COVID-19
អន្តរជាតិ
លោកអគ្គនាយកអង្គការសុខភាពពិភពលោក Tedros Adhanom Ghebreyesus (AFP)
×![]()
«វីរុស (COVID-19) អត់ចេះគោរពព្រំដែនប្រទេសណាមួយឡើយ»។ លោកអគ្គនាយកអង្គការសុខភាពពិភពលោក Tedros Adhanom Ghebreyesus អះអាងបែបនេះ ខណៈលើកទឹកចិត្តឲ្យប្រទេសទាំងអស់ចាត់វិធានការខ្លាំងបន្ថែមក្នុងគោលដៅបង្ការការរាលដាលជំងឺផ្លូវដង្ហើមកូរ៉ូណា (COVID-19)។ ទន្ទឹមនេះ ប្រមុខអង្គការអន្តរជាតិនេះ បានព្រមានថា ប្រទេសនានាពុំគួរបង្កើតកំហុសធ្ងន់ធ្ងរមួយ ដោយសន្មតទុកថា ប្រទេសខ្លួនចៀសផុតពីការរាតត្បាតនៃវីរុសនេះ។
ថ្លែងនៅសន្និសីទព័ត៌មានមួយក្នុងទីក្រុង ហ្សឺណែវ ប្រទេសស្វីស នាថ្ងៃព្រហស្បតិ៍ ២៧ ខែកុម្ភៈ លោក Tedros គូសបញ្ជាក់ថា៖«ប្រទេសទាំងអស់ គប្បីត្រៀមលក្ខណៈសម្រាប់ករណីឆ្លង (COVID-19) ដំបូង […] ពុំគួរមានប្រទេសណាមួយសន្មតទុកថា ខ្លួននឹងគ្មានកើតមានករណីឆ្លង ហើយវាអាចជាកំហុសដ៏អន្តរាយមួយ យ៉ាងជាក់ច្បាស់ណាស់»។ ត្រង់នេះ លោកសង្កត់ធ្ងន់ថា៖«វីរុសនេះ ពុំចេះគោរពព្រំដែនប្រទេសណាមួយឡើយ»។
ទោះជាបែបនេះក្តី លោក Tedro អះអាងទៀតថា វីរុសនេះ មានលទ្ធភាពក្នុងការឆ្លងរាលដាលទៅគ្រប់ទីកន្លែង ក៏ប៉ុន្តែលោកសង្កត់ធ្ងន់ថា៖«នេះពុំមែនជាពេលវេលាសម្រាប់ការភ័យខ្លាចឡើយ។ នេះគឺជាពេលវេលាសម្រាប់ការចាត់វិធានការដើម្បីបង្ការការឆ្លង និងជួយសង្គ្រោះជីវិតមនុស្សឥឡូវនេះ»។
ដោយលើកឡើងពីប្រទេសមួយចំនួនដែលពុំមានរកឃើញករណីឆ្លង COVID-19 បន្ថែមក្នុងពេលជាង២សប្តាហ៍ចុងក្រោយ រួមមាន កម្ពុជា ឥណ្ឌា ហ្វីលីពីន និងវៀតណាម ជាដើមនោះ លោកប្រមុខ WHO បានព្រមានថា ហ្វ្រាំងឡង់ និងស៊ុយអែត បានរកឃើញករណីឆ្លងថ្មីកាលពីថ្ងៃពុធសប្តាហ៍នេះ បន្ទាប់ពីស្ងាត់ជាងពីរសប្តាហ៍កន្លងទៅ។ នេះបើតាមសេចក្តីប្រកាសព័ត៌មានចុះផ្សាយលើវេបសាយរបស់អង្គការសហប្រជាជាតិ (UN)។
ទាក់ទិនរឿងនេះ លោកអគ្គនាយក Tedros អះអាងដូច្នេះថា ចំណុចសំខាន់នោះគឺ ពុំមែនត្រឹមតែបង្ការករណីឆ្លង COVID-19 មកដល់ប្រទេសពួកគេឡើយ ហើយអ្វីដែលសំខាន់គឺត្រង់ចំណាត់ការដែលពួកគេដាក់ចេញ នៅពេលពួកគេមានករណីឆ្លង។ បើតាមលោក រាល់ប្រទេសទាំងអស់ គួរតែត្រៀមលក្ខណៈរួចរាល់ក្នុងការរកឃើញករណីឆ្លងឲ្យបានលឿន, ដាក់អ្នកជំងឺនោះឲ្យនៅដាច់ដោយឡែក, តាមរកអ្នកដែលអ្នកជំងឺប៉ះពាល់, ផ្ដល់ការថែទាំជំងឺដែលមានគុណភាព, បង្ការការរាលដាលនៅមន្ទីរពេទ្យ និងបង្ការការឆ្លងតាមសហគមន៍ផងដែរ៕
Tag:
អង្គការសុខភាពពិភពលោក
WHO
កូរ៉ូណាវីរុស
COVID-19
© រក្សាសិទ្ធិដោយ thmeythmey.com
