អន្តរជាតិ
COVID-19៖ អាមេរិកបញ្ជាក់ករណីស្លាប់ទី២លើបុរសវ័យ៧០ឆ្នាំមានជំងឺប្រចាំកាយស្រាប់ ប្រធានពេទ្យក្នុងតំបន់ King County ប្រកាសពីករណីស្លាប់ទី២ ក្នុងសន្និសីទព័ត៌មាន មួយ កាលពីថ្ងៃ១ មីនា ២០២០ (AFP)
× ករណីស្លាប់ទី២ដោយសារជំងឺផ្លូវដង្ហើមកូរ៉ូណា (COVID-19) ត្រូវបានបញ្ជាក់ក្នុងតំបន់ King County ក្រុង Seattle នៃរដ្ឋវ៉ាស៊ីនតោន។ នេះបើតាមសេចក្តីប្រកាសព័ត៌មានរបស់អាជ្ញាធរសុខាភិបាលអាមេរិក ដោយដកស្រង់ចុះផ្សាយដោយទូរទស្សន៍ CNN ផ្សាយនៅថ្ងៃទី១ ខែមីនា (ម៉ោងអាមេរិក)។
អ្នកជំងឺរូបនេះ គឺជាបុរសវ័យ៧០ឆ្នាំម្នាក់ ដែលមានជំងឺប្រចាំកាយស្រាប់។ បើតាមសេចក្តីប្រកាសព័ត៌មានដដែលនេះ បុរសរូបនេះ បានសម្រាកព្យាបាលនៅមន្ទីរពេទ្យ ហើយបានបាត់បង់ជីវិត កាលពីថ្ងៃ២៩ ខែកុម្ភៈ។ ការស្លាប់របស់បុរសរូបនេះ គឺជាការស្លាប់ COVID-19 ទី២ ក្នុងសហរដ្ឋអាមេរិក។
សូមបញ្ជាក់ថា ករណីស្លាប់ទី១ដោយសារជំងឺ COVID-19 គឺលើបុរសវ័យជាង៥០ឆ្នាំម្នាក់នៅរដ្ឋវ៉ាស៊ីនតោន។ ភ្លាមៗ អភិបាលរដ្ឋវ៉ាស៊ីនតោន លោក Jay Inslee បានប្រកាសដាក់រដ្ឋក្នុងស្ថានភាពអាសន្ន។ គិតត្រឹមព្រឹកថ្ងៃចន្ទ ទី២ ខែមីនានេះ (ម៉ោងកម្ពុជា) សហរដ្ឋអាមេរិក មានករណីឆ្លង COVID-19 ចំនួន៨១ករណីហើយ ខណៈទីក្រុងញូវយ៉ក រកឃើញករណីឆ្លងដំបូងរបស់ខ្លួន។ ក្នុងនោះ មនុស្ស ៩ នាក់ បានជាសះស្បើយ៕
Tag:
សហរដ្ឋអាមេរិក
កូរ៉ូណាវីរុស
COVID-19
© រក្សាសិទ្ធិដោយ thmeythmey.com