អន្តរជាតិ
បារាំងបិទសារមន្ទីរ Louvre បណ្ដោះអាសន្ន ដោយសារព្រួយបារម្ភពីករណីឆ្លង COVID-19
សារមន្ទីរ Louvre។ រូបភាព៖ AFP
×![]()
ដោយ: ធៀន ភារិន្ទ
សារមន្ទីរ Louvre ត្រូវបានបារាំងសម្រេចបិទបណ្តោះអាសន្ននៅថ្ងៃទី១ ខែមីនា ដោយសារតែព្រួយបារម្ភពីករណីឆ្លងCOVID-19។ ការសម្រេចរបស់បារាំងនៅពេលនេះធ្វើឡើង ស្របពេលករណីឆ្លងនៅក្នុងប្រទេសកើនដល់ ១៣០ករណី និងស្លាប់ ២ករណី និងខណៈពេល អ៊ីតាលីបានរកឃើញករណីឆ្លងកូរ៉ូណាវីរុសកើនដល់ ១៦៩៤ករណី និងស្លាប់ ៤១ករណី។ 
អស់រយៈពេលជាង ២ខែកន្លងមកនេះ COVID-19 បានឆ្លងទៅបណ្តាប្រទេសច្រើនជាង ៦០។ បើគិតត្រឹមថ្ងៃទី២ ខែមីនា វីរុសប្រភេទថ្មីនេះ ត្រូវបានគេរកឃើញរហូតដល់ជិត ៩ម៉ឺនករណី និងស្លាប់ជាង ៣ពាន់ករណីនៅទូទាំងពិភពលោក។ ពាក់ព័ន្ធនឹងបញ្ហានេះ ប្រទេសជាច្រើន បានចេញវិធានការរៀងៗខ្លួន ដើម្បីទប់ស្កាត់ការរីកសាយភាយនៃកូរ៉ូណាវីរុស។ ក្នុងនោះបារាំង ដែលបានរកឃើញ ១៣០ករណីដែរ ក៏បានចេញវិធានការហាមឃាត់ការជួបប្រជុំគ្នាលើសពី ៥ពាន់នាក់ នាថ្ងៃទី២៩ ខែកុម្ភៈកន្លងទៅ។
ពាក់ព័ន្ធនឹងករណីឆ្លង COVID-19នេះ សារមន្ទីរ Louvre ត្រូវបានបារាំងសម្រេចបិទទ្វារ នាថ្ងៃទី១ ខែមីនា ដោយមិនបានផ្តល់ដំណឹងជាមុនឡើយ។ ការណ៍បិទទ្វារសារមន្ទីរដ៏ល្បីល្បាញមួយនេះ ធ្វើឡើងបន្ទាប់ពីបុគ្គលិកទាំងអស់ បានបដិសេធបើកទ្វារទទួលភ្ញៀវទេសចរ ដោយសារតែការព្រួយបារម្ភពីករណីឆ្លង អាចកើតមាននៅក្នុងសារមន្ទីរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
សម្រាប់ភ្ញៀវទេសចរ ដែលបានកក់សំបុត្ររួច បានត្អូញត្អែរពីបញ្ហាសារមន្ទីរបានបិទទ្វារ ដោយមិនផ្តល់ដំណឹងជាមុន។ យ៉ាងណាក៏ដោយ សម្រាប់សំណងនៃថ្លៃសំបុត្រ មិនទាន់មានការបញ្ជាក់ណាមួយពីសារមន្ទីរនៅឡើយទេ។
បើតាមតួលេខរបស់សារមន្ទីរផ្ទាល់ ភ្ញៀវទេសចរ ៩,៦លាននាក់ បានទៅទស្សនាសារមន្ទីរ Louvre ក្នុងឆ្នាំ ២០១៩។ គ្រាន់តែមួយថ្ងៃៗ ចំនួនភ្ញៀវទេសចរជាមធ្យម ត្រូវបានគេរំពឹងថាមានចំនួន ១៥០០០នាក់ បានចូលមើលផ្ទាំងគំនូរ សម្បត្តិបុរាណ និងវត្ថុផ្សេងទៀត ក្នុងសារមន្ទីរដ៏ល្បីមួយនេះ។
សូមបញ្ជាក់ថា ក្រៅពីវិធានការហាមឃាត់ការជួបជុំលើសពី ៥ពាន់នាក់ បារាំងក៏មានវិធានការផ្សេងទៀតផងដែរ ដូចជាបិទសាលារៀន និងបិទវិហារសាសនាមួយចំនួន នៅក្នុងតំបន់ ដែលកំពុងអុកឡុកដោយសារតែកូរ៉ូណាវីរុស។ លើសពីនេះព្រឹត្តិការណ៍ពាក់កណ្តាលម៉ារ៉ាតុន នាទីក្រុងប៉ារីសនៅថ្ងៃទី១ ខែមីនា ក៏ត្រូវបានគេលុបចោល ដោយសារតែភ័យខ្លាចករណីឆ្លង COVID-19៕
Tag:
បារាំង
COVID-19
© រក្សាសិទ្ធិដោយ thmeythmey.com
