ជាតិ
នយោបាយជាតិ
ត្រាំ លើកពេលកិច្ចប្រជុំកំពូលពិសេសអាស៊ាន- អាមេរិក ដើម្បីទុកពេលប្រយុទ្ធប្រឆាំង COVID-19
Donald Trump និងមេដឹកនាំអាស៊ានថតរូបជុំគ្រួសារក្នុងកិច្ចប្រជុំកំពូលអាស៊ាន - អាមេរិកនៅទីក្រុងម៉ានីលនាថ្ងៃទី ១៣ ខែវិច្ឆិកាឆ្នាំ ២០១៧ (រូបថតពី ស្ថានទូតអាមេរិកប្រចាំនៅឡាវ)
×![]()
ដោយ: ឡាយ សុភាវតី
ភ្នំពេញ៖ ប្រធានាធិបតីអាមេរិក ដូណាល់ ត្រាំ សម្រេចលើកពេលកិច្ចប្រជុំកំពូលពិសេសអាស៊ាន- អាមេរិក ដើម្បីយកពេលវេលាទៅផ្ដោតលើការប្រយុទ្ធប្រឆាំងមេរោគកូរ៉ូណាថ្មី COVID-19។ នេះបើតាមលិខិតស្ថានទូតកម្ពុជាប្រចាំសហរដ្ឋអាមេរិក ដែលបានជូនដំណឹងដល់រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា កាលថ្ងៃទី២៨ កុម្ភៈ ឆ្នាំ២០២០។ 
ស្ថានទូតកម្ពុជាប្រចាំសហរដ្ឋអាមេរិក ដែលទទួលបានព័ត៌មានពីលោក David Stilwell ជំនួយការរដ្ឋមន្រី្តការបរទេស ទទួលបន្ទុកកិច្ចការអាស៊ីនិងប៉ាស៊ីហ្វិក និងលោក Mattew Pottinger ជំនួយការរបស់ប្រធានាធិបតី ដោយបានប្រាប់ឯកអគ្គរាជ/រដ្ឋទូតអាស៊ាន តាមរយៈកិច្ចប្រជុំតាមទូរស័ព្ទ (Conference call) ដូច្នេះថា «លោក Donald Trump បានសម្រេចចិត្តលើកកិច្ចប្រជុំកំពូលពិសេសអាស៊ាន-អាមេរិក។ មូលហេតុនៃលើកកិច្ចប្រជុំនេះ គឺដើម្បីផ្ដោតយកចិត្តទុកដាក់លើការប្រយុទ្ធប្រឆាំងនឹងការរីករាលរបស់មេរោគកូរ៉ូណា COVID-19»។
កិច្ចប្រជុំកំពូលពិសេសអាស៊ាន-អាមេរិកនេះ គ្រោងនឹងរៀបចំនៅពាក់កណ្ដាលខែមីនាខាងមុខ។ ប៉ុន្តែការសម្រេចចិត្តលើកពេលប្រជុំនេះ មិនបានកំណត់កាលបរិច្ឆេទប្រជុំនៅពេលណាវិញនោះទេ។
សូបញ្ជាក់ថា លោក ដូណាល់ ត្រាំ ធ្លាប់បានខកខានទៅចូលរួមកិច្ចប្រជុំកំពូលមេដឹកនាំអាស៊ាន កាលពីខែវិច្ឆិកា ឆ្នាំ២០១៩ ក្នុងទីក្រុងបាងកកកប្រទេសថៃ ដោយឱ្យទីប្រឹក្សាសន្តិសុខជាតិ ជាបេសកជនពិសេសតំណាងលោកចូលរួម។
គិតមកដល់ថ្ងៃទី២៨ កុម្ភៈនេះ អ្នកឆ្លងមេរោគកូរ៉ូណាមានជាង៨៤០០០នាក់ ក្នុងនោះមានអ្នកស្លាប់២៩២៣នាក់ និងអ្នកជាសះស្បើយជិត៤០០០០នាក់ ។ ប្រទេស៥៧នៅលើពិភពលោក កំពុងរងគ្រោះដោយសារវីរុសកូរ៉ូណានេះ ។ នេះបើតាមតួលេខរបស់គណៈកម្មការសុខាភិបាលជាតិចិន៕
Tag:
អាស៊ាន – អាមេរិក
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
