ជាតិ
សង្គមជាតិ
សេដ្ឋកិច្ច
និស្សិតកសិកម្មនៅកំពង់ចាម ច្នៃសាច់ស្វាយចន្ទី ជាចាហួយ តំណាប់ ទឹកផ្លែឈើ ស្រា និង ជីទឹក សិស្សវិទ្យាស្ថានជាតិកសិកម្មកំពង់ចាម កែច្នៃសាច់ស្វាយចន្ទីជា តំណាប់ ចាហួយ ស្រា ទឹកផ្លែឈើ និង ជីទឹក (រូបពី លោក ស៊ុម ណយ)
×
ភ្នំពេញ៖ និស្សិតមួយក្រុមមានគ្នា៦នាក់ នៅវិទ្យាស្ថានជាតិសកិកម្មកំពង់ចាម បានកែច្នៃសាច់ស្វាយចន្ទីជា ចាហួយ តំណាប់ ទឹកផ្លែឈើ ស្រា និង ជីទឹក។ កន្លងមក អ្នកដាំនិងអ្នកទិញ ផ្ដោតសំខាន់យកតែគ្រាប់ តែសាច់ស្វាយចន្ទីដែលមានចំនួនច្រើនជាងគ្រាប់ ត្រូវបានបោះចោលទាំងស្រុង។ ដោយសារបញ្ហានេះ ធ្វើឲ្យក្រុមយុវជនទាំង៦នាក់ សម្រេចយកសាច់ស្វាយចន្ទី មកសិក្សានិងកែច្នៃ ដើម្បីទាញជាផលប្រយោជន៍ និងជួយដល់កសិករ។
និស្សិតទាំង៦នាក់ ដែលសិក្សានៅវិទ្យាស្ថានជាតិកសិកម្មកំពង់ចាម នៅភូមិទី៦ សង្កាត់វាលវង់ ក្រុងកំពង់ចាម បានចាប់ផ្ដើមយកសាច់ស្វាយចន្ទីមកសិក្សានិងកែច្នៃនៅដើមឆ្នាំ២០២០នេះ រហូតដល់អំឡុងខែកុម្ភៈនេះ អាចកែច្នៃចេញជា ចាហួយ តំណាប់ ទឹកផ្លែឈើ ស្រា និង ជីទឹក។ បច្ចុប្បន្ន ក្រុមយុវជននេះ ដែលរៀនជំនាញវិទ្យាសាស្ត្រកសិកម្មឆ្នាំទី៣នេះ កំពុងតែសិក្សានិងស្រាវជ្រាវបន្ថែម ពីអត្ថប្រយោជន៍និងពិនិត្យតាមដានបន្តលើផលិតផលថ្មីនេះ។
ក្រុមសិស្សដែលកែច្នៃសាច់ស្វាយចន្ទី
កញ្ញា ពៅ គឹមឈង ជាប្រធានក្រុម បានផ្ដល់បទសម្ភាសន៍ដល់សារព័ត៌មានថ្មីៗតាមទូរស័ព្ទនៅថ្ងៃទី២៦ ខែកុម្ភៈថា ការកែច្នៃនេះ ជាគោលបំណងបង្កើតឬកែច្នៃផលិតផលដែលគ្មានតម្លៃ ឲ្យទៅជាផលិតផលមានតម្លៃ អាចលក់នៅលើទីផ្សារ និងសម្រាប់ជួយដល់ជីវភាពកសិករ។
កញ្ញា គឹមឈង និយាយថា៖«ការយកសាច់ស្វាយចន្ទីមកច្នៃនេះ ដោយកន្លងមក គេដាំយកតែគ្រាប់សម្រាប់លក់តែប៉ុណ្ណោះ។ ប្រមូលគ្រាប់ស្វាយចន្ទី បាន១គីឡូក្រាម តែសាច់ស្វាយ ដែលបោះបង់ចោល អាចមានដល់ទៅ១០គីឡូក្រាម។ ដូច្នេះ ទើបយើងលើកបញ្ហានេះ ពិភាក្សាគ្នា រួមជាមួយលោកគ្រូ-អ្នកគ្រូនៅសាលា ហើយបន្ទាប់ពីមានការជ្រោមជ្រែងពីពួកគាត់ ទើបក្រុមខ្ញុំចាប់ផ្ដើមសហការគ្នាសាកល្បងផលិត»។
ទន្ទឹមនឹងនេះ កញ្ញា បានបញ្ជាក់ថា ប្រសិនបើទទួលបានជោគជ័យក្នុងការផលិតនេះ ក្រុមកញ្ញា ទទួលស្វាគមន៍រាល់កិច្ចសហការពីអ្នកមានបំណងចង់វិនិយោគជាមួយ។ ជាមួយគ្នាដែរ នៅអំឡុងពេលនេះ ក្រុមរបស់កញ្ញា ក៏រង់ចាំទទួលការណែនាំ ការឧបត្ថម្ភផ្សេងៗ និងការរិះគន់ដើម្បីស្ថាបនា ក្នុងគោលបំណងឲ្យដំណើរការទៅមុខបានកាន់តែល្អ។
យុវជនរូបនេះ បានអំពាវនាវប្រជាពលរដ្ឋ ជួយគាំទ្រផលិតផលខ្មែរ។ រីឯ យុវជន ដែលកំពុងសិក្សាផ្សេងៗទៀត ត្រូវចេះស្រាវជ្រាវ សម្រាប់ជួយខ្លួនឯង គ្រួសារ និង សង្គម ជាពិសេសគឺពលរដ្ឋខ្មែរ៕
Tag:
ស្វាយចន្ទី
ខេត្តកំពង់ចាម
© រក្សាសិទ្ធិដោយ thmeythmey.com