ភ្នំពេញ៖ គ្មានករណីភ្ញៀវទេសចរណ៍ជប៉ុនស្លាប់នៅប្រាសាទអង្គវត្ត ដោយសារវីរុស Covid 19ឡើយ។ នេះជាការអះអាងរបស់អ្នកនាំពាក្យអាជ្ញាធរ តបទៅគណនីហ្វេសប៊ុកឈ្មោះ Sdam Husen និងទំព័រហ្វេសប៊ុកផ្សេងៗ ដែលបានចុះផ្សាយថា មានភ្ញៀវទេសចរជនជាតិជប៉ុនម្នាក់បានស្លាប់ដោយ Covid19 នាថ្ងៃទី២៩ ខែកុម្ភៈ ឆ្នាំ២០២០។
លោក ឡុង កុសល បានបញ្ជាក់នៅលើហ្វេសប៊ុកអាជ្ញាធរជាតិអប្សរាថា រូបភាពដែលគណនីហ្វេសប៊ុកខាងលើយកមកផ្សព្វផ្សាយនេះ គឹជារូបភាពចាស់ប៉ុណ្ណោះ។ ត្រង់ចំណុចនេះ លោក កុសល បានពន្យល់ថា៖ «រូបភាពដែលបានប្រើប្រាស់នោះ គឺជាព្រឹត្តិការណ៍បានកើតឡើងនៅថ្ងៃទី១៤ ខែកុម្ភៈ ឆ្នាំ២០២០ ដែលស្ត្រីភ្ញៀវទេសចរជនជាតិជប៉ុនម្នាក់ អាយុ៧២ឆ្នាំ បានកើតខ្យល់នៅចំណុចព្រះពាន់ និងត្រូវបានបញ្ជូនទៅព្យាបាលតាមរថយន្តពេទ្យ Royal Angkorភ្លាមៗ»។
សម្រាប់លោក កុសល ការចុះផ្សាយរូបភាព និងព័ត៌មានមិនពិតនេះ នឹងធ្វើឱ្យពលរដ្ឋយល់ច្រឡំ ដែលនាំឱ្យខាតប្រយោជន៍ជាតិ។«អាជ្ញាធរជាតិអប្សរា ស្នើដល់ម្ចាស់គេហទំព័រនិងបណ្តាញទំនាក់ទំនងសង្គមទាំងអស់ សូមបញ្ឈប់រាល់សកម្មភាពចែកចាយនិងផ្សព្វផ្សាយនូវព័ត៌មានផ្ទុយពីការពិត ដែលនាំមកនូវការខាតបង់ប្រយោជន៍ដល់សេដ្ឋកិច្ចជាតិ បាត់បង់កិត្តិយសជាតិ រួមនឹងសតិអារម្មណ៍របស់ភ្ញៀវទេសចរ និងប្រជាជាតិខ្មែរ»។ នេះជាការអំពាវនាវរបស់អ្នកនាំពាក្យអាជ្ញាធរជាតិអប្សរា៕