COVID-19
អន្តរជាតិ
×![]()
ដោយ: រួបរួម
គ្រួសារកាណាដាមួយត្រូវបានបណ្តេញចេញពីយន្តហោះ កាលពីថ្ងៃទី២៣ ខែកុម្ភៈ ក្នុងដំណើរតាម Air Transat ពីក្រុងកេប៊ិច ទៅប៉ារីស ដោយសារតែកូនអាយុ២១ខែរបស់ពួកគាត់ បានក្អក។
ខណៈដែលយន្តហោះ ជិតចេញដំណើរពីអាកាសយានដ្ឋានកេប៊ិច ក្រុមអ្នកដំណើរបាននាំគ្នារាយការណ៍ទៅបុគ្គលិកយន្តហោះ ពីករណីទារិកាម្នាក់ដែលបានក្អក។
បើតាមការផ្សាយរបស់ Radio Canada ទារិកាតូចនោះ មានជំងឺគ្រុនក្តៅធម្មតា ប៉ុន្តែក្រោយទទួលបានការរាយការណ៍ពីអ្នកដំណើរផ្សេងទៀតដែលខ្លាចពីករណី COVID-19 គ្រួសារនោះ ត្រូវបានស្នើសុំឲ្យចាកចេញពីយន្តហោះ។
ទោះជាយ៉ាងណាក៏ដោយ ក្រុមហ៊ុនបានអះអាងថា ការស្នើឲ្យគ្រួសារនោះចេញពីយន្តហោះ មិនមានទំនាក់ទំនងជាមួយ COVID-19 នោះឡើយ ប៉ុន្តែជាការអនុវត្តវិធានការការពារ។
ទាក់ទងករណីនេះ ថ្នាក់ដឹកនាំយន្តហោះ បានស្នើសុំឯកសារពេទ្យពីម្តាយទារិកា ទាក់ទងនឹងការបញ្ជាក់ពីស្ថានភាពជំងឺរបស់ទារិការូបនោះ ប៉ុន្តែពួកគាត់មិនមានឯកសារណាមួយដែលត្រូវបង្ហាញនោះឡើយ។
ទារិកា មានកំដៅ៣៩,៦អង្សារសេ ប៉ុន្តែគ្រូពេទ្យដល់ទៅពីរនាក់ បានអះអាងថា ទារិកា និងគ្រួសាររបស់នាងអាចធ្វើដំណើរបាន។ «យើងនៅតែត្រូវបានបណ្តេញចេញពីយន្តហោះ បីជាមានការអះអាងពីរពេទ្យពីរនាក់ក៏ដោយ។ ខ្ញុំគិតថា នេះជារឿងមិនធម្មតាឡើយ»។ អ្នកស្រី Clementine Ferraton ម្តាយទារិកា បានរៀបរាប់យ៉ាងដូច្នេះប្រាប់ La Nouvelle Tribune។
លោកវេជ្ជបណ្ឌិត Horacio Arruda ទទួលបន្ទុកសុខភាពសារធារណៈកាណាដា បានទទួលស្គាល់ចំពោះរឿងរ៉ាវដ៏ខកចិត្តរបស់គ្រួសារទារិកា។ លោកបានវាយតម្លៃថា៖ «ភាពភ័យខ្លាច ឆ្លងខ្លាំងជាងវីរុសទៅទៀត»។
គ្រួសាររបស់ទារិកា បានសម្រេចប្តឹងប្រឆាំងក្រុមហ៊ុនយន្តហោះ ដើម្បីទារជំងឺចិត្ត ដោយសារតែពួកគាត់បង្ខំចិត្តលុបចោលដំណើរវិស្សមកាលក។ តាមការផ្សាយរបស់ La Depeche ក្រុមហ៊ុន Air Transat បានសម្រេចចិត្តសងថ្លៃសំបុត្រយន្តហោះវិញ ដែលមានជាង៣០០០ដុល្លារអាមេរិក៕
Tag:
COVID-19
© រក្សាសិទ្ធិដោយ thmeythmey.com
