី២៦ ខែកុម្ភៈ លោក មហាធៀ ដែលមានវ័យ៩៤ឆ្នាំទៅហើយ ប្រកាសថា លោកនឹងបន្តដឹកនាំប្រទេស ប្រសិនបើមានការគាំទ្រគ្រប់គ្រាន់។ ជាមួយនឹងការសុំទោសទៅកាន់ប្រជាជនចំពោះបញ្ហានយោបាយបែបនេះ លោក មហាធៀ ក៏បង្ហាញចេតនារៀបចំរដ្ឋាភិបាលរួបរួមថ្មីមួយដែលមានសមាសភាពមកពីបក្សនយោបាយទាំងអស់។ ក្នុងករណី មិនមានការគាំទ្រ លោកនាយករដ្ឋមន្ត្រីបញ្ជាក់ថា លោកនឹងឈរខាងបេក្ខភាពដែលសមាជិកសភាជ្រើសរើសវិញ។
ដោយឡែកលោក អាន់វ៉ា វិញ ក៏ត្រូវបានសម្ពន្ធភាព Pakatan Harapan គាំទ្រជាបេក្ខជននាយករដ្ឋមន្ត្រី។ សម្ពន្ធភាពនេះបច្ចុប្បន្នមានសមាជិកបីបក្សប៉ុណ្ណោះ ហើយបានបាត់បង់សំឡេងភាគច្រើនក្នុងសភាទៅហើយ ក្រោយការចាកចេញរបស់សមាជិកសភាចំនួន៣៧នាក់ដែលគាំទ្រលោក មហាធៀ ។
វិបត្តិនយោបាយម៉ាឡេស៊ី បានប្រែប្រួលភា្លមៗ ក្រោយការលាលែងរបស់លោក មហាធៀ ពីតំណែងនាយករដ្ឋមន្ត្រី។ ដើមហេតុនៃការលាលែងនេះ គឺបណ្ដាលមកពីលោក មហាធៀ មិនពេញចិត្តនឹងសមាជិកនៃសម្ពន្ធភាព Pakatan Harapan ខ្លះដែលនាំគ្នារត់ទៅបង្កើតសម្ពន្ធភាពថ្មី សំដៅរដ្ឋាភិបាលថ្មីមួយដែលបញ្ចូលបក្សប្រឆាំង UMNO របស់អតីតនាយករដ្ឋមន្ត្រី ណាជីប រ៉ាហ្សាក់ ផង។ គោលដៅរបស់ពួកគេ គឺបិទផ្លូវលោក អាន់វ៉ា មិនឲ្យធ្វើនាយករដ្ឋមន្ត្រី និងឲ្យលោក មហាធៀ កាន់តំណែងដល់ចប់អាណត្តិ។
យ៉ាងណាមិញ លោក មហាធៀ បានប្រឆាំង ហើយក៏សម្រេចចិត្តលាលែងពីតំណែងនាយករដ្ឋមន្ត្រីតែម្ដង ព្រមគ្នាតំណែងប្រធានបក្ស Bersatu របស់លោកទៅទៀត ប៉ុន្តែត្រូវបានរាយការណ៍នៅថ្ងៃទី២៧ ខែកុម្ភៈថា លោកនឹងត្រឡប់ទៅដឹកនាំបក្សចាស់ឡើងវិញ។ នៅថ្ងៃទី២៧ ខែកុម្ភៈ មហាក្សត្រម៉ាឡេស៊ី ក៏កោះហៅលោក មហាធៀ ចូលគាល់នារាជវាំងក្រុងគួឡាឡាំពួ។ ប៉ុន្តែមិនមានព័ត៌មានលម្អិតណាមួយត្រូវបានបញ្ចេញពីជំនួបនេះឡើយ។
ស្របគ្នានេះ បក្សប្រឆាំង UMNO និងបក្ស PAS ក៏ស្នើឲ្យមានការរៀបចំការបោះឆ្នោតឡើងវិញដើម្បីជ្រើសរើសសមាជិកសភាទាំង២២២នាក់ និងទម្លាយការទាល់ច្រកផ្នែកនយោបាយ៕
Tag:
ម៉ាឡេស៊ី
មហាធៀ មហាម៉ាត់
អាន់វ៉ា អ៊ីប្រាហ៊ីម
© រក្សាសិទ្ធិដោយ thmeythmey.com
