COVID-19
អន្តរជាតិ
បារម្ភ COVID-19 រដ្ឋាភិបាលជប៉ុនបិទសាលារៀន តែរងការរិះគន់ព្រោះមិនសួររដ្ឋបាលតំបន់ជាមុន រូបភាព Xinhua
× រដ្ឋាភិបាលជប៉ុន នៅថ្ងៃទី២៧ ខែកុម្ភៈ បានប្រកាសបិទសាលារៀនស្ទើរគ្រប់កម្រិតនៅទូទាំងប្រទេស ក្រោមវិធានការទប់ទល់ការរាដាលជំងឺផ្លូវដង្ហើមបង្កដោយកូរ៉ូណាវីរុស (COVID-19) ។ ការសម្រេចចិត្តនេះ ធ្វើឲ្យរដ្ឋាភិបាលថ្នាក់តំបន់ និងមាតាបិតាសិស្សដែលរងប៉ះពាល់ ភ្ញាក់ផ្អើល និងមិនសប្បាយចិត្ត។ ម្យ៉ាង ការសម្រេចចិត្តនេះ មិនត្រូវបានដឹងឮជាមុនដោយមន្ត្រីតំបន់ ហើយម្យ៉ាងទៀត រយៈពេលនៃការបិទនេះ គឺយូរពេកដែរ។
នាយករដ្ឋមន្ត្រី ស៊ិនហ្សូ អាបេ ជាអ្នកចេញមុខប្រកាសវិធានការបិទសាលារៀនទូទាំងប្រទេស ដើម្បីបង្ការការឆ្លង និងរាលដាលកូរ៉ូណាវីរុសប្រភេទថ្មី។ ក្នុងសន្និសីទសារព័ត៌មាននៅយប់ថ្ងៃទី២៧ ខែកុម្ភៈ លោក អាបេ ប្រកាសថា សាលារៀនកម្រិតបឋមសិក្សា អនុវិទ្យាល័យ និងវិទ្យាល័យ នឹងត្រូវផ្អាករយៈពេលមួយខែ។ ករណីលើកលែង នឹងត្រូវអនុវត្តសម្រាប់ថ្នាក់មត្តេយ្យ និងថ្នាក់កម្រិតខ្ពស់មានសាកលវិទ្យាល័យជាដើម។
នៅជប៉ុន រដ្ឋាភិបាលថ្នាក់ជាតិ មិនអាចចេញបញ្ជាឲ្យបិទសាលារៀនបានឡើយ ដោយវាជាអំណាចរបស់ក្រុមប្រឹក្សាតំបន់ប៉ុណ្ណោះ។ យ៉ាងណាមិញ រដ្ឋាភិបាលថ្នាក់ក្រោមជាតិនៅជប៉ុនដែលត្រូវបានជ្រើសរើសតាមការបោះឆ្នោតដោយឡែក អះអាងថា ពួកគេមិនត្រូវបានសួរនាំជាមុន ឬក៏ព្រមានពីការសម្រេចចិត្តរបស់រដ្ឋាភិបាលខាងលើឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
លោក Toshihito Kumagai អភិបាលក្រុង Chiba ភាគខាងកើតទីក្រុង Tokyo បានបង្ហោះសារមិនពេញចិត្តលើ Twitter របស់ខ្លួន ថា៖ «ការសម្រេចចិត្តរបស់រដ្ឋាភិបាលនៅតូក្យូ ជារឿងគួរឲ្យតក់ស្លុត។» ក្នុងសំណេរដែលមានន័យព្រមាន លោក Kumagai បន្តថា សង្គមជប៉ុន អាចដួលរលំ ព្រោះឪពុកម្ដាយដែលធ្វើជាបុគ្គលិកសុខាភិបាល ឬក៏ធ្វើការងារផ្សេងទៀត នឹងជួបបញ្ហាលំបាកដោយសារការសម្រេចចិត្តបែបនេះ។
ចំណែកលោក Hideaki Omura អភិបាលក្រុង Aichi លើកោះហ៊ុងស៊ូវិញ ក៏ភ្ញាក់ផ្អើលនឹងការសម្រេចចិត្តរបស់រដ្ឋាភិបាលលោក អាបេ ដែរ ប៉ុន្តែលោកអះអាងថា ការសម្រេចចិត្តបែបនេះ ក៏មិនមែនជារឿងខុសឆ្គងក្នុងការស្ថានការណ៍ដែល COVID-19 បង្កការគំរាមកំហែងខ្លាំងក្នុងប្រទេស។ មិនមែនតែមន្ត្រីឡើយ សូម្បីតែប្រជាជប៉ុនខ្លះ ក៏មិនពេញចិត្តនឹងការរឿងនេះ រហូតរិះគន់ថា រដ្ឋាភិបាលគ្មានសមត្ថភាពដោះស្រាយបញ្ហាទៀតផង។
តាមពិតទៅ មុនការប្រកាសរបស់លោក អាបេ សាលារៀនខ្លះបានបិទទ្វារទៅហើយ ដើម្បីបង្ការទុកមុន។ សាលាបឋម និងអនុវិទ្យាល័យនៅកោះហុកកៃដូ បានបិទទ្វារ ក្រោយការរកឃើញករណីឆ្លង COVID-19 និងការស្លាប់របស់បុរសវ័យ៨០ឆ្នាំម្នាក់ដោយកូរ៉ូណាវីរុស។ នៅទីក្រុងអូសាកាវិញ សាលារៀនជាច្រើន ក៏ត្រូវបិទរយៈពេលពីរសប្ដាហ៍ចាប់ពីថ្ងៃទី២៩ ខែកុម្ភៈ។
គិតត្រឹមថ្ងៃទី២៨ ខែកុម្ភៈ ករណីឆ្លងនៅជប៉ុនមានចំនួន១៨៧ និង៨នាក់។ នៅលើនាវា Diamond Princess វិញ ករណីឆ្លងមានច្រើនជាង៧០០ឯណោះ។ អ្នកដំណើរខ្លះ ដែលត្រូវបានធ្វើតេស្ត ហើយមានលទ្ធផលអវិជ្ជមាននោះ បែរជារកឃើញថា មានឆ្លង COVID-19 វិញពេលទៅដល់ប្រទេសកំណើតពួកគេ៕
Tag:
COVID-19
ជប៉ុន
ស៊ិនហ្សូ អាបេ
© រក្សាសិទ្ធិដោយ thmeythmey.com