COVID-19
អន្តរជាតិ
COVID-19 ឆ្លងដល់៦៤ប្រទេសក្រោយសាធារណរដ្ឋដូមីនិក និងឆេក រកឃើញករណីដំបូង រដ្ឋមន្ត្រីសុខាភិបាលសាធារណរដ្ឋឆេក លោក Adam Vojtech
× សាធារណរដ្ឋឆេក និងសាធារណរដ្ឋដូមីនិក ទើបប្រកាសពីការរកឃើញករណីឆ្លងកូរ៉ូណាវីរុស (COVID-19) នាថ្ងៃទី១ ខែមីនា នេះ ដោយឆែកមាន៣ករណី និងសាធារណរដ្ឋដូមីនិក មាន១ករណី។ មកដល់ពេលនេះ ប្រទេសសរុបឡើងដល់៦៤ហើយ ដែលមានករណីឆ្លង COVID-19។ ករណីនៅហុងកុង ម៉ាកាវ និងតៃវ៉ាន់ ស្ថិតក្នុងក្របខណ្ឌប្រទេសចិន ខណៈអង់គ្លេស អៀរឡង់ខាងជើង និងវេលស៍ រាប់បញ្ចូលក្នុងករណីរួមនៅចក្រភពអង់គ្លេស។
នៅសាធារណរដ្ឋឆេក រដ្ឋមន្ត្រីសុខាភិបាលលោក Adam Vojtech បានអះអាងពីការរកឃើញបីករណីដំបូង ដោយ២ករណីនៅក្រុង Prague និង១ករណីនៅក្រុង Labem។ ករណីទី១ គឺបុរសឆេកដែលបានទៅចូលរួមសន្តិសីទនៅអ៊ីតាលី ដែលមិត្តរបស់អ្នកជំងឺម្នាក់នៅអ៊ីតាលីផងដែរ។ ករណីទី២ គឺស្ត្រីវ័យក្មេងអាមេរិកម្នាក់ដែលបានសិក្សានៅក្រុង Milan ប្រទេសអ៊ីតាលី ហើយបានទៅ Prague ដើម្បីទេសចរណ៍។ រីឯករណីទី៣ គឺបុរសឆេកម្នាក់ដែលបានទៅលំហែកាយជិះស្គីនៅក្រុង Veneto ប្រទេសអ៊ីតាលី។
ដោយឡែក សាធារណរដ្ឋដូមីនិកក្លាយជាប្រទេសដំបូងនៅតំបន់ការ៉ាអ៊ីប ដែលមានករណីឆ្លង COVID-19។ រដ្ឋមន្ត្រីក្រសួងសុខភាពសាធារណៈ លោក Rafael Sanchez Cardenas បានបញ្ជាក់ថា អ្នកជំងឺគឺជាជនជាតិអ៊ីតាលី ដែលបានសម្រាកព្យាបាលនៅពេទ្យយោធា Ramon de Lara នៅក្រុង San Isidro។
ប្រទេស៦២កន្លងមកដែលមានករណីឆ្លង COVID-19 រួមមាន៖
-អាស៊ី៖ ចិន (បញ្ចូលទាំង ហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ អ៊ីស្រាអែល កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន កាតា អាស៊ែបៃហ្សង់។
-អឺរ៉ុប៖ អ៊ីតាលី បារាំង ចក្រភពអង់គ្លេស (មានករណីនៅអង់គ្លេស វេលស៍ និងអៀរឡង់ខាងជើង) អាល្លឺម៉ង់ ស៊ុយអែត រុស្ស៊ី អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង ដាណឺម៉ាក អេស្តូនី ហូឡង់ និងសាំងម៉ារាំង លីទុយអានី បេឡារុស អ៊ីស្លង់ ម៉ូណាកូ ហ្សកហ្ស៊ី អៀរឡង់ លុចសំបួ និងអាមេនី។
អាមេរិកខាងជើង៖ សហរដ្ឋអាមេរិក កាណាដា ម៉ិកស៊ិក។
អាមេរិកឡាទីន៖ ប្រេស៊ីល, អេក្វាឌ័រ។
អាហ្វ្រិក៖ អេហ្ស៊ីប, អាល់ហ្សេរី, នីហ្សេរីយ៉ា។
អូសេអានី៖ អូស្ត្រាលី, នូវែលសេឡង់៕
© រក្សាសិទ្ធិដោយ thmeythmey.com