ជាតិ
សេដ្ឋកិច្ច
ក្រសួងសេដ្ឋកិច្ច នឹងចាត់វិធានការលើម្ចាស់គណនីហ្វេសប៊ុក ដែលផ្សព្វផ្សាយលក់អចលនវត្ថុ គ្មានអាជ្ញាបណ្ណ
× ភ្នំពេញ៖ ម្ចាស់គណនីហ្វេសប៊ុកណា ដែលផ្សព្វផ្សាយលក់អចលនវត្ថុ គ្មានអាជ្ញាបណ្ណនោះ នឹងត្រូវប្រឈមមុខច្បាប់។ នេះជាការព្រមានរបស់ក្រសួងសេដ្ឋកិច្ច និងហិរញ្ញាវត្ថុ តាមរយៈសេដ្ឋកិច្ចជូនដំណឹង ចុះថ្ងៃទី២១ កុម្ភៈកន្លងមក។
សេចក្តីជូនដំណឹង បានបញ្ជាក់ដូច្នេះថា៖«ក្រសួងសេដ្ឋកិច្ច និងហិរញ្ញវត្ថុ នឹងចាត់វិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនី ដែលធ្វើការផ្សព្វផ្សាយលក់គម្រោងអភិវឌ្ឍអចលនវត្ថុ ដែលគ្មានអាជ្ញាបណ្ណ»។
មូលហេតុដែលក្រសួងសេដ្ឋកិច្ច ចេញវិធានការបែបនេះ ធ្វើឡើងក្រោយពីក្រសួងពិនិត្យឃើញថា បណ្ដាញសង្គមហ្វេសប៊ុក និងតេឡេក្រាមមួយចំនួន បានផ្សព្វផ្សាយលក់គម្រោងអភិវឌ្ឍន៍អចលនទ្រព្យ ដែលគ្មានការអនុញ្ញាតត្រឹមត្រូវពីក្រសួង។ ក្នុងនោះរួមមាន លំនៅដ្ឋាន អគារសហកម្មសិទ្ធ និងដីឡូតិ៍ជាដើម។
ជាមួយគ្នានេះក្រសួង ក៏ស្នើឱ្យប្រជាពលរដ្ឋ ដែលមានបំណងចង់ទិញអចលនវត្ថុទាំងនេះ ត្រូវមានការប្រុងប្រយ័ត្នខ្ពស់ ដោយត្រូវត្រួតពិនិត្យព័ត៌មានសំខាន់ៗមួយចំនួនដូចជា៖ អាជ្ញាបណ្ណអាជីវកម្មអភិវឌ្ឍលំនៅដ្ឋាន អគារសហកម្មសិទ្ធ និងដីឡូតិ៍ ដែលចេញដោយក្រសួងសេដ្ឋកិច្ច និងហិរញ្ញវត្ថុ , លិខិតអនុញ្ញាតសាងសង់ ដែលចេញដោយក្រសួងរៀបចំដែនដី នគរូបនីយកម្ម និងសំណង់ រួមទាំងវិញ្ញាបនបត្រសម្គាល់ម្ចាស់អចលនវត្ថុ និងឯកសារបង់ពន្ធអចលនវត្ថុជាដើម៕
Tag:
សេដ្ឋកិច្ច
អចលនវត្ថុ
© រក្សាសិទ្ធិដោយ thmeythmey.com