COVID-19
អន្តរជាតិ
ប្រធានាធិបតីម៉ុងហ្គោលីទៅចិន ដើម្បីផ្តល់អំណោយចៀម៣ម៉ឺនក្បាលក្នុងនាមជាអ្នកជិតខាងល្អ ប្រធានាធិបតីចិន ស៊ី ជិនភីង ចាប់ដៃសមភាគីម៉ុងហ្គោលី Khaltmaa Battulga ។ រូបភាព Xinhua
× ប្រធានាធិបតីម៉ុងហ្គោលី Khaltmaa Battulga បានក្លាយជាប្រមុខរដ្ឋបរទេសទីមួយធ្វើដំណើរទៅកាន់ចិន ដែលកំពុងប្រយុទ្ធប្រឆាំងជំងឺរលាកសួតធ្ងន់ធ្ងរបង្កដោយកូរ៉ូណាវីរុសថ្មី (COVID-19) ។ លោក Battulga ក៏ប្រកាសផ្ដល់សត្វចៀមបីម៉ឺនក្បាលឲ្យចិន បន្ថែមពីលើសម្ភារជាច្រើនដែលត្រូវបានឧបត្ថម្ភនាពេលកន្លងមកដើម្បីចែករំលែកការលំបាករបស់ប្រទេសជិតខាង។ ប្រធានាធិបតីចិន ស៊ី ជិនភីង បានអរគុណសមានចិត្តរបស់ម៉ុងហ្គោលី ដែលតែងជួយចិនរហូតមក។
ជាអ្នកជិតខាង ចិន និងម៉ុងហ្គោលី តែងតែអាចពឹងពាក់គ្នាទៅវិញទៅមក។ នេះជាការលើកឡើងរបស់ប្រធានាធិបតីចិន ស៊ី ជិនភីង នាជំនួបជាមួយសមភាគីម៉ុងហ្គោលី Khaltmaa Battulga នៅថ្ងៃទី២៧ ខែកុម្ភៈ។ លោក Battulga ជាប្រមុខរដ្ឋបរទេសដំបូងគេដែលជាន់ទឹកដីចិន ស្របពេលដែលជំងឺ COVID-19 កំពុងរាលដាលនៅឡើយ។
បើតាមទីភ្នាក់ងារព័ត៌មានរដ្ឋចិន Xinhua លោក ស៊ី ចាត់ទុកដំណើរទស្សនកិច្ចរបស់លោក Battulga ពេលនេះ ជាការបង្ហាញពីការយកចិត្តទុកដាក់របស់មេដឹកនាំម៉ុងហ្គោលីលើទំនាក់ទំនងទ្វេភាគី ក៏ដូចជាការគាំទ្រក្នុងនាមជាអ្នកជិតខាងផងដែរ។ ប្រធានាធិបតីចិន បានប្រាប់សមភាគីម៉ុងហ្គោលីពីការប្រឹងប្រែងពេញទំហឹងរបស់បក្សកុម្មុយនីស្តចិន និងរដ្ឋាភិបាលចិនក្នុងការគ្រប់គ្រង និងទប់ស្កាត់វីរុសប្រភេទថ្មីនេះ មិនឲ្យរាលដាលថែមទៀត។
ជាមួយការបង្ហាញការសោកស្ដាយចំពោះអ្វីដែលកើតឡើង លោក Battulga និយាយថា ប្រជាជនម៉ុងហ្គោលី ឈរជាមួយប្រជាជនចិនក្នុងកាលៈទេសៈនេះ។ ទីភ្នាក់ងារព័ត៌មានរដ្ឋចិន បានស្រង់សម្ដីប្រធានាធិបតីម៉ុងហ្គោលីទៀតថា ប្រជាជនម៉ុងហ្គោលីគ្រប់ឋានៈ បានចូលរួមយ៉ាងសកម្មក្នុងយុទ្ធនាការរៃអង្គាសដើម្បីឧបត្ថម្ភដល់ចិន។ លោកបន្តថា លើសពីនោះ ម៉ុងហ្គោលី នឹងឧបត្ថម្ភចៀមចំនួនបីម៉ឺនក្បាលទៀតឲ្យចិនបន្ថែមពីលើការឧបត្ថម្ភមុនៗ។
មកទល់ពេលនេះ ម៉ុងហ្គោលី មិនទាន់រាយការណ៍ពីករណីឆ្លង ឬស្លាប់ដោយសារ COVID-19 ឡើយ។ វិធានការដែលប្រទេសមួយនេះបានអនុវត្តរួមមាន ការបិទព្រំដែន និងការរឹតត្បិតការធ្វើដំណើរមកពីចិនផងដែរ។
មេដឹកនាំបរទេសដំបូងគេដែលជាន់ទឹកដីក្រោយផ្ទុះ COVID-19 គឺនាយករដ្ឋមន្ត្រីកម្ពុជា សម្ដេច ហ៊ុន សែន កាលពីថ្ងៃ៥ ខែកុម្ភៈកន្លងទៅ។
គិតត្រឹមថ្ងៃទី២៨ ខែកុម្ភៈ ករណីឆ្លងជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ឡើងដល់ជាង៨៣០០០នាក់ករណី ហើយរាលដល់៥៣ប្រទេស។ អ្នកស្លាប់៤៤នាក់ទៀតនៅចិន ធ្វើឲ្យចំនួនអ្នកស្លាប់សរុបឡើងដល់២៨៥៨នាក់។ កូរ៉េខាងត្បូង មានអ្នកឆ្លងទីពីរជាមួយចំនួនជាង២០០០នាក់ អ៊ីតាលីមាន៦៥៥នាក់។ អ្នកជំងឺជាង៣៦០០នាក់ បានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ៕
Tag:
ចិន
ម៉ុងហ្គោលី
COVID-19
© រក្សាសិទ្ធិដោយ thmeythmey.com