ភ្នំពេញ៖ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ឲ្យកម្មករនិយោជិត រាយការណ៍ទៅក្រសួងការងារ ឬទៅសាលារាជធានីភ្នំពេញ ប្រសិនបើមានករណីដំឡើងថ្លៃផ្ទះហួសកម្រិត។
ធ្វើជាវាគ្មិនក្នុងសន្និសីទសារព័ត៌មានស្តីពីវឌ្ឍនភាពនិងទិសដៅការងាររបស់ក្រសួងការងារ ដែលរៀបចំឡើងនៅទីស្តីការគណៈរដ្ឋមន្ត្រី កាលព្រឹកថ្ងៃទី២៧ ខែកុម្ភៈ ឆ្នាំ២០២០ លោក ហេង សួរ ថ្លែងថា នៅពេលជួបករណីដំឡើងថ្លៃផ្ទះហួសកម្រិត កម្មករមានជម្រើស២ គឺរាយការណ៍ឬផ្ដល់ព័ត៌មានឲ្យជាក់លាក់ពីទីតាំងផ្ទះ តាមរយៈទំព័រហ្វេសប៊ុករបស់សាលារដ្ឋបាលរាជធានីភ្នំពេញ ឬទៅក្រសួងការងារ រាយការណ៍ដោយផ្ទាល់។
លោក បញ្ជាក់ថា៖«ប្រសិនបើមានករណីដំឡើងថ្លៃផ្ទះ ដោយមិនសមស្រប បងប្អូនអត់ជូនដំណឹងមក តើអាជ្ញាធរនិងក្រសួង ធ្វើយ៉ាងម៉េចដឹងថាម្ចាស់ផ្ទះដំឡើងថ្លៃ អ៊ីចឹងអ្វីដែលយើងសុំកិច្ចសហការ ប្រសិនបើមានករណីដំឡើងថ្លៃហួសហេតុ [ផ្ទុយ] សេចក្ដីណែនាំ តាមកិច្ចសន្យាពិសេស គឺសុំបងប្អូនជូនដំណឹង»។
ជាមួយគ្នានេះ អ្នកនាំពាក្យក្រសួងការងារ ស្នើសុំឲ្យមានកិច្ចសហការពីសាមីជន ប្រសិនមានអារម្មណ៍ថា ខ្លួនត្រូវបានគេរំលោភបំពាន ដើម្បីជូនដំណឹងទៅអាជ្ញាធរពាក់ព័ន្ធ ទើបអាចមានលទ្ធភាពដោះស្រាយបាន។ យ៉ាងណាក៏ដោយ លោក សុំឲ្យរាយការណ៍ឲ្យចំគោលដៅ ពីលេខផ្ទះ និងខណ្ឌ ដោយបញ្ជាក់ថា អ្នករាយការណ៍មិនចាប់បាច់បញ្ចេញអត្តសញ្ញាណក៏បានដែរ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ប្រាប់សារព័ត៌មានថ្មីៗ តាមទូរស័ព្ទ នៅថ្ងៃទី២៨ ខែកុម្ភៈនេះ ថា តាមការសង្កេតរបស់លោក ឈានចូលឆ្នាំ២០២០ភ្លាម តម្លៃផ្ទះ មានការដំឡើងច្រើន ហើយខាងសមាជិកនិយោជិតរបស់លោក ជួបបញ្ហានេះដែរ។ ប៉ុន្តែតួលេខជាក់លាក់ ភាគីខាងលោក មិនទាន់ស្រាវជ្រាវនៅឡើយទេ។
លោក និយាយថា៖«សម្រាប់ការដំឡើងថ្លៃផ្ទះ ហួសកម្រិត ខ្ញុំគិតថា ដំឡើងចាប់ពី១០ដុល្លារឡើងទៅ គឺជាចំណុចមួយហួសកម្រិត ព្រោះកម្មករ ចំណាយច្រើន ពាក់ព័ន្ធនឹងទំនិញទីផ្សារ រួមទាំងថ្លៃផ្ទះផង។ ប៉ុន្តែ ចំនួនជាក់លាក់ គឺមិនទាន់មានស្ដង់ដាវាស់វែងនៅឡើយទេ»។
ពាក់ព័ន្ធនឹងការឲ្យកម្មកររាយការណ៍តាមទំព័រហ្វេសប៊ុករបស់សាលារាជធានីភ្នំពេញ ឬទៅរាយការណ៍នៅក្រសួងការងារផ្ទាល់ពីករណីនេះ លោក វន ពៅ មើលឃើញថា មិនមែនជាភាពងាយស្រួយឡើយចំពោះកម្មករ ព្រោះពួកគាត់មិនទាន់ចេះប្រើបច្ចេកទេសជំនាញនេះឡើយ។
ទន្ទឹមនឹងនេះ លោក យល់ថា ក្រសួងនិងសាលារដ្ឋបាលរាជធានីភ្នំពេញ គួរតែបង្កើតក្រុមអធិការកិច្ចឯករាជ្យមួយ ដោយភាគីសហជីពចូលរួមជាមួយផង សម្រាប់តាមដានស៊ើបអង្កេត ដោះស្រាយក្នុងករណីនេះ។
នៅថ្ងៃទី២៨ ខែកុម្ភៈនេះ សារព័ត៌មានថ្មីៗ មិនអាចសុំការអធិប្បាយជុំវិញករណីដំឡើងថ្លៃផ្ទះនេះបន្ថែមពីលោក ហេង សួរ បានឡើង ដោយសារលោក មិនទទួលទូរស័ព្ទ។
សូមបញ្ជាក់ថា នៅឆ្នាំ២០១៩ ក្រសួងការងារនិងអាជ្ញាធរខណ្ឌ បានចុះសម្របសម្រួល មិនតិចជាង១០ករណីឡើយ ពាក់ព័ន្ធនឹងការដំឡើងប្រាក់ថ្លៃផ្ទះ។ នេះបើតាមការលើកឡើងរបស់ លោក ហេង សួរ ក្នុងសន្និសីទសារព័ត៌មាននៅគណៈរដ្ឋមន្ត្រី៕