នាយករដ្ឋមន្ត្រីបណ្ដោះអាសន្នម៉ាឡេស៊ី មហាធៀ មហាម៉ាត់ បានបង្ហើបឲ្យដឹងថា គ្មានបេក្ខភាពណាមួយអាចទទួលបានការគាំទ្រច្រើនលើសលប់ពីសមាជិកសភាទាំង២២២នាក់ឡើយ។ ដូច្នេះ រឿងរើសនាយករដ្ឋមន្ត្រីបន្ទាប់នេះ នឹងធ្លាក់ដល់ដៃសភា។ប៉ុន្តែ លោក សង្កត់ធ្ងន់ទៀតថា ការបោះឆ្នោតមុនកំណត់ នឹងត្រូវរៀបចំឡើង ប្រសិនបើសភាបរាជ័យក្នុងការឈានដល់ការសម្រេចចិត្តរើសប្រមុខរដ្ឋាភិបាលថ្មីបាននោះ។
ថ្លែងនៅសន្និសីទព័ត៌មានមួយ នៅថ្ងៃព្រហស្បតិ៍ ទី២៧ ខែកុម្ភៈ ក្រោយជំនួបជាមួយមហាក្សត្រម៉ាឡេស៊ី លោក មហាធៀ បានបញ្ជាក់ថា កិច្ចប្រជុំសភាពិសេសមួយ នឹងត្រូវប្រព្រឹត្តធ្វើឡើង នាថ្ងៃ០២ ខែមីនា ដើម្បីសម្រេចតំណែងនាយករដ្ឋមន្ត្រីបន្ទាប់របស់ម៉ាឡេស៊ី។
«ក្រោយមហាក្សត្របានសាកសួរសមាជិកសភាទាំងអស់ មហាក្សត្រ បានមានបន្ទូលថា ទ្រង់ពុំអាចស្វែងរកបេក្ខភាពណាដែលមានសំឡេងភាគច្រើនលើសលប់ឡើយ»។ លោកមហាធៀ និយាយដូច្នេះ ដោយបន្ថែមទៀតថា ដោយហេតុនេះ មហាក្សត្របានប្រគល់តួនាទីដល់សភាជាអ្នកសម្រេច។
តាមការចុះផ្សាយរបស់ទូរទស្សន៍សិង្ហបុរី Channel News Asia លោក មហាធៀ គូសបញ្ជាក់ថា៖«សភាជាន់ទាប (Dewan Rakyat) នឹងរៀបចំអង្គប្រជុំមួយ នាថ្ងៃទី២ ខែក្រោយ ក្នុងគោលដៅសម្រេចថាអ្នកណាទទួលបានការគាំទ្រសំឡេងភាគច្រើនដើម្បីក្លាយជានាយករដ្ឋមន្ត្រីបន្ទាប់»។ ម្យ៉ាងទៀត លោក សង្កត់ធ្ងន់ថា៖ «ប្រសិនបើសភាម៉ាឡេស៊ី បរាជ័យក្នុងការស្វែងរកមនុស្សម្នាក់ជាមួយសំឡេងភាគច្រើនលើសលប់ទេនោះ ដូច្នេះយើងនឹងត្រូវតែរៀបចំការបោះឆ្នោតមុនអាណត្តិ»។
ទោះជាបែបនេះក្តី លោក មហាធៀ លើកឡើងទៀតថា លោកនឹងមិនបន្តកាន់តួនាទីជានាយករដ្ឋមន្ត្រីឡើយ ប្រសិនបើលោកពុំបានជាប់ឈ្មោះជាបេក្ខភាពដែលទទួលគាំទ្រច្រើនពីផ្ទៃក្នុងបក្សក្នុងអង្គប្រជុំសភាពិសេសទេនោះ។ ត្រង់ចំណុចនេះ លោក និយាយដូច្នេះ៖«នរណាឈ្នះ ខ្ញុំនឹងទទួលយក»។ លើលទ្ធភាពដែលប្រធានបក្ស Bersatu លោក Muhyiddin Yassin ក្លាយជាបេក្ខភាពសម្រាប់នាយករដ្ឋមន្ត្រី លោក មហាធៀ អះអាងថា៖«ប្រសិនបើមនុស្សគ្រប់គ្នាជ្រើសរើសគាត់ ខ្ញុំយល់ព្រម»។
សូមបញ្ជាក់ថា មហាក្សត្រម៉ាឡេស៊ី Abdullah Ri’ayatuddin Al-Mustafa Billah Shah បានកោះហៅសមាជិកសភាទាំងអស់ចូលគាល់ក្នុងរាជវាំងដើម្បីប្រកាសពីជម្រើសបេក្ខភាពសម្រាប់នាយករដ្ឋមន្ត្រី ក្រោយពីលោក មហាធៀ បានលាលែងតំណែង កាលពីថ្ងៃចន្ទដើមសប្តាហ៍នេះ។
គណបក្សជនជាតិភាគតិចរួមរួបម៉ាឡេស៊ី Bersatu ដែលដកខ្លួនពីសម្ព័ន្ធភាព Pakatan Harapan (PH) សម្ដែងការគាំទ្រលោក មហាធៀ បន្តជានាយករដ្ឋមន្ត្រី។ បក្ស៣ផ្សេងទៀតដែលនៅសេសសល់ក្នុងសម្ព័ន្ធភាពនេះ ប្រកាសជំហរគាំទ្រលោក Anwar Ibrahim ដែលជាប្រធានបក្សយុត្តិធម៌ប្រជាជន (PKR)។ ដោយឡែក បក្ស UMNO របស់អតីតនាយករដ្ឋមន្ត្រី ណាជីប រ៉ាហ្ស៉ាក់ និងបក្សឥស្លាមម៉ាឡេស៊ី (PAS) បានស្នើឲ្យរំលាយសភាចោល ហើយរៀបចំការបោះឆ្នោតថ្មី។
ទោះជាបែបនេះក្តី លោក មហាធៀ បានបញ្ជាក់ក្នុងសុន្ទរកថាលើកញ្ចក់ទូរទស្សន៍កាលពីពុធ ទី២៦ ខែកុម្ភៈថា លោកចង់បានរដ្ឋាភិបាលបង្រួបបង្រួមដែលមិនប្រកាន់បក្ខនិយម។ តែគំនិតនេះ ត្រូវបដិសេធដោយសម្ព័ន្ធ PH, បក្ស UMNO និងបក្សឥស្លាមម៉ាឡេស៊ី (PAS)។
ម៉ាឡេស៊ី មានកៅអីសភា ២២២ អសនៈ។ សម្ព័ន្ធភាព PH មានសមាជិកសភាសហព័ន្ធចំនួន ៩២នាក់ ដែលរួមមាន បក្សសកម្មភាពប្រជាធិបតេយ្យ(DAP) ៤២នាក់, ៣៩នាក់មកពីបក្ស PKR និង១១នាក់មកពីបក្សទំនុកចិត្តជាតិ (Parti Amanah Negara)។
សមាជិកសភា១១នាក់មកពីបក្ស PKR របស់ Anwar ដែលបានលាឈប់ពីបក្ស និងសម្ព័ន្ធភាព PH កាលពីថ្ងៃចន្ទ បានសន្យារគាំទ្រលោក មហាធៀ ខណៈបក្ស Bersatu មាន ២៦ អសនៈ។ សម្ព័ន្ធភាពរណសិរ្សជាតិ (Barisan Nasional) ដែលមានបក្ស UMNO ក្នុងនោះ មានសមាជិកសភា ៤២នាក់ ខណៈបក្ស PAS មាន ១៨ អសនៈ៕