ជាតិ
បទយកការណ៍ / បទសម្ភាសន៍
២៥ខេត្ត/រាជធានី
ប្រាសាទបន្ទាយឆ្មារ តំបន់ទេសចរណ៍សក្កានុពល ដែលមិនគួរមើលរំលង
× បន្ទាយមានជ័យ៖ ប្រាសាទបន្ទាយឆ្មារ ជាប្រាសាទមានវ័យចំណាស់ កសាងនៅចុងសតវត្សទី១២ ដើមសតវត្សទី១៣ ស្ថិតនៅភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ បច្ចុប្បន្នប្រាសាទនេះ ត្រូវបានជួសជុល និងថែទាំបានត្រឹមត្រូវ ពីអាជ្ញាធរនៅក្នុងតំបន់នោះ។ ក្នុងបទសម្ភាស ជាមួយសារព័ត៌មានថ្មីៗ លោក គិត សុគួន មគ្គុទេសក៍ទេសចរ នៃសហគមន៍បន្ទាយឆ្មារ បានលើកឡើងថា ចំណុចពិសេសរបស់ប្រាសាទបន្ទាយឆ្មារ គឺជាប្រាសាទដែលធំ មានរូបចម្លាក់ព្រះលោកេស្វរៈ ដែលតំណាងឲ្យខេត្តបន្ទាយមានជ័យ, រូបកំពូលមុខបួន និងទិដ្ឋភាពជុំវិញប្រាសាទមានភាពស្អាត។
ដើម្បីជ្រាបច្បាស់ សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយលោក គិត សុគួន មគ្គុទេសក៍ទេសចរនៃសហគមន៍បន្ទាយឆ្មារដូចតទៅ៖
មានចម្ងាយ ៦០គីឡូម៉ែត្រពីទីរួមខេត្តបន្ទាយមានជ័យ ប្រាសាទបន្ទាយឆ្មារ កសាងដើម្បីឧទ្ទិសដល់បុត្រព្រះបាទជ័យវរ្ម័នទី៧ ព្រះនាម ស្រិន្ទ្រកុមារ។ ប្រាសាទវ័យចំណាស់មួយនេះ មានបណ្ដោយ ៧៧០ម៉ែត្រ និងទទឹង៦៩០ម៉ែត្រ ។
ក្នុងបរិវេណប្រាសាទបន្ទាយឆ្មារ មានភាពស្រស់ស្អាត អមដោយដើមឈើត្រឈឹងត្រឈៃ គួរជាទីគយគន់។ ទោះបីមានភាពស្រស់ស្អាត និងស្ថិតនៅភាគពាយ័ព្យនៃប្រទេសកម្ពុជា ប្រាសាទបន្ទាយឆ្មារ មិនសូវមានភ្ញៀវទេសចរអន្តរជាតិ មកទស្សនានោះទេ។ លោក គិត សុគួន មគ្គុទេសក៍ទេសចរនៃសហគមន៍បន្ទាយឆ្មារ បញ្ជាក់ថាយ៉ាងដូច្នេះថា៖ «ក្នុងមួយឆ្នាំ មានភ្ញៀវទេសអន្តរជាតិចន្លោះពី២ពាន់ទៅ៣ពាន់នាក់ប៉ុណ្ណោះ ដែលមកទស្សនានៅប្រាសាទបន្ទាយឆ្មារ។ ប៉ុន្តែភ្ញៀវទេសចរជាតិ មានច្រើន»។
បើតាមលោក គិត សុគួន កត្តាធម្មជាតិ និងកត្ដាសង្គ្រាម បានធ្វើឲ្យប្រាសាទបន្ទាយឆ្មារ មានការរលំ និងបាក់បែក។ សូមបញ្ជាក់ថា ក្រៅពីប្រាសាទបន្ទាយឆ្មារ នៅក្នុងតំបន់នេះ មានប្រាសាទចំនួន ៨ផ្សេងទៀត ដែលនៅជិតប្រាសាទបន្ទាយឆ្មារផងដែរ៕
Tag:
ប្រាសាទបន្ទាយឆ្មារ
បន្ទាយមានជ័យ
© រក្សាសិទ្ធិដោយ thmeythmey.com