អន្តរជាតិ
អ៊ីស្រាអែល បោះឆ្នោតលើកទីបីក្នុងពេលមិនដល់មួយឆ្នាំ ដើម្បីបំបែកការជាប់គាំងនយោបាយ
× នៅថ្ងៃទី២ ខែមីនានេះ ពលរដ្ឋអ៊ីស្រាអែលមានឈ្មោះបោះឆ្នោត បានទៅកាន់មណ្ឌលបោះឆ្នោតនៅទូទាំងប្រទេសដើម្បីចូលរួមក្នុងការជ្រើសរើសសមាជិកសភាអាណត្តិនេះ។ នេះជាការបោះឆ្នោតលើកទីបីក្នុងរយៈពេលមិនដល់១២ខែផង ខណៈការបោះឆ្នោតពីរលើកកន្លងទៅ មិនអាចបង្កើតរដ្ឋាភិបាលបាន។ លោកនាយករដ្ឋមន្ត្រី បេនចាមីន ណេតាន់យ៉ាហូ រំពឹងទទួលបានសំឡេងច្រើនដើម្បីបង្កើតរដ្ឋាភិបាលថ្មី ប៉ុន្តែត្រូវតទល់ជាមួយគូប្រជែងស្រួចស្រាល បេននី ហ្កាន ។
ជាលើកទីបីក្នុងរយៈពេលមិនដល់មួយឆ្នាំ អ៊ីស្រាអែលបានរៀបចំការបោះឆ្នោតម្ដងទៀត សំដៅបំបែកភាពទាល់ច្រកផ្នែកនយោបាយ ដែលកើតឡើងដោយសារបក្សធំៗមិនអាចទទួលបានសំឡេងគ្រប់គ្រាន់ដើម្បីបង្កើតរដ្ឋាភិបាលថ្មី។ លោក បេនចាមីន ណេតាន់យ៉ាហ៊ូ ដែលជានាយករដ្ឋមន្ត្រីចាំផ្ទះ កំពុងស្វែងរកការបន្តការដឹកនាំប្រទេសមួយអាណត្តិទៀត ខណៈត្រូវឡើងតុលាការរឿងពុករលួយនៅប៉ុន្មានសប្ដាហ៍ទៀត។
ក្នុងការបោះឆ្នោតលើកទីមួយខែមេសា ឆ្នាំ២០១៩ បក្ស Likud របស់លោក ណេតាន់យ៉ាហ៊ូ ទទួលបានកៅអីចំនួន៣៥ ដូចគ្នានឹងបក្សប្រឆាំង Black and White របស់ឧត្តមសេនីយ៍ចូលនិវត្តន៍ បេននី ហ្កាន ។ ដ្បិតសុទ្ធតែមិនអាចបង្កើតរដ្ឋាភិបាលបាន ការបោះឆ្នោតលើកទីពីរក៏ធ្វើនៅខែកញ្ញាឆ្នាំដដល។ បក្ស Likud ទទួលបានកៅអី៣២ ឯបក្សលោក ហ្កាន់ ទទួលបាន៣៣កៅអី។ កៅអីយ៉ាងហោចណាស់៦១ ទើបគ្រប់គ្រាន់បង្កើតរដ្ឋាភិបាលបាន។
ឆ្លងកាត់ការបោះឆ្នោតពីរនេះ ទាំងលោក ណេតាន់យ៉ាហ៊ូ ទាំងលោក ហ្កាន សុទ្ធតែមិនអាចទទួលសំឡេងគ្រប់គ្រាន់ រត់រកបក្សតូចៗមួយចំនួនទៀតក្ដី។ សម្រាប់ការបោះឆ្នោតថ្ងៃទី២ ខែមីនា អ្នកបោះឆ្នោតចំនួន៦,៤លាននាក់ នឹងត្រូវសម្រេចចិត្តជាថ្មី។ ការស្ទាបស្ទង់ជាច្រើនបង្ហាញថា ការបោះឆ្នោតលើកនេះ គឺជាប្រកួតប្រជែងដ៏ប្រកៀកប្រកិតដូចការបោះឆ្នោតពីរលើកមុន ហើយលទ្ធភាពដែលត្រូវបោះឆ្នោតលើកទីបួន ក៏មានច្រើនដែរ។
បក្សដែលមានទទួលបានសំឡេងគាំទ្រគ្រាន់ការបោះឆ្នោតកន្លងមកដូចជា បក្ស Joint List ដែលតំណែងក្រុមភាគតិចអារ៉ាប់នៅអ៊ីស្រាអែល និងបក្សស្ដាំនិយមពីរទៀត ទំនងជាគោលដៅរបស់បក្សធំៗទាំងពីរ ដើម្បីបង្កើតសម្ពន្ធភាពចម្រុះដឹកនាំប្រទេស។ យ៉ាងណាមិញ គេក៏មិនភ្លេចឡើយគោលនយោបាយផ្សេងៗគ្នារវាងបក្សនយោបាយតូចធំនេះ ជាមូលហេតុដែលមិនអាចបង្កើតរដ្ឋាភិបាលក្រោយការបោះឆ្នោតពីរលើកមុន៕
Tag:
អ៊ីស្រាអែល
បេនចាមីន ណេតាន់យ៉ាហ៊ូ
បេននី ហ្កាន
© រក្សាសិទ្ធិដោយ thmeythmey.com