COVID-19
អន្តរជាតិ
តុលាការចិន កាត់ទោសប្រហារជីវិតបុរសម្នាក់ដែលចាក់មន្ត្រីត្រួតពិនិត្យ COVID-19 ប្រភពរូប៖ AP
× តុលាការចិនមួយ បានកាត់ទោសប្រហារជីវិតបុរសម្នាក់ ដែលបានចាក់សម្លាប់មន្ត្រី២នាក់នៅទីតាំងត្រួតពិនិត្យមួយបង្កើតឡើងដើម្បីគ្រប់គ្រងការរីករាលដាលជំងឺផ្លូវដង្ហើមកូរ៉ូណា (COVID-19) ។
នៅថ្ងៃអាទិត្យ ទី០១ មីនា តុលាការចិនមួយ បានកាត់ទោសប្រហារជីវិតលើបុរសជនជាតិចិនអាយុ២៣ឆ្នាំម្នាក់ ក្រោយពីលោកបានចាក់សម្លាប់មន្ត្រី២នាក់ នៅទីតាំងត្រួតពិនិត្យក្នុងភូមិមួយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
ហេតុការណ៍នេះ បានកើតឡើង កាលពីថ្ងៃ ០៦ កុម្ភៈ នៅពេលបុរសដៃដល់ឈ្មោះថា Ma Jianguo បានបើកបររថយន្តមួយឆ្លងកាត់ទីតាំងត្រួតពិនិត្យមួយនៅភូមិ Luo Meng តំបន់ Honghe នៃខេត្ត Yunnan ទីដែលលោកត្រូវបានអាជ្ញាធរបញ្ឈប់។
បន្ទាប់ពីលោក Ma បានបដិសេធសហការជាមួយមន្ត្រីត្រួតពិនិត្យទាំងពីរនាក់នោះ អ្នករួមដំណើរជាមួយលោក បានចាប់ផ្ដើមព្យាយាមរើរបាំងផ្លូវចេញ។ តុលាការចិន បញ្ជាក់បែបនេះ ដោយបន្ថែមថា មន្ត្រីបានទាញទូរសព្ទហើយថតវីដេអូលោក Ma និងអ្នកដទៃទៀត។
ដោយកំហឹង បុរសជនជាតិចិនត្រកូល Ma បានយកកាំបិតចាក់លើមន្ត្រីម្នាក់លើដើមទ្រូង និងពោះលើមន្ត្រីម្នាក់ ហើយបានបន្តទៅចាក់មន្ត្រីម្នាក់ទៀតដែលព្យាយាមចូលទៅជួយមិត្តរួមការងារ។ ជាចុងក្រោយ បុរសជាមន្ត្រីចិនទាំងពីរនាក់ បានបាត់បង់ជីវិតដោយសាររបួស។
តុលាការចិនដដែល អះអាងទៀតថា ទោះបីជាលោក Ma បានចូលខ្លួនសារភាពទោសកំហុសដោយស្ម័គ្រចិត្ត និងថា ការសម្លាប់នេះ គឺជាអំពើឃោរឃៅបំផុតមួយ។
សូមបញ្ជាក់ថា គិតត្រឹមព្រឹកថ្ងៃចន្ទទី ០២ ខែមីនា ជំងឺ COVID-19 បានឆ្លងជិត៨៩០០០ករណីហើយ ហើយបានសម្លាប់មនុស្សជាង៣០០០នាក់ ដែលភាគច្រើនក្នុងប្រទេសចិន។ ការឆ្លងបែបនេះ បានធ្វើឲ្យបណ្ដាប្រទេសជាច្រើនបង្កើតទីតាំងត្រួតពិនិត្យសីតុណ្ហភាព, បង្កើនការរឹតត្បិតការធ្វើដំណើរ និងការបិទទីក្រុង ឬតំបន់ដែលមានករណី COVID-19 ជាដើម៕
Tag:
ចិន
COVID-19
កូរ៉ូណាវីរុស
© រក្សាសិទ្ធិដោយ thmeythmey.com